DSC Sports Quota Candidates Certificate Reverification : తెలంగాణ డీఎస్సీ స్పోర్ట్స్ కోటా అభ్యర్థుల ధ్రువపత్రాలను పున:పరిశీలించాలని రాష్ట్ర విద్యాశాఖ నిర్ణయించింది. ఈ నేపథ్యంలోనే నవంబర్ 20,21,22 వ తేదీల్లో సర్టిఫికెట్ రీవెరిఫికేషన్ చేయనుంది. కొంతమంది అభ్యర్థులు ఫేక్ సర్టిఫికెట్లు పెట్టి స్పోర్ట్స్ కోటాలో ఎంపికైనట్లుగా కంప్లైంట్లు వచ్చిన నేపథ్యంలో విద్యాశాఖ ఈ మేరకు నిర్ణయం తీసుకుంది. మొత్తంగా 393 మంది సర్టిఫికెట్లను అధికారులు మరోసారి నిశితంగా పరిశీలించనున్నారు. ఈ మేరకు ఎడ్యుకేషన్ డిపార్ట్మెంట్ అభ్యర్థులకు కీలక సమాచారాన్ని అందించింది.
డీఎస్సీ-2024 పూర్వపరాలు : ఈ ఏడాది ఫిబ్రవరి నెల 29న నోటిఫికేషన్ విడుదల చేసిన కాంగ్రెస్ సర్కారు జులై 18 నుంచి ఆగస్టు 5 వ తేదీ వరకు పరీక్షలు నిర్వహించింది. మొత్తం 11,062 టీచర్ ఉద్యోగాలకు గాను 2 లక్షల 46 వేల మంది పరీక్షకు హాజరయ్యారు. వీరిలో అర్హులైన అభ్యర్థులను ఎంపిక చేసి అక్టోబర్ 1 నుంచి 5 వ తేదీ వరకు డీఈవోల ఆధ్వర్యంలో సర్టిఫికెట్ వెరిఫికేషన్ నిర్వహించారు. వీరిలో మొత్తం 10,006 మందికి నియామక పత్రాలను అందించారు.
Confusion In Selection Of Teacher Jobs In Nizamabad : ఇదిలా ఉండగా డీఎస్సీ-2024 పరీక్షలో ఉత్తీర్ణత సాధించిన అభ్యర్థుల్లో మెరిట్‌ ఆధారంగా జరిపిన ఎంపికల్లో గందరగోళం కొనసాగింది. ఖమ్మం జిల్లాలో అర్హత లేని 7 మంది అభ్యర్థులను ఎంపిక చేశారంటూ ఆలస్యంగా గుర్తించిన విద్యాశాఖ, ఈ వ్యవహారంలో బాధ్యులుగా పేర్కొంటూ ఇద్దరు హెచ్ఎంలపై సస్పెన్షన్‌ వేటు వేసింది. ఈ క్రమంలోనే నిజామాబాద్ జిల్లాలో ఓ ఉపాధ్యాయురాలిని అనర్హురాలిగా పేర్కొంటూ విద్యాశాఖ అధికారులు ఉద్యోగం నుంచి తొలగిస్తున్నట్లు ఉత్తర్వులిచ్చారు.
సెకండరీ గ్రేడ్ టీచర్ విభాగంలో 257 వ ర్యాంక్ సాధించిన లావణ్య అనే అమ్మాయికి నిజామాబాద్ జిల్లా ధర్పల్లి మండలం దుబ్బాక వడ్డెర కాలనీ ప్రైమరీ స్కూల్లో పోస్టింగ్ ఇచ్చారు. గత నెల ఉద్యోగ బాధ్యతలు చేపట్టిన ఆమె, శనివారం వరకు విధులు నిర్వర్తించారు. కాగా టెక్నికల్ కారణాలతో పొరపాటున లావణ్య ఉద్యోగానికి ఎంపికయ్యారని, ధ్రువపత్రాల పరిశీలనకు హాజరైన 125 వ ర్యాంకు పొందిన అభ్యర్థిని భార్గవి గైర్హాజరైనట్లు చూపడంతో ఇలా జరిగిందని తెలిపారు. దీంతో సరిచేసి లావణ్యను విధుల నుంచి తొలగిస్తూ ఉత్తర్వులు ఇచ్చారు.
అయ్యో పాపం : ఒకేసారి 2 జాబ్స్ - ఒకటి వదిలేస్తే రెండోదీ పోయింది
