రాష్ట్రంలో ‘రూర్బన్ మిషన్‌’ అమలుకు మరిన్ని గ్రామాలు ఎంపికయ్యే అవకాశం ఉంది. గ్రామాల్లో మౌలిక వసతులను మెరుగుపర్చి, వాటిని పట్టణాలకు దీటుగా తయారు చేయడం ఈ పథకం లక్ష్యం. అమలులో రాష్ట్రం 4వ స్థానంలో నిలిచింది. ఈ నేపథ్యంలో కేంద్రం మరిన్ని గ్రామాలకు ఈ పథకాన్ని విస్తరించే అవకాశం ఉందని సమాచారం.
60:40 నిష్పత్తిలో నిధులు
మైదాన ప్రాంతాల్లో 25 వేల నుంచి 50 వేల వరకు జనాభా ఉన్న పక్కపక్క గ్రామాలను క్లస్టర్‌గా గుర్తించి, అక్కడ అభివృద్ధి పనులకు కేంద్రం రూ.30 కోట్ల వరకు ఇస్తోంది. ఏజెన్సీ ప్రాంతాల్లో 5 వేల నుంచి 15 వేల వరకు జనాభా ఉన్న క్లస్టర్‌కు రూ.15 కోట్ల వరకు కేటాయిస్తోంది. కేంద్రం, రాష్ట్రం 60:40 నిష్పత్తిలో నిధులు వెచ్చిస్తాయి.
2019-20లో రూర్బన్ కింద రూ.252 కోట్లు
తెలంగాణలో 5 గిరిజన క్లస్టర్లు సహా మొత్తం 16 క్లస్టర్లు ఈ పథకంలో ఎంపికయ్యాయి. కొన్ని పనులూ పూర్తయ్యాయి. ప్రధానంగా గోదాముల నిర్మాణం, ఉన్నత పాఠశాలల్లో డిజిటల్‌ తరగతుల ఏర్పాటు, పారిశుద్ధ్యం మెరుగుపరచటం, రోడ్లపై డివైడర్లు, ఎల్‌ఈడీ లైట్ల ఏర్పాటు, అంతర్గత రోడ్ల అనుసంధానం వంటి పనులు చేపట్టారు. ప్రస్తుత 2019-20లో రూర్బన్ కింద రూ.252 కోట్లు వ్యయం చేయాలనేది రాష్ట్ర ప్రభుత్వ లక్ష్యం.
మొదటి మూడు స్థానాల్లో
కేంద్ర గ్రామీణాభివృద్ధి శాఖ పనితీరు సమీక్షా సంఘం (పీఆర్‌సీ) ఇటీవల వివిధ రాష్ట్రాల్లో రూర్బన్ మిషన్‌ పనులను పరిశీలించింది. పనితీరు ఆధారంగా రాష్ట్రాలకు మార్కులు ఇచ్చింది. తెలంగాణ 63.97 మార్కులతో నాలుగో స్థానంలో నిలిచింది. ఛత్తీస్‌గఢ్‌, తమిళనాడు, ఉత్తర్‌ప్రదేశ్‌ మొదటి మూడు స్థానాల్లో ఉన్నాయి.
మరిన్ని క్లస్టర్లు ఎంపికయ్యే అవకాశం
రాష్ట్రాలతో ఇటీవల పీఆర్‌సీ నిర్వహించిన భేటీలో రూర్బన్ విస్తరణపై చర్చించినట్లు అధికారవర్గాలు వెల్లడించాయి. ఏజెన్సీ గ్రామాలకూ మైదాన ప్రాంతాలతో సమానంగా నిధులు ఇవ్వాలనే అభిప్రాయం సమావేశంలో వ్యక్తమైనట్లు తెలిపాయి. పథకం పనులు బాగా జరుగుతున్నందున రాష్ట్రంలో మరిన్ని క్లస్టర్లు ఎంపికయ్యే అవకాశం ఉన్నట్లు ఆ వర్గాలు చెప్పాయి. తెలంగాణ సహా మరికొన్ని రాష్ట్రాలు ఇప్పటికే దీనిపై కేంద్రానికి విజ్ఞప్తి చేశాయి.
ఇదీ చూడండి: జమ్ముకశ్మీర్లో ఉగ్రదాడి-ఎస్పీఓ సహా ఇద్దరు మృతి
