Telangana Decade Celebrations : 2014 జూన్ రెండో తేదీన ఆవిర్భవించిన తెలంగాణ రాష్ట్రం.. తొమ్మిది వసంతాలు పూర్తి చేసుకొంది. పదో ఏట అడుగుపెడుతున్న వేళ రాష్ట్ర అవతరణ దశాబ్ది ఉత్సవాలు ఘనంగా, వైభవంగా జరగనున్నాయి. ప్రత్యేక సందర్భాన్ని పురస్కరించుకొని మూడు వారాల పాటు వేడుకలు నిర్వహించాలని నిర్ణయించిన రాష్ట్ర ప్రభుత్వం.. అందుకనుగుణంగా ఏర్పాట్లు చేసింది. ఈ వేడుకలను సచివాలయంలో ముఖ్యమంత్రి కేసీఆర్ నేడు ప్రారంభించనున్నారు.
KCR on Telangana Formation Day Celebrations : ఈ క్రమంలోనే కేసీఆర్ ఉదయం గన్‌పార్క్‌లోని అమరవీరుల స్థూపం వద్ద నివాళులు అర్పించిన తర్వాత.. సచివాలయంలో వేడుకలను ప్రారంభిస్తారు. జాతీయ పతాకాన్ని ఆవిష్కరించి పోలీసుల గౌరవ వందనం స్వీకరిస్తారు. అనంతరం సభికులనుద్దేశించి ప్రసంగించి దశాబ్ది వేడుకల సందేశాన్ని కేసీఆర్ అందిస్తారు. సచివాలయ ప్రారంభం అనంతరం జరుగుతున్న మొదటి కార్యక్రమాన్ని ఘనంగా నిర్వహించేందుకు ఏర్పాట్లు చేశారు. మొత్తం 15,000 మందికి సరిపడేలా కుర్చీలు ఏర్పాటు చేశారు.
Telangana Formation Day celebrations 2023 : సచివాలయ ఉద్యోగులతో పాటు జీహెచ్ఎంసీ పరిధిలోని విభాగాధిపతుల కార్యాలయాల్లోని ఉద్యోగులు.. వేడుకలకు హాజరు కానున్నారు. వారి కోసం ప్రత్యేకంగా 300 బస్సులు ఏర్పాటు చేశారు. వర్షం, ఎండకు సంబంధించి కూడా ఎలాంటి ఇబ్బందులు లేకుండా టెంట్లు వేశారు. ఈ ప్రారంభ వేడుకల కోసం రూ.1.80 కోట్లు మంజూరు చేశారు. విభాగాధిపతులు అందరూ ఉదయం ఏడున్నరకు తమ కార్యాలయాల్లో జాతీయ పతాకాన్ని ఆవిష్కరించి.. ఎనిమిది గంటల్లోపు సచివాలయం చేరుకోవాలని ఆదేశించారు.
సచివాలయం ప్రధాన ద్వారం ముందు వేడుకల ఏర్పాట్లు చేసిన తరుణంలో.. సీఎం కేసీఆర్ వేడుకలకు పశ్చిమ ద్వారం నుంచి సచివాలయంలోకి ప్రవేశించనున్నారు. జిల్లా కేంద్రాల్లో మంత్రులు, ప్రముఖులు జాతీయ పతాకాన్ని ఆవిష్కరించి వేడుకలను ప్రారంభిస్తారు. ప్రజాప్రతినిధులు, అధికారులు వారి వారి కార్యాలయాల్లోని వేడుకల్లో పాల్గొంటారు. రాష్ట్రంలోని అన్ని ప్రభుత్వ సంస్థలు, కార్యాలయాల్లో ప్రారంభ వేడుకల సందర్భంగా జాతీయ జెండాను ఆవిష్కరించాలని ఇప్పటికే ఆదేశాలు జారీ చేశారు.
Telangana Decade Celebrations Schedule : ఉత్సవాల సందర్భంగా రాజధానితో పాటు అన్ని జిల్లాల్లో కార్యాలయాలు, చారిత్రక కట్టడాలు, ప్రధాన కూడళ్లను.. విద్యుత్ దీపాలతో అలంకరించారు. రాష్ట్ర వ్యాప్తంగా 21 రోజుల పాటు ఈ నెల 22 వరకు దశాబ్ది ఉత్సవాలు జరగనున్నాయి. ఒక్కో రోజును ఒక్కో రంగానికి కేటాయించి.. ఆయా రంగాల్లో తొమ్మిదేళ్ల ప్రగతిని వివరించనున్నారు. అన్ని వర్గాల ప్రజలు, వివిధ ప్రభుత్వ కార్యక్రమాలు, పథకాల లబ్దిదారులను భాగస్వామ్యుల్ని చేస్తూ వేడుకలు నిర్వహించనున్నారు.
చెరువుల వద్ద భోజనాలు, సంబురాలు, వసతి గృహాలు, అంగన్‌వాడీలు, మహిళా కార్యాలయాలు, గురుకులాలు, విద్యాసంస్థలు, ఆయా శాఖల కార్యాలయాలు ఇలా అన్ని చోట్లా మూడు వారాల పాటు ఉత్సవాలు, ర్యాలీలు, సభలు, సమావేశాలు జరగనున్నాయి. సాంస్కృతిక కార్యక్రమాలు, కవి సమ్మేళనాలు, రన్, హరితోత్సవం లాంటివి నిర్వహించనున్నారు. చివరి రోజు 22వ తేదీన అమరవీరులకు ఘనంగా నివాళులు అర్పించేలా కార్యక్రమాలు రూపొందించారు.
105 Crores Released on Decade Celebrations : రాష్ట్ర వ్యాప్తంగా అమరులకు శ్రద్ధాంజలి ఘటించి సంస్మరణ తీర్మానాలు చేస్తారు. హైదరాబాద్‌లో ట్యాంక్ బండ్‌పై అమరుల గౌరవార్థం కళాకారులతో భారీ ర్యాలీ నిర్వహిస్తారు. మూడు వారాల పాటు రాష్ట్ర వ్యాప్తంగా జరగనున్న వేడుకల కోసం రాష్ట్ర ప్రభుత్వం రూ.105 కోట్లు కేటాయించింది. జిల్లా విస్తీర్ణం, జనాభాకు అనుగుణంగా ఆయా జిల్లాలకు నిధులు కేటాయింపు చేశారు.
ఇవీ చదవండి: Telangana Decade Celebrations : పదేళ్ల ప్రగతిని చాటేలా.. అమరుల త్యాగాలను స్మరించుకునేలా.
Telangana Decade Celebrations : తొమ్మిదేళ్ల ప్రగతి చాటే.. ఉత్సవాలకు వేళాయే
Decade Celebrations of Telangana : 'సంక్షేమ పథకాలు వివరించే విధంగా కార్యక్రమాలు ఉండాలి'
