TTD Arrangements For Vaikunta dwara Darshan : తిరుమల శ్రీవారి ఆలయంలో పది రోజుల పాటు సాగనున్న వైకుంఠ ద్వార దర్శనానికి తిరుమల తిరుపతి దేవస్థానం(టీటీడీ) విస్తృత ఏర్పాట్లను చేస్తోంది. జనవరి 10 నుంచి 19 వరకు 10 రోజుల పాటు రోజుకు దాదాపు 70,000 పైగా భక్తులకు వైకుంఠ ద్వార దర్శనం కల్పించేలా టీటీడీ అధికారులు చర్యలు చేపట్టారు. 300 రూపాయల స్పెషల్ ప్రవేశ దర్శనం టికెట్లను ఇప్పటికే ఆన్లైన్లో విడుదల చేసిన తిరుమల తిరుపతి దేవస్థానం రోజుకు 40 వేల టికెట్ల చొప్పున 10 రోజులకు 4 లక్షల సర్వదర్శన టోకెన్లను తిరుపతిలో 8, తిరుమలలో ఒక కేంద్రం ద్వారా టికెట్లను జారీ చేయడానికి ఏర్పాట్లు చేస్తోంది.
ఈ దర్శన టికెట్లు ఉన్నవారిని మాత్రమే క్యూలైన్లలోకి అనుమతించి దర్శనాలు కల్పించేలా టీటీడీ అధికారులు ప్రణాళిక చేపట్టారు. ఏకాదశి మొదలు 10 రోజుల పాటు వైకుంఠ ద్వార దర్శన ఏర్పాట్లకు తిరుమల తిరుపతి దేవస్థానం పలు చర్యలు తీసుకుంటున్నామని టీటీడీ ఈవో శ్యామలరావు, అదనపు ఈవో వెంకన్న చౌదరి వెల్లడించారు.
వైకుంఠ ద్వార దర్శన ముఖ్యమైన నిర్ణయాలు:
- వైకుంఠ ద్వార దర్శనాలకు సంబంధించిన పది రోజుల శ్రీవాణి టికెట్లను అధికారులు ఆన్లైన్లో విడుదల చేశారు
- వైకుంఠ ద్వార దర్శనాలకు సంబంధించి 10 రోజుల ఎస్‌ఈడీ (స్పెషల్ ఎంట్రీ దర్శన్) టోకెన్లు ఆన్లైన్లో విడుదల చేశారు.
- 2024 జనవరి 10వ తేదీ నుంచి 19వ తేదీ వరకు 10 రోజులకు వైకుంఠ ద్వార దర్శనాలకు సంబంధించి తిరుపతిలో ఎనిమిది సెంటర్లు, తిరుమలలో ఒక కేంద్రంలో సర్వదర్శనం టోకెన్లను జారీ చేస్తారు.
- తిరుపతిలోని జీవకోన, రామానాయుడు స్కూల్‌, ఎంఆర్‌ పల్లి, ఇందిరా స్టేడియం, రామచంద్ర పుష్కరిణి, శ్రీనివాసం, విష్ణు నివాసం, భూదేవి కాంప్లెక్స్‌, తిరుమలలోని కౌస్తుభం విశ్రాంతి భవనంలో టోకెన్లను జారీ చేయనున్నారు.
- టోకెన్లు ఇచ్చేటువంటి కేంద్రాల వద్ద శ్రీవారి భక్తులకు అవసరమైన సౌకర్యాలను ఏర్పాటు చేయాలని టీటీడీ అధికారులు నిర్ణయించారు.
- వైకుంఠ ద్వార దర్శన రోజుల్లో టోకెన్లు, టికెట్లు ఉన్న భక్తులను మాత్రమే దర్శనాలకు అనుమతిస్తారు. టికెట్లు లేని భక్తులను క్యూలైన్లలోకి అనుమతించబోమని వివరించారు.
- వైకుంఠ ఏకాదశి పర్వదినం రోజున ఉదయం 4.45 గంటలకు ప్రొటోకాల్‌ దర్శనాలు ప్రారంభమవుతాయి.
- వైకుంఠ ఏకాదశి రోజు భక్తుల అధిక రద్దీ కారణంగా ఆలయంలో వేదాశీర్వచనం రద్దు చేస్తూ నిర్ణయం తీసుకున్నారు.
- వైకుంఠ ఏకాదశి రోజున ఉదయం తొమ్మిది గంటల నుంచి 11 గంటల వరకు స్వర్ణరథం కార్యక్రమం జరగుతుంది.
- ఆ రోజు ఉదయం 5.30 గంటల నుంచి 6.30 వరకు శ్రీవారి పుష్కరిణిలో చక్రస్నానం
- తిరుమల వచ్చే గోవిందమాల భక్తులకు ఎలాంటి స్పెషల్ దర్శన సదుపాయం ఉండదని అధికారులు తెలిపారు.
వైకుంఠ ఏకాదశి రోజున తిరుమల తిరుపతి దేవస్థానం భద్రతా సిబ్బంది సమన్వయంతో తిరుమలలో ట్రాఫిక్ నియంత్రణకు చర్యలు తీసుకోవాలని పోలీసులకు అధికారులు సూచించారు.
ఉదయం 6 గంటల నుంచి రాత్రి 12 గం.ల వరకు నిరంతరాయంగా అన్న ప్రసాదాలను పంపిణీ చేయాలని దేవస్థానం అధికారులు నిర్ణయించారు.
లడ్డూ ప్రసాదం కోసం భక్తులకు ఇబ్బంది తలెత్తకుండా ఉండేందుకు ప్రతిరోజూ అందుబాటులో మూడున్నర లక్షల లడ్డూలను అందుబాటులో ఉంచనున్నారు. అదనంగా మరో 3.50 లక్షల ప్రసాద లడ్డూలను బఫర్ స్టాక్ ఉంచుకోవాలని సిబ్బందికి సూచించారు.
శ్రీవారి భక్తులకు అలర్ట్ - వైకుంఠ ఏకాదశి టికెట్ల జారీ తేదీ వచ్చేసింది
తిరుమలలో వైకుంఠ ఏకాదశికి విస్తృత ఏర్పాట్లు - టీటీడీ కీలక నిర్ణయాలు ఇవే
