Telangana Government Letter To NWDA: గోదావరి-కావేరీ అనుసంధానం కోసం ఛత్తీస్గఢ్ వాటాలోని 141 టీఎంసీలను వినియోగిస్తున్న తరుణంలో ఆ రాష్ట్ర ప్రాతినిథ్యం లేకుండా చర్చించడం సబబు కాదని రాష్ట్ర ప్రభుత్వం అభిప్రాయపడింది. ఈ నెల 6న హైదరాబాద్ జల సౌధలో ప్రతిపాదించిన టాస్క్ ఫోర్స్ సమావేశానికి ఛత్తీస్‌గఢ్‌ను ఆహ్వానించాలని కోరింది. ఈ మేరకు తెలంగాణ ప్రభుత్వం తరఫున నీటి పారుదల శాఖ ఇంజినీర్ ఇన్ చీఫ్ మురళీధర్ జాతీయ జలాభివృద్ధి సంస్థ చీఫ్ ఇంజినీర్‌కు లేఖ రాశారు.
గోదావరి-కావేరీ అనుసంధానానికి సంబంధించి.. తెలంగాణ ప్రభుత్వ అభిప్రాయాన్ని గతంలోనే స్పష్టం చేశామని.. అందుకు కట్టుబడి ఉన్నట్లు పునరుద్ఘాటించారు. 6న జరిగే సమావేశానికి ఛత్తీస్‌గఢ్‌ను సభ్యులుగా, ప్రత్యేక ఆహ్వానితులుగా ఆహ్వానించలేదని లేఖలో పేర్కొన్నారు. అనుసంధానం కోసం ఆ రాష్ట్ర నీటి వాటాను వినియోగించుకుంటూ.. ఆ రాష్ట్రం లేకుండా చర్చలు అర్థవంతం కాదని అభిప్రాయపడ్డారు. ఈ పరిస్థితుల్లో ఛత్తీస్‌గఢ్‌ను సోమవారం జరిగే సమావేశానికి ఆహ్వానించాలని తెలంగాణ ప్రభుత్వం కోరింది.
గతంలోనూ పలుమార్లు తెలంగాణ ప్రభుత్వం జాతీయ జలాభివృద్ధి సంస్థకు పలు అంశాలపై లేఖలు రాసింది. ముఖ్యంగా గోదావరి-కావేరి నదుల అనుసంధానం విషయంలో ఆ సంస్థ తీసుకుంటున్న నిర్ణయాలపై తెలంగాణ ఈఎన్సీ తన అభిప్రాయాలు లేఖల ద్వారా వ్యక్తం చేసింది. 2022 నవంబర్లోను నదుల అనుసంధానం గురించి రాష్ట్ర ప్రభుత్వం లేఖ రాసింది. అప్పుడు మొదటగా మహానది- గోదావరి నదుల అనుసంధానం పూర్తయ్యాకే గోదావరి-కావేరి లింక్ చేపట్టాలని స్పష్టం చేసింది. అదే విధంగా కొన్ని అంశాలను ప్రభుత్వం ప్రస్తావించింది.
ఇచ్చంపల్లి వద్ద ఆనకట్ట నిర్మించాలని ఉమ్మడి ఏపీలోనే ప్రతిపాదించారని.. అయితే తమ రాష్ట్రాల్లో ముంపు సమస్య వస్తుందని ఆనాడే మహారాష్ట్ర, ఛత్తీస్గఢ్ అభ్యంతరం తెలిపాయని ప్రభుత్వం పేర్కొంది. ప్రతిపాదిత ఇచ్చంపల్లి ఛత్తీస్గఢ్ సరిహద్దుకు సమీపాన ఉండడంతో మళ్లీ అక్కడి నుంచి అభ్యంతరం రావచ్చని తెలిపింది. ఇచ్చంపల్లి దిగువన తెలంగాణ రాష్ట్రానికి 158 టీఎంసీల మేర నీటి అవసరాలు ఉన్నాయని.. అదే ఆనకట్ట కడితే వాటిపై ఆ ప్రభావం పడుతుందని సర్కార్ ఆందోళన వ్యక్తం చేసింది. రాష్ట్ర అవసరాలు తీరాకే నీటి మళ్లింపు జరగాలని ఆనాడే స్పష్టం చేసింది.
ఇలా కొన్ని అభ్యంతరాల నేపథ్యంలో మహానది - గోదావరి నదుల అనుసంధానం పూర్తయ్యాక.. లేదా పనులు వేగవంతం అయ్యాక మాత్రమే గోదావరి - కావేరీ నదుల లింక్ అంశాన్ని ప్రతిపాదించవచ్చని తెలిపింది. ఈ క్రమంలో నదుల అనుసంధాన ప్రతిపాదనలు ఖరారు చేసే సమయంలో ఈ అంశాలన్నింటినీ పరిగణనలోకి తీసుకోవాలని జాతీయ జలాభివృద్ధి సంస్థను రాష్ట్ర ప్రభుత్వం కోరింది.
ఇవీ చదవండి:
