"డాడీ మీ డబ్బులు వృథా చేశాను.. నేను క్రికెట్ బెట్టింగ్ కావాలని ఆడలేదు.. నన్ను క్షమించండి.. రాజశేఖర్ టార్చర్ తట్టకోలేకపోతున్న... నేను అందరిని వదిలి పోతున్న.. అమ్మను జాగ్రత్తగా చూసుకోండి. శ్రావణి అక్క అల్లుడు జాగ్రత్త.. ఐ లవ్ యూ నాన్న.. ఐ లవ్ యూ అక్క." ఇది క్రికెట్ బెట్టింగ్లో డబ్బులు పోగొట్టుకుని ప్రాణాలు విడిచిన ఓ విద్యార్థి సూసైడ్ నోట్ సందేశం.
హైదరాబాద్ బోరబండలోని హఫీజ్ ఫాతిమానగర్లో విష్ణుమూర్తి దంపతులు నివాసం ఉంటున్నారు. వీరికి డిగ్రీ చదివే కుమారుడు రవి కుమార్ ఉన్నాడు. స్థానికంగా పెయింటర్గా పనిచేస్తున్న రాజశేఖర్ అనే యవకుడితో రవికి పరిచయం ఏర్పడింది. ఐపీఎల్తో పాటు పలు క్రికెట్ మ్యాచ్ల సమయంలో అతడితో కలిసి రవి బెట్టింగ్లో పాల్గొనేవాడు. అలా 80 వేల రూపాయలు దాకా రాజశేఖర్కి అప్పుపడ్డాడు. వాటిని చెల్లించాలని తరచూ రవిని వేధించడం మొదలు పెట్టాడు.
యాక్సిడెంట్ చేశానని అబద్ధం
ఏం చేయాలో తెలియక... తానో యాక్సిడెంట్ చేశానని అందుకు రూ.40 వేలు కట్టాలంటూ తండ్రికి చెప్పాడు. ఇది నమ్మిన తండ్రి తన సొంత ఊరిలోని ఇల్లు అమ్మి రవికి డబ్బు ఇచ్చాడు. మరో 40 వేలు ఇవ్వాలంటూ రవికి వేధింపులు మొదలయ్యాయి. విషయం తండ్రికి తెలియడం వల్ల డబ్బు తాను కడతానని..తన కొడుకుని ఇబ్బంది పెట్టొదని రాజశేఖర్ను తండ్రి విష్ణుమూర్తి వేడుకున్నాడు.
వేధింపులు
రాజశేఖర్ వేధింపులు ఎక్కువ అవడం, తన తండ్రిని ఇబ్బంది పెడుతున్నానని తీవ్ర మనోవేదనకు గురైన రవి ఈనెల 3న ఇంట్లో ఎవరు లేని సమయంలో బలన్మరణానికి పాల్పడ్డాడు. రాజశేఖర్ బలవంతంగా తాను వద్దు అన్నా బెట్టింగ్లోకి దింపి డబ్బులు కోసం వేధిస్తున్నట్లు సూసైడ్ నోట్లో రాసుకున్నాడు. ఘటన జరిగిన వెంటనే పోలీసులకు తండ్రి ఫిర్యాదు చేశాడు. అక్కడికి చేరుకున్న పోలీసులు సూసైడ్ నోట్ స్వాధీనం చేసుకుని... అనుమానాస్పద మృతిగా కేసు నమోదు చేశారు. రాజశేఖర్ కోసం గాలింపు చేపట్టారు. అల్లారు ముద్దుగా పెంచుకున్న కొడుకు విగత జీవిలా పడి ఉండటంతో కన్నీరు మున్నీరవుతున్న తల్లిదండ్రులు మరెవరూ క్రికెట్ బెట్టింగ్లకు పాల్పడవద్దని కోరుతున్నారు.
ఇదీ చూడండి: ఆర్టికల్ 370 రద్దుపై అత్యవసర విచారణకు నో
