Telangana 2023 Assembly Elections: రాష్ట్రంలో కాస్తా ముందస్తుగానే ఎన్నికల వాతావరణం వేడెక్కింది. శాసనసభకు డిసెంబర్ వరకు ఎన్నికలు జరగాల్సి ఉంది. గడువు దగ్గర పడుతున్న తరుణంలో రాజకీయ పార్టీలు తమ కార్యాచరణను ప్రారంభించాయి. అసెంబ్లీ ఎన్నికలే లక్ష్యంగా ప్రణాళికలు సిద్ధం చేస్తున్నాయి. తెలంగాణ రాష్ట్ర ఆవిర్భావం నుంచి రెండు మార్లు అధికారాన్ని దక్కించుకున్న తెలంగాణ రాష్ట్ర సమితి.. ఇటీవలే భారత రాష్ట్ర సమితిగా రూపాంతరం చెందింది. ముచ్చటగా మూడోసారి గెలుపొంది అధికార పీఠాన్ని కైవసం చేసుకోవాలని ప్రయత్నిస్తోంది.
గత తొమ్మిదేళ్ల కాలంలో చేసిన అభివృద్ధి, సంక్షేమ కార్యక్రమాలే ప్రధాన అజెండాగా బీఆర్ఎస్ ప్రజల్లోకి విస్తృతంగా వెళ్తోంది. ఆత్మీయ సమ్మేళనాల పేరిట అధికార పార్టీ నేతలు ఊరూవాడా చుడుతున్నారు. కేసీఆర్ సర్కార్ అమలు చేసిన, చేస్తున్న పథకాలు, కార్యక్రమాలను విస్తృతంగా ప్రజల్లోకి తీసుకెళ్తున్నారు. వాటి వల్ల కలిగిన లబ్దిని వివరిస్తున్నారు. ఈనెల 25న రాష్ట్ర వ్యాప్తంగా అన్ని నియోజకవర్గ కేంద్రాల్లోనూ బీఆర్ఎస్ సమావేశాలు నిర్వహించనున్నారు.
క్షేత్రస్థాయిలోనూ రాజకీయంగా ఉన్న పరిస్థితులను ఎప్పటికప్పుడు అంచనా వేసుకుంటూ ప్రణాళికలు రచిస్తున్నారు. ఇదే సమయంలో జాతీయ రాజకీయాలే లక్ష్యంగా మహారాష్ట్ర, ఆంధ్రప్రదేశ్, ఇతర రాష్ట్రాల్లోనూ పార్టీ విస్తరణపై దృష్టి కేంద్రీకరించారు. ప్రభుత్వ పరంగానూ ఇంకా అమలు చేయాల్సిన హామీలు, కార్యక్రమాలను పట్టాలెక్కించే దిశగా కసరత్తు జరుగుతోంది.
మూడోమారు ముఖ్యమంత్రిని చేయాలి: ఇటీవల జరిగిన అంబేడ్కర్ విగ్రహావిష్కరణతో పాటు త్వరలో జరగనున్న సచివాలయం, అమరుల స్మారకం ప్రారంభోత్సవాల ద్వారా ప్రజల్లోకి మరింత స్పష్టమైన సంకేతాలు పంపేలా కార్యక్రమాలు రూపొందిస్తున్నారు. జిల్లాల్లో విస్తృతంగా పర్యటిస్తున్న మంత్రులు.. ప్రభుత్వ కార్యక్రమాలను ప్రజల్లోకి తీసుకెళ్తూనే విపక్షాల వైఖరిని ఎండగడుతున్నారు.కేసీఆర్ రుణం తీర్చుకోవాలని మూడోమారు ముఖ్యమంత్రిని చేయాలని ప్రజలకు విజ్ఞప్తి చేస్తున్నారు. ప్రజల్లో సెంటిమెంట్ ను రగిల్చే అంశాలను ఎంచుకొని ముందుకెళ్తున్నారు.
