RS PRAVEEN KUMAR: 'భవిష్యత్తు తరాల అభివృద్ధే లక్ష్యంగా నా కార్యాచరణ'

పేద ప్రజలకు మరింత సేవ చేయాలనే ఉద్దేశంతోనే ఐపీఎస్​ పదవికి స్వచ్ఛంద విరమణ దరఖాస్తు చేసుకున్నట్లు గురుకులాల కార్యదర్శి ఆర్.ఎస్.ప్రవీణ్​కుమార్​ తెలిపారు. సూర్యుడు పడమర నుంచి ఉదయిస్తాడనేది ఎంతో తప్పో.. తాను రాజకీయాల్లోకి వస్తున్నట్లు జరుగుతున్న ప్రచారం అంతే తప్పని స్పష్టం చేశారు. భవిష్యత్తు తరాల అభివృద్ధే లక్ష్యంగా తన కార్యాచరణ ఉంటుందంటున్న ఆర్.ఎస్.ప్రవీణ్​కుమార్​తో మా ప్రతినిథి ముఖాముఖి..

• మీకు మరో ఆరేళ్ల సర్వీస్​ ఉన్నా.. స్వచ్ఛందంగా పదవీ విరమణ చేశారు. ఎందుకు?

పేద ప్రజలకు మరింత చేరువ కావాలనే ఉద్దేశంతోనే పదవీ విరమణకు దరఖాస్తు చేసుకున్నాను. ఈ విశాలమైన ప్రపంచంలో పేదల కోసం, వారి కుటుంబాల కోసం, భవిష్యత్​ తరాల కోసం మరింత గొప్పగా పని చేయాలనుకుంటున్నాను. అందుకే ఐపీఎస్​ పదవిని వదిలేస్తే.. ఇంకా ఏదైనా గొప్ప భూమిక లభిస్తే అక్కడ చేద్దామని అనుకుంటున్నా.

• గురుకులాల కార్యదర్శిగా ఇప్పటికే పేద పిల్లలకు అండగా ఉంటున్నారు. ఆ దిశగా సాగుతున్న క్రమంలో ఒక్కసారిగా ఈ ప్రకటనను ఏ విధంగా చూడొచ్చు?

గురుకులాల విద్యార్థులు ఎక్కడికెళ్లినా నిలదొక్కుకోగలుగుతారు. వారికి ఒక ఐడియాలజీ ఇచ్చాము. ఆ ఐడియాలజీతో పిల్లలందరూ గొప్పగా చదువుకుంటారనే నమ్మకంతోనే బయటికి వచ్చాను. ఇలా బయటకు వచ్చింది నా సొంత పనులు చేసుకునేందుకు కాదు.. విద్యార్థుల గొప్ప కలలను నిజం చేయడానికి వచ్చాను.

• ప్రవీణ్​కుమార్​ రాష్ట్ర రాజకీయాల్లోకి వస్తున్నారంటూ పెద్దఎత్తున ప్రచారం జరుగుతోంది. ఇందులో ఎంతవరకు నిజముంది?

సూర్యుడు పడమర నుంచి ఉదయిస్తాడని చెప్పడం ఎంత తప్పో.. ఇది కూడా అంతే తప్పు.

• భవిష్యత్​ కార్యాచరణ ఏ విధంగా ఉండబోతుంది?

ముందుగా నా వ్యక్తిగత పనులు కొన్ని చాలా రోజులుగా పెండింగ్​లో ఉన్నాయి. వాటిని చక్కబెట్టుకోవాలి. తర్వాత ప్రజలకు మరింత గొప్పగా ఏ విధంగా సేవ చేయాలని నాకు కొన్ని ఆలోచనలు ఉన్నాయి. నా ఆలోచనలను నిజం చేయడానికి సహకరించే అందరు వ్యక్తులతో నేను కలుస్తాను. వారందరి సలహాలు, సూచనలు తీసుకుని ముందుకు సాగుతాను.

స్వచ్ఛందంగా రాజీనామా..

26 సంవత్సరాలు ఐపీఎస్​ అధికారిగా మాతృభూమికి సేవలు అందించిన ప్రవీణ్‌కుమార్‌ (IPS Officer Praveen Kumar)​ తన పదవికి స్వచ్ఛందంగా రాజీనామా (Voluntary Retirement) చేశారు. ఇంకా ఆరు సంవత్సరాల సర్వీస్​ ఉన్నప్పటికీ... వ్యక్తిగత కారణాలతో ఈ నిర్ణయం తీసుకున్నట్లు ట్విట్టర్ (TWITTER)​ ద్వారా తెలిపారు. ఈ మేరకు తన నిర్ణయాన్ని ప్రభుత్వ కార్యదర్శికి ఈ మెయిల్​ చేసినట్లు వెల్లడించారు.

పోలీసు అధికారిగా సేవలు అందించి... ప్రవీణ్‌కుమార్‌ గుర్తింపు తెచ్చుకున్నారు. పేదలకు నాణ్యమైన చదువు అందాలని భావించి, సాంఘిక సంక్షేమ శాఖ బాధ్యతలు చేపట్టారు. ప్రభుత్వం కూడా ప్రత్యేకంగా భావించి ఆయన్ను ప్రోత్సహించడంతో.. సాంఘిక సంక్షేమ వసతి గృహాల్లో సమూల మార్పులు చేశారు.

సర్వీస్​లో ఉన్నంతకాలం ప్రజలకు సేవ చేసేలా ప్రోత్సాహించిన... అప్పటి ఆంధ్రప్రదేశ్​ ప్రభుత్వానికి.. ఇప్పటి తెరాస ప్రభుత్వానికి కృతజ్ఞతలు తెలిపారు. పదవీ విరమణ అనంతరం తన శేషజీవితాన్ని మహనీయులు మహాత్మజ్యోతిరావు పూలే దంపతులు, డాక్టర్ బీఆర్​ అంబేడ్కర్​ చూపిన మార్గంలో పయనిస్తానని స్పష్టం చేశారు. పేదలకు అండగా ఉండి... భావి తరాలను కొత్త ప్రపంచంలోకి నడిపించే దిశగా ప్రయత్నిస్తానని పేర్కొన్నారు.