ఐదేళ్లలోపు పిల్లలందరికీ పోలియో చుక్కలు వేసేంత వరకూ రాష్ట్రంలో పల్స్ పోలియో కార్యక్రమాన్ని కొనసాగిస్తామని వైద్యారోగ్యశాఖ మంత్రి ఈటల రాజేందర్‌ వెల్లడించారు. మేడ్చల్‌ జిల్లా శామీర్‌పేటలో మంత్రి మల్లారెడ్డితో కలిసి ఆయన పోలియో చుక్కలు వేశారు. రాష్ట్రంలో 38 లక్షల 31వేల 907 మంది చిన్నారులకు పోలియో చుక్కలు వేస్తున్నట్లు చెప్పారు. దీనికోసం 23వేల 331 పోలియో బూత్‌లు ఏర్పాటు చేశామన్నారు. మరో 877 మొబైల్ టీంలను కూడా ఏర్పాటు చేశామని తెలిపారు.
కందుకూరులో సబితా..
రంగారెడ్డి జిల్లా కందుకూరులో నిర్వహించిన కార్యక్రమంలో విద్యాశాఖ మంత్రి సబితా ఇంద్రారెడ్డి పాల్గొన్నారు. రెండు చుక్కలు పోలియో బారి నుంచి చిన్నారులను కాపాడుతాయని అన్నారు. మహబూబ్‌నగర్ ఆర్టీసీ బస్టాండులో ఏర్పాటు చేసిన పల్స్ పోలియో కేంద్రాన్ని ఎక్సైజ్‌ శాఖ మంత్రి శ్రీనివాస్‌గౌడ్, ఎమ్మెల్యేలతో కలిసి ప్రారంభించారు.
ఆరోగ్యంగా ఎదిగేందుకు..
వరంగల్ గ్రామీణ జిల్లా పర్వతగిరిలో పంచాయతీ రాజ్ శాఖ మంత్రి ఎర్రబెల్లి దయాకర్రావు పోలియో చుక్కలు వేశారు. మహబూబాబాద్ జిల్లా ఆస్పత్రిలో కార్యక్రమాన్ని మహిళ, శిశు సంక్షేమశాఖ మంత్రి సత్యవతి రాఠోడ్ ప్రారంభించారు. గర్భిణులు, బాలింతల సంరక్షణతో పాటు... చిన్నపిల్లలు ఆరోగ్యంగా ఎదిగేందుకు రాష్ట్ర ప్రభుత్వం ప్రత్యేక ప్రణాళికలు రూపొందించినట్లు మంత్రి తెలిపారు.
ఖమ్మం ఇందిరానగర్‌ ఉన్నత పాఠశాలలో పోలియో చుక్కల పంపిణీ కార్యక్రమాన్ని రవాణాశాఖ మంత్రి పువ్వాడ అజయ్‌ ప్రారంభించారు. నిర్మల్‌ బస్టాండ్లో దేవాదాయశాఖ మంత్రి ఇంద్రకరణ్‌రెడ్డి పల్స్ పోలియోను ప్రారంభించారు. హైదరాబాద్ కవాడిగూడలో ముషీరాబాద్‌ ఎమ్మెల్యే ముఠాగోపాల్, కరీంనగర్‌ గౌతమినగర్ పీహెచ్సీలో మేయర్‌ సునీల్రావు, మంచిర్యాలలోని ప్రభుత్వ ఆస్పత్రిలో ఎమ్మెల్యే దివాకర్‌రావు, జగిత్యాల జిల్లా ఖిలాగడ్డ వద్ద ఎమ్మెల్యే సంజయ్‌ పోలియో చుక్కలు వేశారు. భూపాలపల్లి పీహెచ్సీలో ఎమ్మెల్యే గండ్ర వెంకటరమణారెడ్డి, నల్గొండ జిల్లా హాలియాలో ఎమ్మెల్సీ చిన్నపరెడ్డి ప్రారంభించారు.
