తమను విడిచి కానరాని లోకాలకు వెళ్లిన తండ్రి జ్ఞాపకార్థం ఓ గుడిని నిర్మించాడు తనయుడు. అందులో తండ్రి విగ్రహాన్ని ఏర్పాటు చేసి నిత్య పూజలు చేస్తున్నాడు. ఆంధ్రప్రదేశ్ విశాఖలోని ఎంవీపీ కాలనీ మత్స్యకారవాడకు చెందిన వాసుపల్లి దాసు ఏఆర్ కానిస్టేబుల్గా పని చేస్తున్నాడు. ఆయన తండ్రి వాసుపల్లి దేముడు ఈ ఏడాది జులైలో గుండెపోటుతో ఇంటి ముందే కన్నుమూశారు. అదే ప్రదేశంలో తన తండ్రికి గుడి కట్టించాడు దాసు. తన తోడబుట్టినవాళ్లు కూడా గుడి నిర్మాణానికి ప్రోత్సహించారని ఆయన వెల్లడించారు.
తన తండ్రి ఏడుగురు సంతానాన్ని కష్టపడి పెంచి పెద్ద చేసి ప్రయోజకులుగా మార్చారని దాసు వివరించారు. తమ అభ్యున్నతి కోసం శ్రమించిన తండ్రిని నిరంతరం తలచుకోవడానికి ఈ గుడి ఉపకరిస్తోందని చెప్పారు.
తల్లిదండ్రులను వృద్ధాప్యంలో కనీసం పట్టించుకోని మనుషులు ఉన్న ఈ కాలంలో... చనిపోయిన తండ్రికి గుడి కట్టి పూజలు చేస్తున్న దాసును స్థానికులు కొనియాడుతున్నారు.
ఇదీ చదవండి: 'బాలలు పొరపాట్లు సరిదిద్దుకొని మంచి మార్గంలో నడవాలి'
