రాష్ట్రంలో ఇవాళ్టి నుంచి నూతన మద్యం విధానం అమల్లోకి వచ్చింది. 2,216 మద్యం దుకాణాల ఏర్పాటుకు కొత్త లైసెన్సీల ఎంపిక ప్రక్రియ ఇప్పటికే పూర్తైంది. జిల్లాల ఎక్సైజ్‌ సూపరింటెండెంట్లు అనుమతుల జారీ ప్రకియను 95శాతం వరకు పూర్తిచేశారు. మిగిలిన కొన్ని దుకాణాలకు ఒకట్రెండు రోజుల్లో లైసెన్స్లు ఇవ్వనున్నారు. కొత్త మద్యం దుకాణాలు ఇవాళ్టి నుంచి ఏర్పాటు చేసుకోవాల్సి ఉండడం వల్ల లైసెన్సీలకు నిన్న రాత్రి నుంచి మద్యం సరఫరా చేసే ప్రక్రియ జరిగింది. రాత్రి పది గంటల నుంచి మొదలై రాత్రి అంతా మద్యం సరఫరా కొనసాగింది. రాష్ట్రంలోని 19 మద్యం డిపోలు రాత్రంతా ఇందుకోసం పని చేశాయి.
నేటి నుంచే విక్రయాలు ప్రారంభం
మద్యం దుకాణాలు ఏర్పాటు చేసుకోడానికి తగిన గదులు దొరికిన వారంతా ఇవాళ్టి ఉదయం నుంచి మద్యం విక్రయాలు ప్రారంభిస్తారు. మిగిలిన లైసెన్స్ దారులు... ఒకట్రెండు రోజులు ఆలస్యంగా దుకాణాలు ఏర్పాటు చేసుకునే అవకాశం ఉందని ఆబ్కారీ అధికారులు తెలిపారు. హైదరాబాద్, రంగారెడ్డి, మేడ్చల్ జిల్లాల పరిధిలో 25శాతానికి పైగా లైసెన్స్దారులకు దుకాణాల ఏర్పాటుకు గదులు దొరక్క ఏర్పాటు చేయలేదని అధికారులు పేర్కొన్నారు.
ఇవీ చూడండి: ఒక్క నెలలోనే రూ.1,650 కోట్ల మద్యం తాగేశారు
