నెల రోజులుగా ప్రగతి చక్రం తిరగట్లేదు. దీని ప్రభావం రాష్ట్ర వ్యాప్తంగా సామాన్య ప్రజలపైనా పడింది. గ్రేటర్‌ హైదరాబాద్‌ పరిధిలోని ప్రజలను ఆ సమస్య మరింత తీవ్రంగా వెంటాడుతోంది. బస్సుల కోసం విద్యార్థులు, ఉద్యోగులు నానాపాట్లు పడుతున్నారు. కళాశాలలకు, కార్యాలయాలకు వెళ్లేందుకు బస్సులు లేక ప్రైవేట్‌ వాహనాలను ఆశ్రయిస్తున్నారు. గత నెల 5న ప్రారంభమైన ఆర్టీసీ సమ్మె నేటికి 36వ రోజుకు చేరుకుంది. అప్పటినుంచి బస్సులు లేక, ప్రైవేటు వాహనాల దోపిడీ తట్టుకోలేక సామాన్యులు పడుతున్న అవస్థలు అన్నీ ఇన్నీ కావు.
పాసులున్నా.. డబ్బులే తీసుకుంటున్నారు..
పాస్‌లు ఉన్నా కొంతమంది కండక్టర్లు డబ్బులు వసూలు చేస్తున్నారని ప్రయాణికులు ఆవేదన వ్యక్తం చేస్తున్నారు. రోజూ వందల రూపాయలు ఖర్చు పెట్టుకుని ప్రయాణించాల్సి వస్తోందని వాపోతున్నారు. ప్రభుత్వం 90 శాతం బస్సులు నడుపుతున్నామని చెబుతున్నా... వాస్తవ పరిస్థితులు అందుకు భిన్నంగా ఉన్నాయంటున్నారు.
మహిళల బాధ వర్ణనాతీతం..
బస్సులు లేక మహిళా ప్రయాణికుల అవస్థలు వర్ణనాతీతంగా మారాయి. కార్మికులు, ప్రభుత్వ మొండి వైఖరి మధ్య నలిగిపోతున్నామని ఆవేదన చెందుతున్నారు. రాత్రి ఏడు దాటితే బస్సుల జాడలేక... ఇళ్లకు చేరేందుకు నానా తిప్పలు పడాల్సి వస్తోందని వాపోతున్నారు.
ఇదీ చదవండిః 'ఉమ్మడి ఎజెండాను అమలు చేస్తున్నారు'
