Thatikonda Rajaiah vs Kadiyam Srihari : ముఖ్యమంత్రి కేసీఆర్ బీఆర్ఎస్ ఎమ్మెల్యే అభ్యర్థుల జాబితాను ప్రకటించారు. ఒకేసారి 115 మంది అభ్యర్థులను ప్రకటించి ప్రత్యర్థి పార్టీలకు సవాల్ విసిరారు. ఈ క్రమంలోనే ఏడు చోట్ల సిట్టింగ్ అభ్యర్థులను మార్చారు. అందరిలాగానే ఉమ్మడి వరంగల్ జిల్లాలో అభ్యర్థుల ప్రకటనను అక్కడి ప్రజలు ఆసక్తిగా గమనించారు. ఎందుకంటే గులాబీ నేతల మధ్య వర్గపోరే ఇందుకు కారణం. ఓరుగల్లులో ఎమ్మెల్యేలు, ఎమ్మెల్సీల మధ్య విభేదాలు నువ్వా నేనా అనేతంగా మారాయి.
ఇందులో ముఖ్యంగా జనగాం, స్టేషన్‌ ఘన్పూర్ నియోజకవర్గాల్లోని నేతల మధ్య.. పచ్చగడ్డివేస్తే భగ్గుమనేలా పరిస్థితులు దారి తీశాయి. ఇది కాస్తా రాష్ట్రవ్యాప్తంగా చర్చనీయాంశమయ్యాయి. కానీ ఇప్పుడు స్టేషన్‌ ఘన్పూర్ టికెట్‌ను.. ప్రస్తుత ఎమ్మెల్యే రాజయ్యను (MLA Rajaiah) కాదని .. ఎమ్మెల్సీగా ఉన్న కడియం శ్రీహరిని (MLC Kadiyam Srihari) ముఖ్యమంత్రి కేసీఆర్ అభ్యర్థిగా ప్రకటించారు. ఇదే ఇప్పుడు ఓరుగల్లు జిల్లాలో హాట్‌ టాపిక్‌గా మారింది.
ఇప్పటికే ఇరువురు నేతలా మధ్య కోల్డ్‌వార్ నడుస్తోంది. మరీ కేసీఆర్ రాజయ్యను పక్కనబెట్టి కడియం శ్రీహరికి ఇవ్వడం వెనుక చాలా కారణాలున్నాయని రాజకీయ విశ్లేషకులు భావిస్తున్నారు. అందులో కొన్నింటిని ఉదాహరణగా చెబుతున్నారు. ముఖ్యంగా తెలంగాణ ఆవిర్భావం తర్వాత రాజయ్య బీఆర్ఎస్‌లో చేరి విజయం సాధించారు. దీంతో కేసీఆర్ ఆయనకు ఉపముఖ్యమంత్రి, వైద్యారోగ్య శాఖ మంత్రి పదవిని ఇచ్చారు. కానీ కొన్నిరోజులకే రాజయ్యపై అవినీతి ఆరోపణలు వచ్చాయి. దీంతో ఆయన వైద్యారోగ్య శాఖ మంత్రి పదవికి రాజీనామా చేశారు. అక్కడితో అంతా సద్దుమణిగింది.
కానీ ఇటీవలే రాజయ్యపై లైంగిక ఆరోపణలు కలకలం రేపాయి. ఆయన తనను లైంగికంగా వేధిస్తున్నారంటూ జానకీపురం సర్పంచ్ నవ్య ఆరోపణలు చేశారు. ఇది కాస్త సంచలనంగా మారింది. ఈ విషయం ముఖ్యమంత్రి కేసీఆర్ దృష్టికి చేరింది. దీంతో రాజయ్యను పిలిచి మందలించారు. ఈ నేపథ్యంలోనే రాజయ్య.. సర్పంచ్ నవ్య ఇంటికి వెళ్లి వివాదాన్ని సామరస్యంగా పరిష్కరించుకున్నారు. దీంతో ఈ కథకు ఫుల్‌స్టాప్ పడింది. మరోవైపు ఈ వివాదాన్ని సుమోటోగా స్వీకరించిన జాతీయ, రాష్ట్ర మహిళా కమిషన్లు.. విచారణ చేపట్టి నివేదిక అందించాలని పోలీస్‌ శాఖను కూడా ఆదేశించాయి.
అనంతరం దీనిపై రాజయ్య స్పందిస్తూ కన్నీటి పర్యంతమయ్యారు. డైరెక్ట్గా తనను ఎదుర్కోలేక కొందరు రాజకీయాలు చేస్తూ ఇబ్బంది పెడుతున్నారని ఆవేదన వ్యక్తం చేశారు. ఫేస్ టు ఫేస్ రాజకీయాలు చేయండని.. తాడోపేడో తెలుసుకుందామని సవాల్ విసిరారు. అయితే ఈ వ్యాఖ్యలు కడియ శ్రీహరికి కౌంటర్‌ అని నియోజకవర్గంలో రూమర్లు వినిపించాయి. దీనిపై కడియ శ్రీహరి స్పందిస్తూ రాజయ్య పార్టీ లైన్‌ దాటి మాట్లాడుతున్నారని.. అయినప్పటికీ తొందరపడవద్దని పార్టీ పెద్దలు తనకు సూచించినట్లు ఆయన తెలిపారు.
- BRS MLAs Final Candidates List 2023 : బీఆర్ఎస్ గెలుపు గుర్రాలివే.. తొలి జాబితా ప్రకటించిన కేసీఆర్!
ఈ విషయం బీఆర్ఎస్ అధిష్ఠానం దృష్టికి చేరింది. దీనిపై కేటీఆర్ రాజయ్య పిలిపించుకొని మాట్లాడారు. పార్టీకి నష్టం కలిగించే విధంగా కడియం శ్రీహరి గురించి మాట్లాడవద్దని సూచించారు. ఈ విషయాన్ని భేటీ అనంతరం రాజయ్య తెలిపారు. హైకమాండ్ సూచన మేరకు ఇకపై కడియం గురించి మాట్లాడనని.. నియోజకవర్గంలో పార్టీని పటిష్ఠ పరుస్తానని ఆయన వ్యాఖ్యానించారు. ఈ కారణాలను పరిగణలోకి తీసుకునే రాజయ్యకు.. ముఖ్యమంత్రి కేసీఆర్ టికెట్ ఇవ్వలేదనే గుసగుసలు వినిపిస్తున్నాయి.
'నా దగ్గరున్న ఆధారాలు బయటపెడితే ఇంటి నుంచి కూడా బయటకు రాలేవు'
