జాతీయ, అంతర్జాతీయ స్థాయిలో పాల్గొనే క్రీడాకారులకు రాష్ట్ర ప్రభుత్వం అన్ని విధాలుగా అండగా ఉంటుందని సికింద్రాబాద్ పార్లమెంట్ నియోజకవర్గ తెరాస పార్టీ ఇంఛార్జి తలసాని సాయి కిరణ్ యాదవ్ పేర్కొన్నారు. సికింద్రాబాద్కు చెందిన టెన్నిస్ క్రీడాకారిణి రహీనా తారానంను ఆయన మర్యాదపూర్వకంగా కలిసి అభినందించారు. జాతీయస్థాయి పోటీల్లో సింగిల్స్, డబుల్స్ విభాగాల్లో ప్రథమ స్థానం సాధించిన సందర్భంగా.. తన ప్రతిభతో హైదరాబాద్ నగరానికే కాకుండా రాష్ట్రానికి గుర్తింపు వచ్చిందని ఆయన ప్రశంసించారు.
ఈ నెల 13 నుంచి 19 వరకు మేడ్చల్ జిల్లా సైనిక్పురిలో ఆల్ ఇండియా టెన్నిస్ అకాడమీ (ఏఐటీఏ) ఆధ్వర్యంలో అండర్-18 జాతీయ స్థాయి టెన్నిస్ పోటీలు జరగనున్నాయి. వచ్చే నెలలో గుజరాత్లోని అహ్మదాబాద్, తమిళనాడు రాష్ట్రంలోని మధుర, ఆంద్రప్రదేశ్లోని విశాఖపట్నంలలో నిర్వహించే అంతర్జాతీయ పోటీలకు హాజరయ్యేందుకు సహకరించాలని రహీనా సాయికిరణ్ను కోరింది. అన్ని విధాల సహాయ సహకారాలను అందిస్తానని సాయి కిరణ్ హామీ ఇచ్చారు. అంతర్జాతీయ స్థాయి పోటీల్లో కూడా అగ్రస్థానంలో నిలవాలని, రాష్ట్రానికి తగిన గుర్తింపు తీసుకురావాలని ఆయన ఆకాక్షించారు.
ఇదీ చూడండి: 75 మంది విద్యార్థులు, సిబ్బందికి కరోనా పాజిటివ్
