రయ్మని దూసుకొచ్చే వాహనాలు.. దాటేందుకు వీలులేని రద్దీ నడుమ నగర రహదారులపై వాహనాలు నడపడమే కాదు నడవాలన్నా వణుకే. అరచేతిని అడ్డుపెట్టి ఆ వైపు నుంచి ఈ వైపు దాటే లోపే ఏ దారుణం జరిగిపోతుందనే బెంబేళెత్తిపోతున్నారు పాదచారులు. నగరంలో మూడింట ఒకటో వంతు ప్రమాదాలు రోడ్డు దాటుతుండగా జరుగుతున్నవే. ప్రమాదకర ప్రాంతాల్ని గుర్తించి 52 ఫుట్‌ ఓవర్‌ బ్రిడ్జిలు నిర్మించేందుకు 2019 మార్చిలో ప్రభుత్వం పచ్చజెండా ఊపింది. ఆర్నెల్లు తిరిగే లోపు లెక్కమారి 38 నిర్మించేందుకు సిద్ధమైంది. ఇప్పుడు అక్కడక్కడా పనులు మొదలైనా అవీ నత్తనడకనే సాగుతున్నాయి. దీంతో నగరదారులపై పాదాచారుల భద్రత ప్రశ్నార్థకమవుతోంది.
55.. 44.. 52.. 38.. లెక్కలకే!
పాదచారుల కోసం ట్రాఫిక్‌ పోలీసులు, కన్సల్టెన్సీ సంస్థలు ఇచ్చిన నివేదికల ఆధారంగా బల్దియా 2014లో 55 ఎఫ్‌ఓబీల నిర్మాణానికి సిద్ధమైంది. అధునాతన హంగులతో నిర్మిస్తామని ప్రకటించింది. అందుకు తగ్గట్లే ఇంజినీరింగ్‌ విభాగం టెండర్లకు పిలిచింది. బంజారాహిల్స్‌, జూబ్లీహిల్స్‌, ఖైరతాబాద్‌, పంజాగుట్ట, హైటెక్‌సిటీ వంటి ప్రాంతాల్లో వాటిని నిర్మించేందుకు నిర్ణయించింది. టెండర్ల తర్వాత జరిగిన పరిణామాలతో గుత్తేదారులు ముఖం చాటేశారు. అనంతరం 44 ఎఫ్‌బీఓల నిర్మాణ బాధ్యతల్ని బల్దియా హెచ్‌ఎండీఏకు బదిలీ చేసింది. అక్కడా అదేతీరు కావడంతో తిరిగి 2019 మార్చిలో కొత్తగా ఎల్బీనగర్‌ జోన్‌లో 11, చార్మినార్‌ జోన్‌లో 11, ఖైరతాబాద్‌, సికింద్రాబాద్‌ జోన్లలో 16, కూకట్‌పల్లి, శేరిలింగంపల్లి జోన్లలో 14 ఫుట్‌ ఓవర్‌ బ్రిడ్జిలను నిర్మించేందుకు ప్రతిపాదనలు రూపొందించింది. మళ్లీ 38 నిర్మిస్తామని చెప్పి కొన్ని పనులు మొదలుపెట్టగా అవీ ఎక్కడి గొంగడి అక్కడే అన్నట్లు తయారైంది.
అమీర్‌పేట వద్ద మధ్యలో ఆగిన నిర్మాణం
ప్రమాదకర ప్రాంతాలివీ..
- పంజాగుట్ట కూడలి ఎప్పుడూ రద్దీగా ఉంటుంది. ఇక్కడ 1కి.మీ మేర ఎప్పుడూ జనం ఇటు నుంచి అటు వెళుతూ ఉంటారు. నిమ్స్‌ ఆసుపత్రికి వెళ్లేవారు వచ్చేవారు రోడ్డు దాటుతూ ప్రమాదాలకు గురవుతున్నారు. దీనికి సమీపంలో ఎఫ్‌ఓబీ నిర్మించేందుకు పనులు మొదలైనా పూర్తికావట్లేదు.
- జీడిమెట్ల షాపూర్‌నగర్‌ చౌరస్తా వద్ద కార్మికులు ఎక్కువగా రోడ్లు దాటుతూ ప్రమాదానికి గురవుతున్నారు. ఇక్కడ ఎఫ్‌ఓబీ నిర్మాణానికి గుంతలు తవ్వి వదిలేశారు.
- ఈఎస్‌ఐ ఆసుపత్రి సమీపంలో ఎఫ్‌ఓబీ నిర్మాణ పనులు మొదలై పునాదులకే పరిమితమై కొన్నాళ్లుగా ఆగిపోయాయి. గుంతలు ప్రమాదకరంగా మారాయి.
- శేరిలింగంపల్లి ఎన్‌హెచ్‌ 65 రోడ్డులో ఆర్‌సీపురం పోస్టాఫీసు నుంచి మియాపూర్‌ మెట్రో కేంద్రం వరకు 10కి.మీ.ల మేర సగటున ఒక్కో కిలోమీటరుకు 3.5 ప్రమాదాలు జరిగాయి. 2008లో ఈ ప్రధాన రహదారిపై 25 బ్లాక్‌ స్పాట్లను అప్పటి రవాణాశాఖ గుర్తించింది. మియాపూర్‌ మెట్రో కేంద్రం నుంచి ఫిరోజ్‌గూడ రైల్వే వంతెన వరకు 10.3కి.మీల పరిధిలో కి.మీ.కు సగటున 2.9 ప్రమాదాలు జరిగాయి. ఇక్కడ ఎఫ్‌ఓబీ నిర్మాణాల్లేవు.
- సంతోష్‌నగర్‌ క్రాస్‌రోడ్డు నుంచి రింగురోడ్డు జంక్షన్‌ వరకూ 8కి.మీల పరిధిలోనే దాదాపు 6 ప్రమాదకర ప్రాంతాలున్నాయి.
- ఎస్‌పీరోడ్డు నుంచి సెయింట్‌ జాన్స్‌ రోడ్డు వరకు రెండేళ్లలో 8మంది రోడ్డు దాటుతూ ప్రమాదానికి గురయ్యారు.
- మల్లాపూర్‌, చక్రిపురం, అంబర్‌పేట ప్రాంతాల్లో పదేళ్ల కాలంలో 52మంది పాదచారులు మృత్యువాత పడ్డారు.
ఇదీ చూడండి: accident: మణుగూరు ఓపెన్‌కాస్ట్‌-2లో ప్రమాదం.. ముగ్గురు మృతి
