Funding for metro rail in Telangana budget: 2023-24 తెలంగాణ బడ్జెట్లో ఈసారి వైద్య, ఆరోగ్యశాఖ, సంక్షేమానికి పెద్దపీట వేసిన సర్కారు.. ఐటీ రంగంతో పాటుగా.. మెట్రో రైలు అభివృద్దికి భారీగా నిధులు మంజూరు చేసింది. ఈసారి మెత్తం బడ్జెట్లో మెట్రో రైలు కోసం రూ.1500కోట్లు కేటాయించిన ప్రభుత్వం.. అందులో పాతబస్తీలో ట్రాక్ నిర్మాణం, వసతుల కోసం రూ.500 కోట్లు కేటాయించింది.
Allocations in the budget for infrastructure development: రాజధాని నగరంలో మౌలిక వసతులను మెరుగు పరచడానికి ప్రభుత్వం పెద్ద ఎత్తున కార్యక్రమాలు చేపట్టిందని హరీశ్ రావు పేర్కొన్నారు. హైదరాబాద్లో ట్రాఫిక్ సమస్యలను తగ్గించడం కోసం ఎస్సార్డీపీ కింద 42 కీలక రహదారులు, ఫ్లై ఓవర్లు, అండర్పాస్లు, ఆర్వోబీల అభివృద్ధి కార్యక్రమాలు చేపట్టినట్లు తెలిపారు. అందులో 31 పూర్తి చేయటం జరిగిందని.. మిగతా 11 ఈ ఆర్థిక సంవత్సరంలో పూర్తిచేస్తామని మంత్రి శాసనసభలో ప్రకటించారు.
ఇప్పటికే రూ.275 కోట్లతో 22 లింక్ రోడ్ల నిర్మాణాన్ని ప్రభుత్వం పూర్తి చేసిందని తెలిపిన మంత్రి హరీశ్రావు.. దీనివల్ల ప్రయాణ దూరం, ట్రాఫిక్ సమస్యలతో పాటు కాలుష్యం తగ్గిందని హర్షం వ్యక్తం చేశారు. రూ. 76.65 కోట్లతో చేపట్టిన 22 ఫుట్ ఓవర్ బ్రిడ్జిలలో 9 వంతెనలు పూర్తయ్యాయని.. మిగతా వాటి పనులు వేగంగా జరుగుతున్నాయని ప్రకటించారు.
విమానాశ్రయానికి మెట్రో కనెక్టివిటీ: శంషాబాద్ అంతర్జాతీయ విమానాశ్రయంలో ప్రయాణికుల సంఖ్య రోజురోజుకూ పెరుగుతోందని తెలిపిన మంత్రి.. విమానాశ్రయంలో సంవత్సరానికి 4 కోట్ల మంది ప్రయాణం చేసినా సరిపడే విధంగా విమానాశ్రయ విస్తరణ పనులు రూ.7500 కోట్లతో జరుగుతున్నాయని సభలో పేర్కొన్నారు. ఈ కార్యక్రమం ఈ ఏడాది జూన్ లోపల పూర్తై, ప్రయాణికులకు అందుబాటులోకి వస్తోందని ఆశాభావం వ్యక్తం చేశారు.
రోజురోజుకూ పెరుగుతున్న విమాన ప్రయాణికుల రవాణా సౌకర్యం కోసం హైదరాబాద్ నలుమూలల నుంచి విమానాశ్రయానికి తొందరగా చేరుకోవడానికి మెట్రో రైలును ఎయిర్ పోర్ట్కు అనుసంధానం చేస్తూ ‘ఎయిర్ పోర్టు మెట్రో’కు ప్రభుత్వం రూపకల్పన చేసిందని పేర్కొన్నారు. ఈ మెట్రో మార్గం రాయదుర్గం మెట్రో స్టేషన్ నుంచి మొదలై శంషాబాద్ విమానాశ్రయం వరకు 31 కిలోమీటర్ల మేర విస్తరణ పనులు చేపడుతున్నట్లు మంత్రి హరీశ్రావు తెలిపారు.
ఇటీవలే ఈ పథకానికి సీఎం కేసీఆర్ శంకుస్థాపన చేయడం చేశారని గుర్తుచేశారు. మొత్తం రూ. 6250 కోట్ల వ్యయంతో చేపట్టే ఈ ప్రాజెక్టు రాష్ట్ర ప్రభుత్వం తన సొంత నిధులతో వచ్చే మూడు సంవత్సరాల్లోనే పూర్తి చేయనున్నట్లు ఆయన ప్రకటించారు.
ఇవీ చదవండి:
