Last Day of Telangana Decade Celebrations : ప్రత్యేక తెలంగాణ రాష్ట్రం ఆవిర్భవించి తొమ్మిదేళ్లు పూర్తి చేసుకొని పదో వసంతంలోకి అడుగిడిన సందర్భంగా ప్రభుత్వం దశాబ్ది ఉత్సవాలను ఘనంగా నిర్వహిస్తోంది. జూన్ రెండో తేదీన ప్రారంభమైన వేడుకలు...మూడు వారాలుగా వైభవంగా, పండుగ వాతావరణంలో కొనసాగుతున్నాయి. రోజుకు ఒక రంగం చొప్పున ఆయా రంగాల వారీగా దినోత్సవాలను నిర్వహిస్తూ అభివృద్ధి, సంక్షేమ కార్యక్రమాల తీరుతెన్నులను ప్రజలకు వివరించారు. తొమ్మిదేళ్ల హయంలో రాష్ట్ర ప్రభుత్వం సాధించిన విజయాలు, ప్రజలకు చేకూర్చిన లబ్ధి వివరిస్తూ కార్యక్రమాలు జరిగాయి. ఇవాళ్టితో దశాబ్ది వేడుకలు ముగియనున్నాయి.
Telangana Martyrs Memorial Inauguration : ఉత్సవాల్లో చివరి రోజైన ఇవాళ అమరుల సంస్మరణ దినోత్సవాన్ని నిర్వహిస్తున్నారు. ఊరూరా అన్ని స్థానిక సంస్థల్లోనూ సమావేశాలు ఏర్పాటు చేసి అమరులకు శ్రద్ధాంజలి ఘటించి మౌనం పాటిస్తారు. అమరుల సంస్మరణ తీర్మానం చేస్తారు. అన్ని విద్యాలయాల్లోనూ ప్రార్థనా సమావేశంలో అమరులను స్మరిస్తూ రెండు నిమిషాలు మౌనం పాటించాలని తెలిపారు. సాయంత్రం హైదరాబాద్‌లో అమరుల గౌరవార్థం భారీ ర్యాలీ నిర్వహించనున్నారు. అంబేడ్కర్ 125 అడుగుల విగ్రహం నుంచి ఎన్టీఆర్ మార్గ్‌లో అమరుల స్మారకం వరకు జరిగే ర్యాలీలో... ఐదు వేలకుపైగా కళాకారులు తమ కళారూపాలను ప్రదర్శిస్తారు. సచివాలయం ఎదుట నిర్మించిన తెలంగాణ అమరవీరుల స్మారకాన్ని ముఖ్యమంత్రి కేసీఆర్ సాయంత్రం ఆరున్నరకు ప్రారంభిస్తారు. తెలంగాణ అమరుల స్మారకం – అమర దీపం ప్రజ్వలన కార్యక్రమం ఘనంగా జరిగేలా ప్రభుత్వం ఏర్పాట్లు చేసింది.
Telangana martyrs Memorial In Hyderabad : హైదరాబాద్ నడిబొడ్డున యావత్ తెలంగాణ సమాజం గర్వించేలా మరో అద్భుత ఘట్టం ఇవాళ ఆవిష్కృతం కానుంది. రాష్ట్ర సాధన కోసం తెలంగాణ బిడ్డలు చేసిన త్యాగాల స్ఫూర్తి నిత్యం ప్రజ్వరిల్లేలా, వారి ఆశయాలు ప్రజలకు నిత్యం స్ఫురణకు వచ్చేలా రాష్ట్ర ప్రభుత్వం నిర్మించిన ‘అమర దీపం’ హుస్సేన్ సాగర్ తీరాన ప్రతి రోజూ దేదీప్యమానమై వెలుగనుంది. తద్వారా త్యాగధనులైన తెలంగాణ బిడ్డలకు నిత్య నివాళి అర్పించాలన్నది రాష్ట్ర ప్రభుత్వ ఆలోచన. అమరుల కుటుంబసభ్యులను ఈ సందర్భంగా సన్మానిస్తారు. అనంతరం జరిగే సభలో మంత్రులు, ప్రజాప్రతినిధులు పాల్గొంటారు. సభకు హాజరయ్యే వేలాది మంది విద్యుత్ దీపాలతో అమరులకు నివాళి అర్పిస్తారు. అనంతరం భారీ డ్రోన్ షో ఏర్పాటు చేశారు. 750 డ్రోన్ల సాయంతో తొమ్మిదేళ్ల తెలంగాణ ప్రగతి, విజయాలను కళ్లకు కట్టేలా ఈ ప్రదర్శన నిర్వహిస్తారు.
అమరవీరుల స్మారకం ప్రారంభోత్సవానికి... పోలీసులు భారీ భద్రత ఏర్పాటు చేశారు. మొత్తం 2 వేల 3 వందల మంది పోలీసులు విధుల్లో ఉండనున్నారు. స్మారక కేంద్రం ప్రారంభోత్సవ దృష్ట్యా ట్రాఫిక్ పోలీసులు పలు ఆంక్షలు విధించారు. ఇవాళ మధ్యాహ్నం 3గంటల నుంచి రాత్రి 9గంటల వరకూ అమరవీరుల స్మారకం పరిసర ప్రాంతాల్లో ఆంక్షలు అమలులో ఉంటాయని ట్రాఫిక్ పోలీసులు తెలిపారు.
ఇవీ చదవండి:
