సచివాలయ కార్యాలయల తరలింపు ప్రక్రియ దాదాపుగా చివరి దశకు చేరుకుంది. అన్ని శాఖలను ఇప్పటికే తరలించారు. ఆర్థిక, రెవెన్యూ శాఖల దస్త్రాల తరలింపు ప్రక్రియ తుది దశలో ఉంది. సోమవారం నుంచి ఆ శాఖల కార్యకలాపాలు కూడా బూర్గుల రామకృష్ణారావు భవన్ నుంచే నిర్వహించాలని ఉన్నతాధికారులు ఆదేశాలు జారీ చేశారు. బీఆర్కే భవన్లో మరమ్మతులు కొనసాగుతూనే ఉన్నాయి. ఒకటి, రెండు అంతస్తులను మినహా మిగతా అన్ని అంతస్తుల్లోనూ పనులు జరుగుతున్నాయి. ఇవి పూర్తయ్యేందుకు మరో నెల రోజుల సమయం పడుతుందని అధికారులు అంచనా వేస్తున్నారు. ఆ తర్వాత డీ, సీ బ్లాక్లో ఉన్న సర్వర్లు సహా మిగతా అన్నింటిని కూడా బూర్గుల భవన్కు తరలించనున్నారు. ఆ ప్రక్రియ పూర్తి కాగానే కూల్చివేతపై ఆర్ అండ్ బీ శాఖ దృష్టి సారించనుంది. మరోవైపు సచివాలయ నమూనాలకు సంబంధించిన కసరత్తు కొనసాగుతోంది.
రాష్ట్ర ప్రభుత్వం నుంచి లేఖలు
కొత్త సచివాలయ నిర్మాణం కోసం నమూనాలు పంపాల్సిందిగా కోరుతూ దేశవ్యాప్తంగా పేరున్న 15 ప్రముఖ ఆర్కిటెక్ట్ కంపెనీలకు రాష్ట్ర ప్రభుత్వం నుంచి లేఖలు రాశారు. అందులో తొమ్మిది కంపెనీలు తమ నమూనాలను పంపాయి. ముంబయికి చెందిన హఫీజ్, చెన్నైకి చెందిన ఆర్కిటెక్ట్ సహా ఇతరులు ఇందులో ఉన్నారు. ఆయా కంపెనీలు పంపిన నమూనాల్లో నాలుగు, ఐదు నమూనాలకు సంబంధించి అధికారులు ఆర్ అండ్ బీ శాఖ మంత్రి వేముల ప్రశాంత్ రెడ్డికి ప్రజెంటేషన్ ఇచ్చారు. మిగతా వాటిని కూడా పరిశీలించాల్సి ఉంది. అన్ని నమూనాలను పూర్తి స్థాయిలో పరిశీలించాక ముఖ్యమంత్రి కేసీఆర్ ముందు ఉంచనున్నారు. సచివాలయ నిర్మాణానికి అవసరమైన నమూనాను సీఎం ఖరారు చేస్తారు.
వాస్తు నిపుణుల సూచనలు
సచివాలయ నిర్మాణం కోసం విద్యుత్ శాఖ కార్యాలయ స్థలాన్ని కూడా వినియోగించుకోనున్నారు. కొత్త భవనాల నిర్మాణం కోసం స్థలం చతురస్రాకారం లేదా ధీర్ఘచతురస్రాకారంలో ఉండాలని వాస్తు నిపుణులు సూచించారు. ఎన్టీఆర్ గార్డెన్స్ వైపు సచివాలయ ప్రవేశ ద్వారాన్ని ఆనుకొని పురాతన రాతికట్టడంతో ఉన్న విద్యుత్ శాఖ కార్యాలయం ఉంది. దాన్ని తొలగిస్తేనే చతురస్ర లేదా ధీర్ఘచతురస్రాకారంలో స్థలం ఉంటుంది. అందువల్ల ఆ భవనాన్ని కూడా తొలగించి... ఈ స్థలాన్ని సచివాలయ ప్రాంగణంలో కలుపుతారు. కూల్చివేతలన్నీ పూర్తయ్యాక మొత్తం స్థలాన్ని పూర్తి స్థాయిలో చదును చేశాక కొత్త భవన నిర్మాణానికి సంబంధించిన ప్రక్రియకు శ్రీకారం చుట్టనున్నారు.
ఇవీ చూడండి: లారీ యజమానికి రూ.6.53 లక్షలు జరిమానా
