కరోనా మహమ్మారి బారినపడకుండా జర్నలిస్టులు తగిన జాగ్రత్తలు పాటించాలని తెలంగాణ రాష్ట్ర మీడియా అకాడమీ ఛైర్మన్ అల్లం నారాయణ విజ్ఞప్తి చేశారు. జర్నలిస్టులు సమాజహితం కోసం పనిచేయాలంటే ముందుగా ప్రాణాలతో ఉండాలన్నారు. ప్రాణం కన్నా విలువైంది ఏదీ లేదన్నారు. జర్నలిస్టులు భౌతిక దూరం పాటిస్తూ... శానిటైజర్లు ఉపయోగించాలని సూచించారు. బయటకు వచ్చేటప్పుడు తప్పనిసరిగా మాస్కులు ధరించాలని సూచించారు.
కుటుంబీకులే ముందు...
సమాజం కన్నా ముందు మనపై ఆధారపడిన కుటుంబీకుల బాగోగులను జర్నలిస్టులు గుర్తించాలన్నారు. శనివారం దిల్లీలో కరోనా బారిన పడిన జర్నలిస్టుల కుటుంబానికి అండగా ఉంటామని స్పష్టం చేశారు. ఈ మేరకు వారితో ఫోన్లో మాట్లాడారు. బాధిత కుటుంబాలకు నిత్యావసరాలు, ఖర్చుల నిమిత్తం వెంటనే 20 వేల రూపాయలు బ్యాంకు ఖాతాలో జమ చేస్తున్నట్లు వివరించారు. గద్వాల, మహబూబ్ నగర్ జిల్లాల్లోని క్వారంటైన్లో ఉన్న జర్నలిస్టులకు కూడా 10 వేల రూపాయలను బ్యాంకు ఖాతాలో జమ చేస్తున్నట్లు వెల్లడించారు.
