మీ ప్రయాణం తాలూకు గమ్యం మీ ఇల్లే కావాలి - ఇవి తప్పక పాటించండి

సంక్రాంతి పండుగకు సొంతూళ్లకు వరుస కడుతున్న జనం - నేడు, రేపు భారీ సంఖ్యలో ప్రయాణాలు - అతివేగం, అర్ధరాత్రి ప్రయాణాలు వద్దంటున్న పోలీసులు

Sankranti Festival Travel Precautions : సంక్రాంతి పండుగకు నగరం ఊర్లకు తరలివెళ్తుంది. ఉపాధి, విద్య కోసం నగరాలు, పట్టణాల్లో ఉంటున్న వాళ్లు పండుగకు సొంతూరు వెళ్తున్నారు. రైళ్లు, బస్సులతో పాటు సొంత వాహనాల్లో ప్రయాణాలు చేస్తున్నారు. శుక్రవారం సాయంత్రం నుంచి ప్రయాణాలు ఊపందుకున్నాయి. శని, ఆదివారాల్లో ఈ రద్దీ మరింతగా ఉండనుంది.

రహదారులపై పొగ మంచు ఉండటం, రాత్రి ప్రయాణాలు, అతివేగంగా వాహనాలను నడపడం, మద్యం సేవించి నడపడం వంటివి ప్రమాదాలకు దారి తీస్తాయి. అందువల్ల కారు, బైక్​ల్లో ప్రయాణించే వారు అప్రమత్తంగా ఉండాలి. విజయవాడ మార్గంలో పంతంగి టోల్ ​గేట్ దగ్గర సగటున రోజూ 30 నుంచి 36 వేల వాహనాలు రాకపోకలు సాగిస్తే, సంక్రాంతి సమయంలో ఈ సంఖ్య రెట్టింపు అవుతుంది.

బండిని ఓసారి చెక్​ చేసుకోండి

• చాలా మంది కారు కొని నడపక చాలా వారాల పాటు పార్కింగ్​లోనే ఉంచుతారు. పండగ ప్రయాణం అనగానే కారు తీసి వెళ్తారు. నెలల తరబడి కారును తీయకపోతే టైర్లు దెబ్బ తింటాయి. ప్రమాదానికి ఆస్కారం ఉంటుంది.
• 50 వేల కి.మీ తిరిగితే అరిగే టైర్లు, నాలుగైదు నెలలు కదిలించకుండా ఉండే కారు టైర్లు ఒక్కటే. ఊర్లకు వెళ్లే ముందు కారు టైర్ల నాణ్యత, గాలి చూసుకోవాలి. మధ్యలో ఆగితే ఇబ్బంది లేకుండా మంచి స్టెప్నీ ఉంచుకోవాలి.
• పిల్లలు బిస్కెట్లు, చాకెట్లు తిని కారులో వదిలేస్తుంటారు. సెల్లారులో ఎలుకలు, పంది కొక్కులు వాటిని తినేందుకు కారు లోపలికి వస్తాయి. ఇంజిన్‌లో వైర్లను కొరికేస్తాయి. ఈ విషయంలో జాగ్రత్త పాటించాలి.
• దూర ప్రయాణాలు చేసేవారు కారు, ద్విచక్ర వాహనానికి కచ్చితంగా ముందే సర్వీసింగ్‌ చేయించాలి.

బ్యాటరీ బాగుందా : చలికాలం బ్యాటరీ సమస్యలతో బండి ఆగిపోవడం లాంటివి జరుగుతుంటాయి. ఇన్‌బిల్ట్‌ కాకుండా కారులో ప్రత్యేక వ్యవస్థలను ఏర్పాటు చేసుకున్న సందర్భాల్లో బ్యాటరీ సామర్థ్యం తగ్గుతుంది. హైఎండ్‌ కార్లలో అయితే ఏ సమస్య అయినా ఇండికేటర్ల ద్వారా తెలిసిపోతుంది. పాత కార్లలో అలాంటి సదుపాయాలు ఉండవు. ఊరికి వెళ్లేముందు బ్యాటరీని చెక్‌ చేయించాలి.

చేతిలో ఫోన్‌ చాలా ప్రమాదం : ఓ చేత్తో స్టీరింగ్‌ తిప్పుతూ, మరో చేత్తో ఫోన్‌ పట్టుకుని చాలా మంది కార్లు తోలుతుంటారు. రోడ్డు ప్రమాదాలకు ప్రధాన కారణాల్లో సెల్‌ఫోన్‌ డ్రైవింగ్‌ ఒకటి. విశ్రాంతి తీసుకోవాలనుకున్నా, ముఖ్యమైన ఫోన్‌ కాల్‌ మాట్లాడాలనుకున్నా రోడ్డు పక్కన కేటాయించిన ప్రాంతంలో ఇండికేటర్లు వేసి కారు ఆపి మాట్లాడాలి. ఇరుకు రోడ్లపై బండ్లు ఆపడం అత్యంత ప్రమాదం. అలాగే డ్రైవింగ్‌ చేస్తున్న వ్యక్తితో పాటు ముందు సీట్లో కూర్చున్న వారూ సీటు బెల్టులు పెట్టుకోవడం తప్పనిసరి.

వేగం 80 కి.మీ. దాటొద్దు : 100, 120 కి.మీ, అంతకంటే ఎక్కువ వేగంతో ప్రయాణిస్తే అకస్మాత్తుగా కారును నియంత్రించడం సాధ్యం కాదు. వేగం 80 కి.మీ. దాటకుండా ఉంటే కారును కంట్రోల్‌ చేయవచ్చని అధికారులు సూచిస్తున్నారు. ఎఫ్‌ఎం రేడియో పెట్టడం, స్క్రీన్‌లో వీడియోల ప్రదర్శన కారును నడిపే వారి ఏకాగ్రతను దెబ్బ తీస్తాయి. రెండు గంటలకు ఒకసారి విరామం తీసుకోవాలి. ఓవర్‌ టేకింగ్‌లో తగిన జాగ్రత్తలు అవసరం.

రాత్రి వద్దు : సమయం కలిసి వస్తుందని చాలా మంది కార్లలో రాత్రి ప్రయాణాలు చేస్తుంటారు. రోజంతా పని చేసి అలసటతో ఉన్న వారు రాత్రి డ్రైవింగ్‌లో ఇబ్బందిపడే ప్రమాదం ఉంది. పైగా ఎక్కువ ప్రమాదాలు అర్ధరాత్రి 2 నుంచి తెల్లవారుజామున 4 గంటల మధ్యలోనే జరుగుతున్నాయని రవాణా శాఖ అధికారులు హెచ్చరిస్తున్నారు. మద్యం తాగి వాహనాలు తోలడం చాలా ప్రమాదకరం. ద్విచక్ర వాహనాలపై 50-100 కి.మీ.మించి వెళ్లొద్దు. హెల్మెట్‌తో పాటు క్లిప్‌ పెట్టుకోవడమూ ముఖ్యమే.