దుర్గం చెరువుపై తుది ఘట్టానికి చేరిన కేబుల్ బ్రిడ్జి నిర్మాణం

భాగ్యనగర ఒడిలో మరో మణిహారంగా నిలిచే కేబుల్ బ్రిడ్జి ఈనెలాఖరుకు ప్రారంభించేందుకు బల్దియా సన్నాహాలు చేస్తోంది. దుర్గం చెరువుపై నిర్మిస్తున్న తీగల వంతెన ప్రధాన పనులన్ని పూర్తి కావడం వల్ల తుది మెరుగులు దిద్దుతున్నారు. ప్రారంభానికి ముందు నిర్వహించే ఒక్కొక్క పరీక్ష పూర్తి చేస్తున్నారు. ఇన్నాళ్లు ట్రాఫిక్ రద్దీలో చిక్కుకొని ఎంతో ఇబ్బంది పడే నగర వాసులకు కేబుల్​ బ్రిడ్జి అందుబాటులోకి వస్తే ట్రాఫిక్ సమస్యలు తప్పనున్నాయి.

హైదరాబాద్ అంటేనే మొదటగా గుర్తొచ్చేది చార్మినార్, ఇరానీ చాయ్, బిర్యాని. వీటితో పాటే.. మాదాపూర్​ దుర్గం చెరువుపై నిర్మిస్తున్న కేబుల్ బ్రిడ్జి నగరానికి మరో మణిహారంలా మారనుంది. దేశంలోనే అతిపెద్ద కేబుల్ బ్రిడ్జిగా నిర్మితమవుతున్న దుర్గం చెరువు కేబుల్ బ్రిడ్జి నిర్మాణ పనులు పూర్తి కావస్తున్నాయి. రూ.184 కోట్ల వ్యయంతో నిర్మిస్తున్న 754.38 మీటర్ల పొడవు గల బ్రిడ్జి.. నిర్మాణ ప్రధాన పనులు దాదాపు పూర్తై తుది మెరుగులు దిద్దుకుంటోంది.

సుమారు 30 టన్నుల బరువున్న 36 టిప్పర్​లను ఇసుకతో నింపి వాటిని మూడు వరుసల్లో నిలిపి లోడ్ బేరింగ్ టెస్ట్ చేస్తున్నారు బల్దియా ఇంజినీరింగ్ అధికారులు. 24 గంటలుగా చేపట్టిన ఈ ప్రక్రియ విజయవంతమవుతోందని అధికారులు భావిస్తున్నారు. దుర్గం చెరువుకు ఇరువైపులా 20 మీటర్ల ఎత్తులో వంతెన నిర్మాణం చేపట్టారు. ఈ బ్రిడ్జి నిర్మాణంలో మొత్తం 13 ఫౌండేషన్​లు ఏర్పాటు చేశారు. స్టే-కేబుళ్లను ఆస్ట్రియా నుంచి ప్రత్యేకంగా తెప్పించారు. దుర్గం చెరువు పరిసరాల్లోని పర్యావరణాన్ని దెబ్బతినకుండా ఆ ఒడ్డు, ఈ ఒడ్డుపై కేవలం 2 ఫిల్లర్ల సహాయంతో 735 మీటర్ల పొడువులో ఎల్ అండ్ టీ సంస్థ తీగల వంతెనను నిర్మిస్తోంది. 8 దేశాల ఇంజినీర్లు నిర్మాణంలో పాలు పంచుకున్నారు.

బ్రిడ్జి నిర్మాణం పూర్తయితే మాదాపూర్, జూబ్లీహిల్స్​ మధ్య గణనీయంగా దూరం తగ్గడంతో పాటు రంగురంగుల విద్యుత్ కాంతులతో మొట్టమొదటి హైదరాబాద్ హ్యాంగింగ్​ బ్రిడ్జిగా పేరొందడంతో పాటుగా మంచి పర్యాటక ప్రాంతంగా రూపొందనుంది. హైటెక్ సిటీ, ఫైనాన్షియల్ డిస్ట్రిక్​కు కేబుల్ బ్రిడ్జి ప్రత్యేక ఐకానిక్​గా రూపొందనుంది. రోడ్డు నెంబర్ 36, జూబ్లీహిల్స్, మాదాపూర్​లపై ఒత్తిడి గణనీయంగా తగ్గనుంది.

జూబ్లీహిల్స్ నుంచి మైండ్​స్పేస్​, గచ్చిబౌలిలకు దాదాపు 2 కిలోమీటర్ల మేర దూరం తగ్గనుంది. పంజాగుట్ట నుంచి నానక్ రాంగూడలోని బాహ్యవలయ రహదారికి రోడ్ నెంబర్ 45 ద్వారా అతి సులభంగా చేరుకోవచ్చు. ఈ నిర్మాణానికి ఎల్ఈడీ లైట్లు మరో ప్రత్యేక ఆకర్షణగా నిలవనున్నాయి. మొత్తం 40 వేల ఎల్ఈడీ లైట్లను దీనిపై అమర్చుతున్నారు.

రవాణా సౌకర్యంగానే కాకుండా దుర్గం చెరువు పరిసరాలను పర్యాటకం గానూ ముస్తాబు చేస్తున్నారు. బ్రిడ్జిని ప్రారంభించిన అనంతరం ప్రతి శని, ఆదివారాల్లో దుర్గం చెరువు కేబుల్ బ్రిడ్జిపైకి వాహనాలకు అనుమతించడం లేదు. ప్రతి శనివారం, ఆదివారాల్లో కేవలం పర్యాటకులను మాత్రమే కాలినడకన కేబుల్ బ్రిడ్జిపైకి అనుమతించనున్నట్లు జీహెచ్​ఎంసీ ప్రకటించింది. కేబుల్ బ్రిడ్జిపైన విహరిస్తూ.. నగర అందాలను తిలకిస్తూ, మంచి అనుభూతిని పొందేందుకు పర్యాటకులకు ప్రశాంత వాతావరణాన్ని కల్పించుటకు బల్దియా ఈ నిర్ణయం తీసుకుంది.