ఒంటరిగా ప్రయాణించే మహిళల భద్రత కోసం దక్షిణ మధ్య రైల్వే జోన్... మేరీ సహేలీ పేరిట ప్రత్యేక చర్యలు చేపట్టింది. దక్షిణ మధ్య రైల్వే పరిధిలో ప్రయాణించే 8 ప్రధాన రైళ్లను గుర్తించి మహిళా ప్రయాణికులను భద్రతారీత్యా చైతన్యవంతం చేసేందుకు ఈ కార్యక్రమాన్ని తెచ్చినట్లు... రైల్వేశాఖ తెలిపింది. ప్రయాణం ప్రారంభమయ్యే స్టేషన్ల వద్ద సబ్ ఇన్స్పెక్టర్లు, సిబ్బందితో కూడిన మహిళా రైల్వే భద్రతా దళం మహిళా ప్రయాణికులతో మాట్లాడతారు.
ప్రయాణ సమయంలో మహిళలు తీసుకోవాల్సిన అన్ని జాగ్రత్తలు తెలపడం సహా అత్యవసర సమయాల్లో 182 నంబర్కు ఫోన్ చేయాల్సిందిగా సూచిస్తారు. ఇందులో భాగంగా ఆర్పీఎఫ్ సిబ్బంది... మహిళలు ప్రయాణించే సీట్ల నంబర్లను సేకరించి మార్గమధ్యలో రైలు ఆగే స్టేషన్ల గురించి వారికి సమాచారమిస్తారు. మహిళలు ప్రయాణిస్తున్న బోగీలు, బెర్త్‌లపై ఆర్పీఎఫ్ సిబ్బంది దృష్టి కేంద్రీకరించడం సహా అవసరం అనుకుంటే మహిళలతో మాట్లాడతారు. వారికి అవసరమైన సలహాలు, సూచనలు ఇస్తారు.
గోల్కొండ ఎక్స్ప్రెస్, గోదావరి ఎక్స్ప్రెస్, రాయలసీమ ఎక్స్ప్రెస్, సచ్ఖండ్ ఎక్స్ప్రెస్, నందిగామ్ ఎక్స్ప్రెస్, అమరావతి ఎక్స్ప్రెస్, మైసూరు ఎక్స్ప్రెస్ రైళ్లలో ప్రస్తుతానికి ఈ చర్యలు తీసుకున్నారు.
ఇదీ చూడండి: చెరుకు బిల్లు బకాయిలు చెల్లించాలంటూ రైతుల నిరాహార దీక్ష
