Special Passport Drive in Hyderabad: ఏప్రిల్‌ 29 నుంచి హైదరాబాద్లో స్పెషల్‌ పాస్పోర్టు డ్రైవ్‌ను నిర్వహించనున్నట్లు విదేశీ వ్యవహారాల మంత్రిత్వ శాఖలోని పాస్పోర్ట్ సేవా కార్యక్రమం విభాగం ప్రకటించింది. భాగ్యనగరంతో పాటు కరీంనగర్‌, నిజామాబాద్‌లలో కూడా ఈ స్పెషల్‌ డ్రైవ్‌ను ఏర్పాటు చేయనున్నట్లు తెలిపింది. ఈ మేరకు ఈనెల 29 నుంచి నిర్వహించనున్న స్పెషల్‌ డ్రైవ్‌కు సంబంధించి అపాయింట్మెంట్లు గురువారం 27వ తేది నుంచి విడుదల చేయనున్నట్లు పేర్కొంది.
ఆ పాస్పోర్ట్లు ఉన్నవారికి మొదటి ప్రాధాన్యత: అపాయింట్మెంట్లు దొరకక పెండింగ్‌లో ఉన్న పాస్పోర్ట్లకు ఈ నెల 29 నుంచి స్లాట్‌ బుకింగ్‌లకు ఏర్పాటు చేస్తున్నట్లు పాస్పోర్ట్ సేవా కార్యక్రమం విభాగం తెలిపింది. తత్కాల్‌, నార్మల్‌, పీసీసీ పాస్పోర్ట్లకు స్పెషల్‌ డ్రైవ్‌లో మెుదటి ప్రాధాన్యత ఇవ్వనున్నట్లు స్పష్టం చేసింది. తత్కాల్‌, సాధారణ... అన్ని కేటగిరిలలో ఉన్న 3 వేల 56 అపాయింట్మెంట్లకు సంబంధించి స్లాట్‌ బుక్‌ చేసుకునేందుకు www.passportindia.gov.in వెబ్‌సైట్ను సంప్రదించవచ్చని ప్రకటించింది. ఏప్రిల్‌ 29 నుంచి నగరంలో చేపట్టనున్నస్పెషల్‌ పాస్పోర్ట్ డ్రైవ్ కోసం పాస్పోర్ట్ సేవా కార్యక్రమం విభాగం తగిన ఏర్పాట్లను చేస్తుంది.
పాస్పోర్ట్ జాబితాను విడుదల చేసిన హెన్లీ పాస్పోర్ట్ ఇండెక్స్‌ సంస్థ: మీరు ప్రపంచయాత్ర చేయాలని అనుకుంటున్నారా? వీసా అనుమతుల కోసం వేచి చూడాల్సిన అవసరంలేదు. మీకు భారత్ పాస్పోర్ట్ ఉంటే చాలు. ప్రపంచంలోని 59 దేశాల్లో వీసా లేకుండా లేదా వీసా ఆన్‌ అరైవల్‌తో పర్యటించవచ్చు. ఈ మేరకు హెన్లీ పాస్పోర్ట్ ఇండెక్స్‌ అనే సంస్థ 2023లో ప్రపంచంలోనే శక్తివంతమైన పాస్పోర్ట్ జాబితాను విడుదల చేసింది. అంతర్జాతీయ విమానయాన రవాణా సంఘం నుంచి సేకరించిన డేటా ఆధారంగా హెన్లీ సంస్థ 199 దేశాలతో కూడిన జాబితాను ప్రకటించింది.
ఆ జాబితాలో 85వ స్థానంలో భారత్: ఈ జాబితాలో భారత్ 85వ స్థానంలో నిలిచింది. గతేడాది ఈ ర్యాంకింగ్స్‌లో భారత్ 83వ స్థానంలో ఉండటం గమనార్హం. 2022లో 60 దేశాల్లో పర్యటించేందుకు వీలుండగా, ఈ ఏడాది 59 దేశాలు మాత్రమే అనుమతిస్తున్నాయి. గతేడాది భారత్ పాస్పోర్ట్ ఉన్నవారి వీసా లేకుండా పర్యటించేందుకు అనుమతించిన సెర్బియా, ఈ ఏడాది ఆ నిబంధనను తొలగించింది. హోన్లీ పాస్పోర్ట్ ఇండెక్స్‌ నివేదిక ప్రకారం 2006లో భారత్ 71వ స్థానంలో ఉండగా, 2023 నాటికి 85వ స్థానంలో ఉండటం గమనార్హం.
ఇవీ చదవండి:
