రాష్ట్రంలో ఎల్ఆర్ఎస్కు దరఖాస్తు చేసుకున్న ప్లాట్ల యజమానులతోపాటు... దరఖాస్తు చేసుకోని వారు కూడా భవన నిర్మాణానికి ప్రభుత్వం అనుమతించింది. భవన నిర్మాణ అనుమతులకు మార్గదర్శకాలు, చెల్లించాల్సిన ఫీజులను నిర్దేశిస్తూ... పురపాలక శాఖ ముఖ్యకార్యదర్శి అర్వింద్ కుమార్ ఉత్తర్వులు జారీ చేశారు. ఇప్పటికే జీహెచ్ఎంసీ పరిధిలో ఎల్ఆర్ఎస్కు దరఖాస్తు చేసుకున్నవారు, దరఖాస్తు చేసుకోని వారు భవన నిర్మాణ అనుమతులు కోరుతున్నట్లు పేర్కొన్నారు. జీహెచ్ఎంసీ, హెచ్ఎండీఏ సహా నగరపాలక సంస్థలు, పురపాలక సంఘాలు, పట్టణాభివృద్ధి సంస్థలు ఈ ఉత్తర్వులను పరిగణనలోకి తీసుకోవాలని తెలిపారు. దరఖాస్తు చేసుకున్నవారు ఎల్ఆర్ఎస్ ఛార్జీలు చెల్లించాలని పేర్కొన్నారు.
ఆగస్టు 28లోపు రిజిస్ట్రేషన్ అయి ఎల్ఆర్ఎస్-2020 మేరకు దరఖాస్తు చేసుకున్నవారు భవన నిర్మాణ అనుమతుల కోసం ప్రభుత్వం నిర్దేశించిన ఛార్జీలను భవన నిర్మాణ అనుమతి దరఖాస్తు సమయంలో చెల్లించాల్సి ఉంటుంది. దరఖాస్తు చేసుకోనివారు ఎల్ఆర్ఎస్ ఛార్జీలతో పాటు.. అపరాధ రుసుం చెల్లించి, భవన నిర్మాణ అనుమతికి దరఖాస్తు చేసుకోవచ్చు. దరఖాస్తు సమయంలో ఎల్ఆర్ఎస్కు జీవో ప్రకారం నిర్దేశించిన ఛార్జీలతో పాటు అదనంగా 33 శాతం కాంపౌండింగ్ ఫీజు, 14 శాతం ఖాళీ స్థలం ఛార్జీలను ప్రస్తుత మార్కెట్ విలువ ప్రకారం చెల్లించాల్సి ఉంటుంది.
దరఖాస్తు చేసుకున్నవారు 25.59లక్షల మంది
ఎల్ఆర్ఎస్ కోసం దరఖాస్తు చేసుకునేందుకు ప్రభుత్వం అక్టోబర్ 31వ తేదీ వరకు అవకాశం కల్పించింది రాష్ట్రవ్యాప్తంగా 25.59 లక్షవ మంది దరఖాస్తు చేసుకున్నారు. ఇంకా పలువురు దరఖాస్తు చేసుకోలేదని ప్రభుత్వం గుర్తించింది.
నేటితో ముగియనున్న గడువు
2015 నవంబరు రెండో తేదీన ఇచ్చిన జీవో.151 ప్రకారం ఎల్ఆర్ఎస్కు దరఖాస్తు చేసుకున్నవారు ఛార్జీలను చెల్లించేందుకు గడువు గురువారంతో ముగియనుంది ఈ నేపథ్యంలో వారం రోజులుగా చెల్లింపులు పెరిగాయి.
ఒక్క రోజే 6674 రిజిస్ట్రేషన్లు...
రాష్ట్రంలో బుధవారం ఒక్కరోజే 6674 రిజిస్ట్రేషన్లు జరిగి ప్రభుత్వానికి 117కోట్ల రూపాయల రాబడి వచ్చింది. ఎల్ఆర్ఎస్ లేని ప్లాట్ల రిజిస్ట్రేషన్లు నాలుగు నెలలుగా నిలిచిపోయాయి. వీటిని అనుమతిస్తూ తెలంగాణ ప్రభుత్వం మంగళవారం ఉత్తర్వులు జారీ చేసింది. ఈ నేపథ్యంలోనే బుధవారం రిజిస్ట్రేషన్లు పెరిగాయి. వ్యవసాయేతర రిజిస్ట్రేషన్లు ఈ నెల 14వ తేదీన ప్రారంభం కాగా ఈ నెలలో 31వేలకు పైగా రిజిస్ట్రేషన్లు జరిగాయి.
ఇదీ చదవండి: పిప్రి ఎత్తిపోతల పనులు చేపట్టండి: సీఎం కేసీఆర్
