వరద బాధితులకు రామోజీ గ్రూప్‌ రూ.5 కోట్ల సాయం

హైదరాబాద్​ వరదలు, వానలతో అల్లాడుతోంది. సీఎం కేసీఆర్ పిలుపుతో భాగ్యనగరాన్ని ఆదుకునేందుకు రాజకీయ ప్రముఖులు, సినీ నటులు, పారిశ్రామికవేత్తలు ముందుకొస్తున్నారు. తాజాగా రామోజీ గ్రూపు సంస్థల అధినేత రామోజీ రావు 5 కోట్ల రూపాయల విరాళం ప్రకటించారు. రామోజీ సంస్థల దాతృత్వాన్ని ప్రశంసిస్తూ కేటీఆర్​ ట్వీట్​ చేశారు.

భారీ వర్షాలతో అల్లాడుతున్న భాగ్యనగర వాసులను ఆదుకునేందుకు రామోజీగ్రూపు ముందుకొచ్చింది. గత కొన్ని రోజులుగా హైదరాబాద్‌ నగరాన్ని వర్షాలు ముంచెత్తుతున్న నేపథ్యంలో బాధితుల సహాయార్థం రామోజీ గ్రూపు సంస్థల అధినేత రామోజీరావు రూ.5 కోట్ల విరాళం ప్రకటించారు. ఈ మొత్తానికి సంబంధించిన చెక్‌ను సంస్థ ప్రతినిధి మంత్రి కేటీఆర్‌కి అందించారు.

రామోజీ గ్రూప్​ దాతృత్వానికి హృదయపూర్వక కృతజ్ఞతలు తెలిపారు మంత్రి కేటీఆర్​. వరద సహాయ కార్యక్రమాలకు రూ.5 కోట్లు అందించడం అభినందనీయమని కొనియాడారు. ఈ మేరకు ట్వీట్​ చేశారు మంత్రి తారకరామారావు.

• ఇదీ చూడండి: కరోనాపై పోరాటానికి రామోజీ సంస్థల భారీ విరాళం