పిల్లల అభ్యర్థనపై తల్లికి పుట్టినరోజు జరిపిన పోలీసులు

లాక్​డౌన్​ వల్ల వారి తల్లి పుట్టిన రోజుకు హాజరుకాలేక పోయిన ఇద్దరు సోదరులు పోలీసుల ఆధ్వర్యంలో నిర్వహించారు. ఒంటరిగా ఇంట్లోనే ఉంటున్న మాతృమూర్తి ముఖంలో ఆనందం నింపారు... అదెలా అంటారా... మీరూ చూడండి.

హైదరాబాద్ నేరేడ్​మెట్​ సైనిక్ పురికి చెందిన కుట్టి అడస్సా పాల్​కు ఇద్దరు పిల్లలు. ఇద్దరు అమెరికాలో ఉంటున్నారు. ఇవాళ ఆమె 60వ పుట్టిన రోజు. కన్నతల్లి జన్మదిన వేడుకలను ఘనంగా చేయాలనుకున్న వారికి లాక్​డౌన్​ కారణంగా ఇంటికి రాలేని పరిస్థితి. ఇంట్లో ఒక్కతే ఉంటూ... తమపై బెంగ పెట్టుకున్న తమ తల్లికి వారి తరఫున పుట్టిన రోజు శుభాకాంక్షలు తెలిపి.. ఆమెకు మనోధైర్యం నింపాలని ఆమె కుమారుడు ఆషార్ పాల్ తల్లురి... మల్కాజిగిరి డీసీపీ రక్షిత మూర్తిని అభ్యర్థించాడు.

వారి కోరికపై వెంటనే స్పందించిన డీసీపీ రక్షిత మూర్తి... వారి ఇంటికి వెళ్లి ఆ మాతృమూర్తికి జన్మదిన శుభాకాంక్షలు తెలపాలని సిబ్బందికి ఆదేశించారు. డీసీపీ ఆదేశాలపై నేరేడ్​మెట్​ సీఐ నరసింహ వారి ఇంటికి వెళ్లి ఆమెకు పుట్టినరోజు శుభాకాక్షలు తెలిపి పాట పాడారు. కాసేపు ఆమెతో మాట్లాడి ధైర్యాన్ని నింపారు. తన పుట్టినరోజు నాడు ఈ ఊహించని పరిణామానికి ఆ తల్లి సంతోషంగా గడిపింది.

ఇదీ చూడండి: సీఎంఆర్​ఎఫ్​కు పెళ్లి ఖర్చులు.. వరుడికి కేటీఆర్ ప్రశంసలు