ఉల్లిగడ్డల ధర సామాన్యులను కలవర పెడుతోంది. రోజురోజుకి పెరుగుతున్న ధరలు ఇప్పట్లో తగ్గే సూచనలు కనిపించడం లేదు. హైదరాబాద్ మలక్‌పేట్‌ మార్కెట్‌లో నాణ్యమైన ఉల్లిగడ్డల టోకు ధర క్వింటా 6వేల రూపాయలకు చేరింది. గత నెలలో గరిష్ఠ ధర 1971 రూపాయలు ఉండేది. ఈ నెలలో ఏకంగా 201 శాతం అదనంగా పెరిగింది. ఇక చిల్లర ధరలను వీధికో తీరుగా అమ్ముతున్నారు.
కిలోకు రూ.80
హైదరాబాద్‌కు మహారాష్ట్ర నుంచి వచ్చే నాణ్యమైన పెద్ద ఉల్లిగడ్డల ధర 60 రూపాయలు పలుకుతోంది. చిన్నగా ఉండి అంతగా నాణ్యత లేని వాటిని కూడా కిలో 30రూపాయలకు అమ్ముతున్నారు. దేశవ్యాప్తంగా ప్రధాన నగరాల్లో చిల్లర కిలో కు 80 రూపాయలకు చేరిందని జాతీయ ఉద్యాన మండలి తాజా నివేదికలో స్పష్టం చేసింది. ఉల్లి ధరల మంటతో విదేశాల నుంచి లక్ష టన్నుల దిగుమతి చేయడమే గాక వాటి నిల్వకు నాణ్యత ప్రమాణాలను సడలించింది.
ధర పెరిగినా.. డిమాండ్ తగ్గలేదు
ఖరీఫ్‌ సీజన్‌లో సాగుచేసిన ఉల్లి పంట వర్షాలకు దెబ్బతినడం వల్ల 10 లక్షల టన్నుల వరకు దిగుబడి తగ్గిందని అంచనా. తెలంగాణలో ఖరీఫ్‌లో 12 వేల ఎకరాల్లో వేస్తారు. రబీలో 20 వేల ఎకరాల వరకు సాగవుతోంది. గుజరాత్‌, మహారాష్ట్రాల నుంచి తెలంగాణకు ఉల్లిగడ్డలు వస్తున్నాయి. ధర ఇతర రాష్ట్రాల నుంచి పెరిగినా హైదరాబాద్‌కు ఉల్లిగడ్డలు వరదలా వచ్చి పడుడున్నాయి. క్వింటా ధర ఆరు వేలకు చేరినా డిమాండ్ మాత్రం తగ్గలేదు.
దేశవ్యాప్తంగా ఉల్లిగడ్డల ధరలు
| నగరం | కిలో ధర |
| హైదరాబాద్ | రూ. 60 |
| ముంబయి | రూ.80 |
| త్రివేంద్రం | రూ.78 |
| అమృత్సర్ | రూ.70 |
| పట్నా | రూ.70 |
- ఇదీ చూడండి : 40 ప్రేమ కథల 'కడలి'
