Police Preliminary Examination: రాష్ట్రంలో పోలీస్ నియామక ప్రక్రియలో తొలుత నిర్వహించే ప్రాథమిక రాత పరీక్షలను మూడు నెలల్లో పూర్తి చేసేందుకు తెలంగాణ రాష్ట్ర స్థాయి పోలీస్ నియామక మండలి(టీఎస్‌ఎల్‌పీఆర్‌బీ) సన్నాహాలు చేస్తోంది. జులై చివరి లేదా ఆగస్టు తొలివారంలో రాష్ట్రవ్యాప్తంగా ఈ పరీక్షలు నిర్వహించే యోచనలో ఉన్నారు. అభ్యర్థుల వడపోతగా భావించే ప్రాథమిక రాతపరీక్ష ఫలితాలను సెప్టెంబరులోగా ప్రకటించాలనే ప్రయత్నాల్లో ఉన్నామని నియామక మండలి ఛైర్మన్‌ వి.వి.శ్రీనివాసరావు ‘ఈనాడు-ఈటీవీ భారత్’కు చెప్పారు. అక్టోబరు రెండో వారంలో శారీరక సామర్థ్య(పీఎంటీ, పీఈటీ) పరీక్షలు నిర్వహిస్తామని, నవంబరులోగా ఫలితాలిస్తామని.. జనవరి లేదా ఫిబ్రవరిలో తుది రాతపరీక్షలుంటాయన్నారు. అన్నీ సవ్యంగా సాగితే మార్చిలోపు తుది ఫలితాల్ని ప్రకటిస్తామన్నారు.
‘పలువురు అభ్యర్థులు ఎస్సై పోస్టులతో పాటు కానిస్టేబుల్‌గానూ ఎంపికవుతున్నారు. ఈ పరిస్థితుల్లో కానిస్టేబుల్‌ పోస్టుల్లో బ్యాక్‌లాగ్‌లు మిగిలిపోతున్నాయి. అందుకే ఎస్సైల ఎంపిక ప్రక్రియ ముందుగానే చేపడుతున్నాం. ఆ తర్వాత రెండు వారాలకు కానిస్టేబుల్‌ పరీక్షలు జరుపుతున్నాం. దీనివల్ల ఎస్సైలుగా ఎంపికైన వారిని కానిస్టేబుల్‌ పోటీ నుంచి తప్పిస్తున్నాం. క్రితంసారి ఇలా చేయడంతో 680 కానిస్టేబుల్‌ పోస్టులను బ్యాక్‌లాగ్‌ కాకుండా నివారించగలిగాం.
-- పోలీసు నియామక మండలి ఛైర్మన్‌ వి.వి.శ్రీనివాసరావు
* గతంలో 800 మీటర్ల పరుగు పూర్తి చేసిన పురుషుల్లో 99.6శాతం మంది 100 మీటర్ల పరుగునూ పూర్తి చేశారు. మహిళలు 100 మీటర్ల పరుగుకు 20 సెకన్ల గడువుండటంతో దాదాపు అందరూ పూర్తి చేస్తున్నారు. అందుకే ఈ రెండు ఈవెంట్లను తొలగించాం. పురుషులకు 1600 మీటర్లు, మహిళలకు 800మీటర్ల పోటీ పెడుతున్నాం. ఆంధ్రప్రదేశ్‌లో మహిళలకూ 1600మీటర్ల పోటీ ఉండటం గమనించదగ్గ అంశం. క్రితంసారి హైజంప్‌లో 18 మంది పురుషులు గాయాలపాలయ్యారు. అందుకే ఈసారి తొలగించాం. ఛాతీ కొలతలు తీసుకునే సమయాలను బట్టి, అధికారులను బట్టి మారుతుండటంతో సమస్యలు తలెత్తుతున్నాయి. అందుకే ఈవెంట్ల నుంచి తప్పించాం.
* శారీరక సామర్థ్య పరీక్షల విషయంలో ఎలాంటి అనుమానాలు లేకుండా చేయాలన్నదే మా లక్ష్యం. ఇందుకోసం అభ్యర్థి మైదానంలో అడుగుపెట్టగానే బయోమెట్రిక్‌ తీసుకోవడంతో పాటు చేతికి రేడియో ఫ్రీక్వెన్సీ ఐడెంటిఫికేషన్‌(ఆర్‌ఎఫ్‌ఐడీ) పరిజ్ఞానంతో కూడిన రిస్ట్‌బ్యాండ్‌ వేయాలనే ఆలోచనతో ఉన్నాం. దీనివల్ల అభ్యర్థి మైదానంలో ఎక్కడున్నా తెలిసిపోతుంది. ఏ సమయంలో పరుగును ప్రారంభించారు..? పూర్తి చేశారు..? అనేది సెకన్ల తేడా లేని కచ్చితత్వంతో సెంట్రల్‌ సర్వర్‌లో నమోదవుతుంది’ అని వివరించారు. శిక్షణలో కొత్త మాడ్యూళ్లను రూపొందించబోతున్నామన్నారు.
ఇదీ చూడండి:
