టీ20.. గత కొన్నేళ్లుగా ఈ పదం ఎంతో వినియోగంలోకి వచ్చింది. క్రీడాభిమానులను కట్టిపడేసిన పొట్టి క్రికెట్కు సంబంధించిన టీ20 పదాన్ని ఉపయోగించి ట్రాఫిక్ పోలీసులు ఓ యాప్ను రూపొందించారు. డ్రైవింగ్ లైసెన్సుకు దరఖాస్తు చేసుకున్న వాళ్లకు అవగాహన కలిగేలా 20 ప్రశ్నలతో రూపొందించిన ప్రశ్నావళిని ఈ యాప్లో పొందుపర్చారు. అందుకే ట్రాఫిక్-20 పేరుతో అర్థం వచ్చేలా టీ20 పేరును పెట్టారు. డ్రైవింగ్ లైసెన్సు కోసం దరఖాస్తు చేసుకున్న వాళ్లకు రవాణా శాఖ ఆధ్వర్యంలో ఆన్లైన్ పరీక్ష పెడతారు. అందులో 20 ప్రశ్నలకు గాను కనీసం 15 ప్రశ్నలకు సరైన సమాధానం చెబితేనే.. డ్రైవింగ్ లైసెన్సు మంజూరవుతుంది. విఫలమైతే మరోసారి దరఖాస్తు చేసుకోవాల్సిందే.
కప్ గెల్చుకోవచ్చు
ఇలాంటి వాళ్లను దృష్టిలో ఉంచుకొని ట్రాఫిక్ పోలీసులు టీ20 యాప్ను అందుబాటులోకి తీసుకురానున్నారు. ఈ యాప్లో వాహనదారుడు 20 ప్రశ్నలకు సమాధానాలివ్వొచ్చు. 18 కంటే ఎక్కువ ప్రశ్నలకు సమాధానమిస్తే వెంటనే ట్రాఫిక్ పోలీసులు వర్చువల్లో అందించే కప్ను గెల్చుకోవచ్చు. హైదరాబాద్ ట్రాఫిక్ పోలీసుల ఆధ్వర్యంలో నిర్వహిస్తున్న ఈ యాప్ను ప్రస్తుతం గోషామహల్, బేగంపేట్, కమాండ్ కంట్రోల్లో ఉన్న ట్రాఫిక్ శిక్షణా కేంద్రాల్లో ప్రయోగాత్మకంగా వాడుతున్నారు. ఇందులో రహదారి భద్రత, ట్రాఫిక్ నియమాలు, ప్రమాదాల నివారణకు సంబంధించి 450కి పైగా ప్రశ్నలుంటాయి. ఏ,బీ,సీ పేర్లతో మూడు సెట్లలో ప్రశ్నావలి ఉంటుంది. వాహనదారుడు తనకు నచ్చిన సెట్ను ఎంపిక చేసుకొని అందులో ఉన్న 20 ప్రశ్నలకు సమాధానాలివ్వాల్సి ఉంటుంది. అందులో ఒకవేళ అర్హత సాధించకపోతే మరోసారి పరీక్షలో పాల్గొనాలని లింకును చూపిస్తుంది.
పెరుగుతున్న ప్రమాదాలు
రహదారి ప్రమాదాలు నిత్యం పెరుగుతున్నాయి. వాహనాల సంఖ్య రోజురోజుకు పెరుగుతుండటంతో పాటు.... వాహనదారులు నిబంధనలు పాటించకపోవడం, అతివేగం, మద్యం సేవించి వాహనాలు నడపడం, రహదారి లోపాల వల్ల ప్రమాదాలు చోటుచేసుకుంటున్నాయి. గతేడాది రాష్ట్రంలో 6 వేల 200 మందికిపైగా.. రహదారి ప్రమాదాల్లో మృతి చెందారు. హైదరాబాద్ కమిషనరేట్ పరిధిలో 252 మంది, సైబరాబాద్ కమిషనరేట్ పరిధిలో 692, రాచకొండ పరిధిలో 562 మంది చనిపోయారు. దేశ వ్యాప్తంగా లక్ష యాభై వేల మంది చనిపోయారు.
మాసోత్సవాలు
దీన్ని దృష్టిలో ఉంచుకొని కేంద్రం జాతీయ రహదారి భద్రతా వారోత్సవాలను... ఈ ఏడాది నుంచి నెల రోజుల పాటు నిర్వహించాలని నిర్ణయించింది. ఈ మేరకు రాష్ట్రవ్యాప్తంగా మాసోత్సవాలు నిర్వహిస్తున్నారు. ఈ నెల 18 నుంచి ఫిభ్రవరి 17 వరకు రహదారి భద్రతపై పోలీసులు, రవాణా శాఖ ఆధ్వర్యంలో అవగాహన కార్యక్రమాలు నిర్వహిస్తున్నారు. అందులో భాగంగా ట్రాఫిక్ నియమాలు, ప్రమాదాల నివారణకు ఎలాంటి చర్యలు తీసుకోవాలనే వాటిపై అవగాహన కల్పిస్తారు. హైదరాబాద్ ట్రాఫిక్ పోలీసులు.. ఒకడుగు ముందుకు వేసి.. యాప్ను రూపొందించి వాహనదారులకు మరింత దగ్గరవుతున్నారు. 2019తో పోలిస్తే 2020లో హైదరాబాద్ కమిషనరేట్ పరిధిలో ప్రమాదాల్లో మృతి చెందిన వాళ్ల సంఖ్య తగ్గింది. దీన్ని మరింత తగ్గించేందుకు ట్రాఫిక్ పోలీసులు ప్రయత్నిస్తున్నారు.
త్వరలో అందుబాటులోకి యాప్
టీ20 యాప్ను అన్ని ప్రభుత్వ వెబ్ సైట్లతోపాటు... గూగుల్ ప్లే స్టోర్లోనూ నెల రోజుల్లో అందుబాటులోకి తీసుకురానున్నారు. వాహనదారులు ట్రాఫిక్ నిబంధనలు పాటించడం వల్ల ప్రమాదాలు తగ్గించొచ్చని పోలీసులు చెబుతున్నారు. టీ20 యాప్ను ఉపయోగించుకొని ట్రాఫిక్ నియమాలపై అవగాహన పెంచుకోవాలని పోలీసులు సూచిస్తున్నారు.
ఇదీ చదవండి: ఆసీస్పై టీమ్ఇండియా చారిత్రక విజయం