విపక్షాలు సైతం దూకుడుగానే: అటు విపక్షాలు సైతం దూకుడుగానే ప్రజల్లోకి వెళ్తున్నాయి. సర్కార్ వైఫల్యాలను ప్రధానంగా ప్రజల్లోకి తీసుకెళ్తూ మద్దతు పొందే ప్రయత్నం చేస్తున్నాయి. ఆయా వర్గాల వారీగా ప్రభుత్వం నెరవేర్చాల్సిన హామీలు, అంశాలను ఎప్పటికప్పుడు ప్రస్తావిస్తూ వెళ్తున్నారు. ఇటీవలి పబ్లిక్ సర్వీస్ కమిషన్ పేపర్ లీకేజీ ఉదంతం ఆధారంగా ప్రభుత్వాన్ని ఇరకాటంలోని నెట్టే ప్రయత్నం చేస్తున్నాయి. కాంగ్రెస్ పార్టీ జిల్లాల వారీగా నిరుద్యోగ ర్యాలీ, సభలు నిర్వహించనుంది.
ఇప్పటికే పార్టీ ముఖ్యనేతలు పాదయాత్రలు చేస్తుండగా ఇప్పుడు ఆయా జిల్లాల్లో బహిరంగసభలు నిర్వహించనున్నారు. 24, 26, 28, 30 తేదీల్లో వరుసగా ఖమ్మం, ఆదిలాబాద్, నల్గొండ, మహబూబ్నగర్లో సభలు తలపెట్టారు. మే ఒకటో తేదీన రంగారెడ్డి జిల్లాలో తలపెట్టిన భారీ సభకు అగ్రనేత ప్రియాంకాగాంధీని ఆహ్వానిస్తున్నారు.
భారతీయ జనతా పార్టీ మరింత దూకుడుగా వెళ్తోంది. పార్లమెంటరీ ప్రవాస్ యోజన పేరిట పలువురు కేంద్ర మంత్రులు ఇప్పటికే ఆయా నియోజకవర్గాల్లో జరిగే కార్యక్రమాల్లో పాల్గొంటున్నారు. కేంద్రంలోని మోదీ సర్కార్ అమలు చేస్తున్న అభివృద్ధి, సంక్షేమ కార్యక్రమాలను వివరిస్తూనే రాష్ట్రంలో కేసీఆర్ ప్రభుత్వ వైఫల్యాలను ఎండగడుతున్నారు.
బీజేపీకి ఒక్కసారి అధికారం ఇవ్వాలంటూ: వరంగల్లో నిరుద్యోగ మార్చ్ నిర్వహించిన బీజేపీ తదుపరి ఈనెల 25న పాలమూరులో మార్చ్ నిర్వహించనుంది. ప్రవాస్ యోజనలో భాగంగా కేంద్ర హోంమంత్రి అమిత్ షా ఈనెల 23న చేవెళ్లలో జరిగే కార్యక్రమంలో పాల్గొననున్నారు. ఇక నుంచి ప్రతి నెలా ఒక అగ్రనేత రాష్ట్రంలో పర్యటించేలా ప్రణాళికలు రూపొందిస్తున్నారు. బీజేపీకి ఒక్కసారి అధికారం ఇవ్వాలంటూ జనంలోకి వెళ్తున్నారు.
వామపక్ష సీపీఎం, సీపీఐలు కూడా వివిధ కార్యక్రమాల ద్వారా ప్రజల్లోకి వెళ్తున్నాయి. బీజేపీ అమలు చేస్తున్న ప్రజావ్యతిరేక విధానాలను కమ్యూనిస్టులు ఎండగడుతూ ముందుకు సాగుతున్నారు. మునుగోడులో బీఆర్ఎస్తో కలిసి పనిచేసిన వామపక్షాలు.. శాసనసభ ఎన్నికల్లోనూ అదే విధంగా ముందుకు సాగనున్నాయి. ఆచార్య కోదండరాం నేతృత్వంలోని తెలంగాణ జనసమితి సర్కార్ విధానాలపై పోరాడుతోంది. అంశాల వారీగా విపక్ష పార్టీలతో కలిసి ముందుకు సాగుతూ ప్రజాస్వామిక తెలంగాణ నిర్మాణం దిశగా కార్యాచరణ అమలు చేస్తోంది.
