తెలంగాణ ప్రభుత్వం కీలక నిర్ణయం - ప్రభుత్వ సలహాదారుల నియామకాలు రద్దు

Telangana Govt Advisers Appointments Cancelled : గత ప్రభుత్వంలో సలహాదారులుగా ఉన్న ఏడుగురి సలహాదారుల నియామకాలను రద్దు చేస్తూ ప్రభుత్వం ఉత్తర్వులు జారీ చేసింది. ఈ మేరకు సీఎస్​ శాంతి కుమారి ప్రకటన విడుదల చేశారు.

Telangana Govt Advisers Appointments Cancelled : తెలంగాణ రాష్ట్ర గత ప్రభుత్వ సలహాదారుల నియామకాలను రద్దు చేస్తూ రాష్ట్ర ప్రభుత్వం నిర్ణయం తీసుకుంది. ఈ మేరకు సీఎస్ శాంతికుమారి ఉత్తర్వులను జారీ చేశారు. ఏడుగురి సలహాదారుల నియామకాలు రద్దు(Advisers Appointments Cancelled) చేస్తున్నట్లు ప్రభుత్వం ప్రకటించింది. సోమేశ్​కుమార్​, చెన్నమనేని రమేష్​, రాజీవ్​ శర్మ, అనురాగ్​ శర్మ, ఏకే ఖాన్​ నియామకాలను రద్దు చేస్తూ ఉత్తర్వులు వెలువడ్డాయి. అలాగే జీఆర్​ రెడ్డి, ఆర్​.శోభ నియామకాలను కూడా రద్దు చేస్తూ ప్రభుత్వం ప్రకటన విడుదల చేసింది.

గత ప్రభుత్వంలో ప్రభుత్వ సలహాదారులుగా ఉన్నవారి నియామకాలు రద్దు :

• మైనారిటీ వెల్ఫేర్​కు ప్రభుత్వ సలహాదారుడు - ఏకే ఖాన్​
• ముఖ్యమంత్రి ప్రధాన సలహాదారుడు - సోమేశ్​ కుమార్​
• వ్యవసాయ వ్యవహారాలపై ప్రభుత్వ సలహాదారుడు(కేబినెట్​ ర్యాంకు) - చెన్నమనేని రమేశ్​
• ప్రభుత్వ ప్రధాన సలహాదారుడు - రాజీవ్​ శర్మ
• ప్రభుత్వ సలహాదారుడు - అనురాగ్​ శర్మ
• ప్రభుత్వ సలహాదారుడు - జీఆర్​ రెడ్డి
• ప్రభుత్వ సలహాదారురాలు - శోభ

Several Corporations Chairman Resigned in Telangana : తెలంగాణలో కాంగ్రెస్​కు మెజార్టీ సీట్లు వచ్చినప్పటి నుంచి కార్పొరేషన్ ఛైర్మన్లు రాజీనామాలు చేస్తూ వచ్చారు. కార్పొరేషన్​ ఛైర్మన్​లు, ఇతర నామినేటెడ్​ పదవులలో ఉన్న బీఆర్​ఎస్​ నేతలు కూడా రాజీనామా చేశారు. ఇప్పటివరకు 16 మంది నేతలు వారి రాజీనామా లేఖలను సమర్పించారు. వారిలో ముఖ్యంగా ప్రణాళిక సంఘం ఉపాధ్యక్షుడు(Planning Commission Vice Chairman) బోయినపల్లి వినోద్​ కుమార్​ రాజీనామా చేయగా, వారితో పాటు వివిధ కార్పొరేషన్ల ఛైర్మన్లు భరత్​ కుమార్​, జూలూరి గౌరీ శంకర్​, పల్లె రవి కుమార్​ గౌడ్​, ఆంజనేయ గౌడ్​, దూది మెట్ల బాలరాజు యాదవ్​, గూడూరు ప్రవీణ్​, అనిల్​ కూర్మాచలం, వలియా నాయక్​, వై. సతీశ్​ రెడ్డి, మేడె రాజీవ్​ సాగర్​, రవీందర్​ సింగ్​, ఎర్రోళ్ల శ్రీనివాస్​, పాటిమీది జగన్మోహన్​ రావు తదితరులు తమ రాజీనామా లేఖలను సీఎస్​ శాంతికుమారికి సమర్పించారు.

కొత్త ప్రభుత్వం ఏర్పడిన మరుసటి రోజు తెలంగాణ ట్రాన్స్​కో, జెన్​కో సీఎండీగా ఉన్న ప్రభాకర్​రావు రాజీనామా చేశారు. మరోవైపు టాస్క్​పోర్స్​ ఓఎస్డీ రాధాకిషన్​ రావు కూడా తన పదవికి రాజీనామా చేశారు. శాతవాహన అర్బన్​ డెవలప్​మెంట్​ అథారిటీ ఛైర్మన్​ సైతం రాజీనామా చేసి సీఎస్​కు లేఖ పంపారు. రాష్ట్ర ప్రభుత్వ సలహాదారు, బ్రాహ్మణ పరిషత్​ అధ్యక్షులుగా ఉన్న కేవీ రమణాచారి తన పదవులకు రాజీనామా చేశారు.