గ్రేటర్ పరిధిలో స్వచ్ఛ హైదరాబాద్తో పాటు దాదాపు 15కు పైగా పలు థీమ్లను ప్రతిబింబించే 47 అర్బన్ లీవింగ్ థీమ్ పార్కులను 120కోట్ల రూపాయలతో ఏర్పాటు చేయనున్నట్లు మేయర్ బొంతు రామ్మోహన్ తెలిపారు. నగరంలో థీమ్ పార్కుల నిర్మాణంపై జీహెచ్ఎంసీ కమిషనర్ దానకిశోర్, పలువురు ఉన్నతాధికారులు, థీమ్ పార్కుల డిజైనింగ్ కన్సల్టెంట్లతో మేయర్ బొంతు రామ్మోహన్ సమీక్ష సమావేశం నిర్వహించారు.
ఇతివృత్తాన్ని తెలిపే పార్క్లు
హైదరాబాద్ ఇందిరాపార్కు, వెంగళరావు పార్కు, కృష్ణకాంత్ పార్కు, నెహ్రూ పార్కుల అనంతరం నగరంలో మేజర్ పార్కుల నిర్మాణం జరగలేదని మేయర్ అన్నారు. ఈ నేపథ్యంలో ప్రజలకు మరింత నాణ్యమైన జీవన వాతావరణాన్ని కల్పించేందుకు నగరంలో ఒక ఎకరానికి పైగా ఖాళీ స్థలాలను గుర్తించి వాటిలో ప్రత్యేకంగా థీమ్ పార్కులను ఏర్పాటు చేస్తామని ప్రకటించారు. థీమ్ పార్కుల్లో స్వచ్ఛ హైదరాబాద్ ఇతివృత్తాన్ని తెలిపే 12 పార్కులను జోన్కు రెండు చొప్పున ఏర్పాటు చేస్తామని తెలిపారు.
పిల్లల కోసం ప్రత్యేక పార్కులు:
ఈ స్వచ్ఛ థీమ్ పార్కుల్లో తడి, పొడి చెత్త సేకరణ, సేంద్రియ ఎరువుల తయారీ, ఇంకుడు గుంతల నిర్మాణం, ట్రాన్స్ఫర్ స్టేషన్ల నిర్వహణ, ప్లాస్టిక్ రీసైక్లింగ్, డంప్యార్డ్ల క్యాపింగ్ పనులు, సాఫ్, షాన్దార్ హైదరాబాద్లలో చేపట్టిన పలు కార్యక్రమాలను తెలుసుకునే విధంగా పార్కుల నిర్మాణాన్ని చేపడుతున్నట్లు రామ్మోహన్ తెలిపారు. అంతే కాకుండా యూనివర్సల్ థీమ్ పార్కు, తెలంగాణ సంస్కృతి, సైన్స్ పార్కు, రెయిన్ ఫారెస్టు థీమ్ పార్క్, అడ్వంచర్ పార్క్ తదితర వినూత్న అంశాలతో కూడిన పార్కులను ఏర్పాటు చేస్తున్నట్లు వివరించారు. గ్రేటర్ పరిధిలో ఇప్పటివరకు బాలలకు ప్రత్యేకంగా ఉద్యానవనం లేదని... 47 పార్కుల్లో చిల్డ్రన్స్ థీమ్ పార్కుల నిర్మాణానికి ప్రాధాన్యత ఇస్తున్నమని పేర్కొన్నారు.
పార్కులో ఆడియో, విజువల్ చిత్రాల ప్రదర్శన
పార్కుల నిర్మాణ అంచనా వ్యయాలను వెంటనే రూపొందించి జీహెచ్ఎంసీ జనరల్బాడీలో ఆమోదం పొందేలా ప్రతిపాదనలను సమర్పించాలని సంబంధిత అధికారులను కమిషనర్ దానకిశోర్ ఆదేశించారు. ప్రతి పార్కులో నగర స్వచ్ఛత, చ‌రిత్ర, సంస్కృతి, సంప్రదాయాలను తెలిపే ఆడియో, విజువల్ చిత్రాల‌ను కూడా ప్రద‌ర్శించాల‌ని తెలిపారు.
ఇదీ చూడండి: వామ్మో..! ఆ ఇంటికి 75 గదులు... 101 దర్వాజలు...