రాజకీయ వలసలు: షర్మిల నేతృత్వంలోని వైఎస్సార్ తెలంగాణ పార్టీ, విశ్రాంత ఐపీఎస్ ఆర్ఎస్ ప్రవీణ్ కుమార్ రాష్ట్ర అధ్యక్షుడిగా ఉన్న బీఎస్పీ పార్టీలు. కేసీఆర్ ప్రభుత్వంపై పోరాటాలు చేస్తున్నాయి. సర్కార్ వైఫల్యాలను ఎండగడుతూ ప్రజల్లోకి వెళ్తున్నాయి. అటు ఎన్నికలు సమీపిస్తున్న వేళ నేతల రాజకీయ వలసలు కూడా ఊపందుకోనున్నాయి. అవకాశాల కోసం ఇతర పార్టీల వైపు చూస్తున్నారు. పార్టీలో ఇమడని నేతలను బీఆర్ఎస్ బయటకు పంపుతోంది.
అధికార గులాబీ పార్టీలో తమకు ఇక అవకాశం లేదన్న భావనకు వచ్చిన నేతలు బీజేపీ, కాంగ్రెస్ వైపు చూస్తున్నారు. క్షేత్రస్థాయిలో పరిస్థితులను బేరీజు వేసుకొని రాజకీయ భవిష్యత్ దిశగా నిర్ణయాలు తీసుకునేందుకు సిద్ధమవుతున్నారు. విపక్షాలు సైతం పాలకపక్షంలోని అసంతృప్తులకు గాలం వేసే పనిలో పడ్డాయి. రానున్న రోజుల్లో నేతల పార్టీల మార్పులు, చేర్పులు ఇంకా పెరగనున్నాయి.
కేంద్ర ఎన్నికల సంఘం కూడా ఎన్నికల నిర్వహణ దిశగా ఇప్పటికే సన్నాహకాలను ప్రారంభించింది. రాష్ట్ర కొత్త శాసనసభ 2024 జనవరి 16లోగా ఏర్పడాల్సి ఉంది. 2018లో డిసెంబర్ 7న అసెంబ్లీ ఎన్నికలు జరిగాయి. రాష్ట్రంతో పాటే అప్పుడు ఎన్నికలు జరిగిన మిజోరాం కొత్త శాసనసభ 2023 డిసెంబర్ 17లోగా ఏర్పాటు కావాల్సి ఉంది. ఛత్తీస్గడ్ శాసనసభకు 2024 జనవరి 3, మధ్యప్రదేశ్ అసెంబ్లీకి జనవరి 6, రాజస్థాన్ శాసనసభకు జనవరి 14లోగా ఎన్నికల ప్రక్రియ పూర్తి కావాల్సి ఉంది.
2018లో నవంబర్, డిసెంబర్లో ఈ రాష్ట్రాలకు ఎన్నికలు జరిగాయి. ఇపుడు కూడా మిజోరాం గడువును పరిగణలోకి తీసుకొని ఈసీ ఆలోగా ఐదు రాష్ట్రాల ఎన్నికల ప్రక్రియను పూర్తి చేయనుంది. దీంతో నవంబర్ రెండో వారం నుంచి డిసెంబర్ వరకు తుదిగడువుగా పెట్టుకుని అధికారులు ఎన్నికల కసరత్తు ప్రారంభించారు.
ఇవీ చదవండి:
'కేసీఆర్కు గజ్వేల్ నుంచే పోటీ చేయాలని చెబుతా'
'మునుగోడు ఎన్నికల్లో బీఆర్ఎస్ నుంచి రేవంత్ డబ్బు తీసుకున్నారు'
