ఇల్లే వైద్యశాల.. కరోనా ఓడిందిలా.. అదేంటో మీరూ చూడండి!

ఇంట్లో ఒకరికి కరోనా వస్తేనే తల్లడిల్లే పరిస్థితులు. అలాంటిది కుటుంబమంతటికీ వైరస్‌ సోకితే? అందులోనూ అప్పటికే ఒకరు కిడ్నీ, మరొకరు మధుమేహ వ్యాధిగ్రస్తులై ఉంటే?.. ఆందోళన కలగకమానదు. తామైతే దిగులేమీ చెందలేదని.. ఆహారం, అలవాట్లలో మార్పులు, వైద్యుల సూచనలతో బయటపడ్డామని చెబుతోంది హైదరాబాద్​ ఆనంద్‌నగర్‌కు చెందిన ఓ కుటుంబం.

పదిరోజుల్లోనే స్వస్థత

నాలుగేళ్ల నుంచి తీవ్రమైన కిడ్నీ సమస్య(సీకేడీ)తో బాధపడుతున్నాను. తరచూ నిమ్స్‌కు వెళ్తుంటాను. ఓ రోజు కరోనా పరీక్షలు చేయించుకుంటే పాజిటివ్‌ తేలింది. వైరస్‌ తీవ్రత తక్కువే ఉండటంతో నెఫ్రాలజీ వైద్యుల సూచన మేరకు ఇంటికే పరిమితమయ్యాను. మా కుటుంబంలో మిగతా నలుగురికీ పాజిటివ్‌ వచ్చింది. ఇంట్లోనే ఉండాలని నిర్ణయించుకున్నాం. వైద్యులు భరోసా ఇచ్చారు. రోజూ ఉడకబెట్టిన కోడిగుడ్లు.. ఉదయాన్నే అల్లం, పసుపు, మిరియాలను నీళ్లలో వేసి మరిగించిన కషాయం తీసుకునేవారం. తరచూ నిమ్మరసం సరేసరి. విటమిన్‌ ‘సి’ మాత్రలు వాడాం. రోజూ మూడుసార్లు ఆవిరి పట్టేవారం. కంటినిండా నిద్రపోయాం. నేనైతే పదిరోజుల్లోనే పూర్తిగా కోలుకున్నాను.

- కరోనా బాధితురాలు(58)

అమ్మానాన్నల కోసమే ఆందోళన

మంచి ఆహారం, సరైన అలవాట్లు, వైద్యుల పర్యవేక్షణ ఉంటే కరోనా నుంచి సులువుగా కోలుకోవచ్ఛు మా విషయంలో అదే జరిగింది. కాకపోతే అమ్మ, నాన్న దీర్ఘకాల వ్యాధిగ్రస్తులు. కరోనా రావడంతో వారు తట్టుకోగలరో లేదోననే ఆందోళన ఉండేది. లక్షణాలేం తీవ్రంగా లేకపోవడంతో ఏ ఆసుపత్రీ అక్కర్లేదని వైద్యులు చెప్పారు. ఏ మందులు వాడాలి, ఏం తినాలో తెలపడంతో త్వరగానే కోలుకున్నాం. చనిపోతామనే ఆలోచన నుంచి బయటికి రావాలి.

- యువతి(21)