Telangana Congress MLA Candidates List 2023 : రాష్ట్ర కాంగ్రెస్‌లో మలివిడత అభ్యర్థుల ఎంపికపై తర్జనభర్జన కొనసాగుతోంది. మొదటి జాబితాలో ప్రకటించిన 55 నియోజకవర్గాలను పక్కన పెడితే మిగిలిన 64 స్థానాలకు అభ్యర్థుల ఎంపిక సంక్లిష్టంగా మారింది. ఒకే పేరుతో పాటు రెండు పేర్లు ఉన్న స్థానాలను. కేంద్ర ఎన్నికల కమిటీకి సిఫారసు చేయాలని నిర్ణయించినట్లు తెలుస్తోంది. బుధవారం కాంగ్రెస్ కేంద్ర ఎన్నికల కమిటీ (Congress Central Election Committee) సమావేశంలో 64 స్థానాలకు దాదాపు 5 గంటల పాటు కసరత్తు కొనసాగింది.
Telangana Congress MLA Candidates Final List : ఇందులో 35 స్థానాల్లో అభ్యర్థుల ఎంపిక కొలిక్కి వచ్చినట్లు తెలుస్తోంది. మిగిలిన 29 నియోజకవర్గాల్లో పోటీదారుల ఎంపికలో కేంద్ర ఎన్నికల కమిటీ ఏకాభిప్రాయానికి రాలేకపోయినట్లు సమాచారం. బుధవారం జరిగిన సీఈసీ సమావేశంలో ఇతర పార్టీల నుంచి వచ్చిన వారికి సీట్లు ఇవ్వడం వల్ల పార్టీలో ఉన్న నాయకులకు అన్యాయం జరుగుతోందని ఉత్తమ్‌ కుమార్‌ రెడ్డి (Uttam Kumar Reddy) ప్రస్తావించినట్లు సమాచారం. దీనిపై స్పందించిన పీసీసీ అధ్యక్షుడు రేవంత్‌రెడ్డి (Revanth Reddy).. అభ్యర్థులు బలహీనంగా ఉన్న చోట్ల మాత్రమే బయటి నేతలకు టికెట్లు ఇస్తున్నట్లు చెప్పినట్లు తెలుస్తోంది.
Congress MLA Candidates Second List : 29 నియోజకవర్గాల్లో టికెట్ ఆశిస్తున్న వారు సమఉజ్జీలు కావడంతో కేంద్ర ఎన్నికల కమిటీ ఎటూ తేల్చుకోలేని పరిస్థితి ఏర్పడింది. ప్రధానంగా గట్టి పోటీ ఉన్న స్థానాల్లో సూర్యాపేట, ఎల్బీనగర్, మునుగోడు, భువనగిరి, అంబర్‌పేట, జూబ్లీహిల్స్, ఖైరతాబాద్, నిజామాబాద్ అర్బన్ తదితర నియోజకవర్గాలు ఉన్నట్లు సమాచారం. ఈ స్థానాలకు అభ్యర్థుల ఖరారుకు సీఈసీ కూడా లోతైన కసరత్తు చేయాల్సిన పరిస్థితి నెలకొంది.
బుధవారం కేంద్ర ఎన్నికల కమిటీ సమావేశం తర్వాత.. కేసీ వేణుగోపాల్ నివాసంలో స్క్రీనింగ్ కమిటీ సభ్యులు మరోసారి సమావేశమయ్యారు. వివిధ స్థానాల్లో టికెట్ ఆశిస్తున్న నాయకులు ముఖ్యులు కావడంతో వారిని బుజ్జగించే కార్యక్రమం కూడా కొనసాగింది. అందులో భాగంగానే నిజామాబాద్ అర్బన్ టికెట్ కోరుతున్న పీసీసీ కార్యనిర్వాహక అధ్యక్షుడు మహేశ్‌ కుమార్‌ గౌడ్‌కు సర్దిచెప్పే ప్రయత్నం చేసినట్లు తెలుస్తోంది.
ఈ స్థానాన్ని మైనార్టీలకు ఇవ్వాల్సి ఉండడంతో.. ప్రభుత్వం వచ్చిన తర్వాత సముచితస్థానం కల్పించనున్నట్లు కేసీ వేణుగోపాల్ నేతృత్వంలో కమిటీ హామీ ఇచ్చినట్లు సమాచారం. అదేవిధంగా ఉమ్మడి ఖమ్మం జిల్లాలో మధిర, భద్రాచలం నియోజకవర్గాలు మినహా 8 స్థానాలకు అభ్యర్థుల ఎంపిక నిలిచిపోయింది. దీనిపై సీఎల్పీ నేత భట్టి విక్రమార్క, పొంగులేటి శ్రీనివాస్‌రెడ్డితో పాటు స్క్రీనింగ్ కమిటీ సభ్యులు ప్రత్యేకంగా సమావేశం అయ్యారు. వామపక్షాలు అడుగుతున్న స్థానాలు కూడా ఖమ్మం జిల్లాలోనే ఎక్కువగా ఉండడంతో సుదీర్ఘంగా చర్చించక తప్పడం లేదు.
Telangana Assembly Elections 2023 : సీపీఐ సీట్ల విషయంలో ఏకాభిప్రాయం కుదిరినప్పటికీ... సీపీఎం కోరుతున్న సీట్లపై సంక్లిష్టత నెలకొన్నట్లు తెలుస్తోంది. పాలేరు, మిర్యాలగూడ రెండు సీట్లు ఇవ్వాలని సీపీఎం పట్టు పట్టడంతో ఎంపిక ప్రక్రియలో పీటముడి పడింది. కాంగ్రెస్‌లోకి ఇతర పార్టీల నుంచి నేతల చేరికలు కొనసాగుతున్నాయి. రేపు హస్తం పార్టీలోకి రానున్నట్లు కోమటిరెడ్డి రాజగోపాల్‌రెడ్డి (Komatireddy Rajagopal Reddy) ప్రకటించారు. వీటన్నంటిని దృష్టిలో పెట్టుకుని ఇవాళ సాయంత్రానికి అభ్యర్థుల ఎంపిక పూర్తయ్యే అవకాశం ఉన్నట్లు తెలుస్తోంది.
Congress Screening Committee Meeting : 'మిగిలిన 64 నియోజకవర్గాలకు ఒకేసారి ప్రకటిస్తాం'
