Telangana Kanti Velugu: కంటి వెలుగు కార్యక్రమం అమలు తీరు, నూతనంగా నిర్మిస్తున్న సూపర్ స్పెషాలిటీ దవాఖానాల నమూనాల పరిశీలన, ప్రజారోగ్యం.. తదితర అంశాలపై గురువారం ప్రగతిభవన్‌లో ముఖ్యమంత్రి కేసీఆర్ ఉన్నత స్థాయి సమీక్షా సమావేశం నిర్వహించారు.
మరోసారి విజయవంతం చేద్దాం: ఈ సందర్భంగా సీఎం కేసీఆర్ మాట్లాడుతూ..‘‘గతంలో రాష్ట్రవ్యాప్తంగా ప్రభుత్వం నిర్వహించిన కంటి వెలుగు కార్యక్రమం ప్రజల ఆదరాభిమానాలు చూరగొంది. కంటి చూపు కోల్పోయిన పేద వృద్ధులకు చూపు అందింది. తద్వారా వారు పొందిన ఆనందానికి అవధులు లేవు. గతంలో మాదిరిగానే రాష్ట్రవ్యాప్తంగా కంటి వెలుగు పథకం ద్వారా మరోసారి పరీక్షలు నిర్వహించి కావాల్సిన వారందరికీ ఉచితంగా కంటి అద్దాలు అందిస్తాం’’ అని సీఎం స్పష్టం చేశారు.
ఈ సమీక్షలో మంత్రులు హరీశ్‌రావు, వేముల ప్రశాంత్‌రెడ్డి, వి.శ్రీనివాస్‌గౌడ్‌, ఇంద్రకరణ్‌రెడ్డి, సబితా ఇంద్రారెడ్డి, ఎమ్మెల్యేలు ఎ.జీవన్‌రెడ్డి, బాల్క సుమన్‌, కంచర్ల భూపాల్‌రెడ్డి, జి.విఠల్‌రెడ్డి, ఎమ్మెల్సీలు మధుసూదనాచారి, పల్లా రాజేశ్వర్‌రెడ్డి, సీఎస్‌ సోమేశ్‌కుమార్‌, అటవీ శాఖ ప్రత్యేక ప్రధాన కార్యదర్శి శాంతకుమారి, ఆరోగ్య శాఖ కార్యదర్శి రిజ్వీ, ఆరోగ్య కుటుంబ సంక్షేమ కమిషనర్‌ శ్వేతా మహంతి, డీఎంఈ రమేశ్‌రెడ్డి, డీహెచ్‌ గడల శ్రీనివాసరావు, ప్రభుత్వ నిర్మాణ సలహాదారు సుద్దాల సుధాకర్‌తేజ, టీఎస్‌ఎంఎస్‌ఐడీసీ చైర్మన్‌ ఎర్రోళ్ల శ్రీనివాస్‌ తదితరులు పాల్గొన్నారు.
తొలివిడతలో 100 శాతం లక్ష్యసాధన: తొలివిడత కంటి వెలుగు కార్యక్రమం ఆగస్టు 15 2018లో ప్రారంభమై.. 2019 మార్చి 31తో ముగిసింది. రాష్ట్రంలోని 9,887 గ్రామాల్లో 1,54,71,769 మందికి కంటి పరీక్షలు నిర్వహించడంతో లక్ష్యం వంద శాతానికి చేరింది. రాష్ట్రంలో అత్యధికంగా ప్రజలు కంటి పరీక్షలు పొందిన జిల్లాల్లో హైదరాబాద్‌(8,92,256) మొదటి స్థానంలో నిలవగా, రంగారెడ్డి(8,60,891), మేడ్చల్‌(8,28,822) జిల్లాలు ఆ తర్వాత స్థానాల్లో ఉన్నాయి. మొత్తంగా 24,67,481 మందికి సాధారణ దృష్టిలోపాలను సరిచేసే కళ్లద్దాలు అవసరమని గుర్తించగా.. ఇప్పటి వరకూ 23,41,636(94.9శాతం) మందికి అందజేశారు.
శిబిరంలో ఏం చేస్తారు..: ఒక్కో బృందంలో.. ఒక వైద్యాధికారి, ఒక ఆప్టోమెట్రిస్ట్‌, ఇద్దరు లేదా ముగ్గురు కమ్యూనిటీ హెల్త్‌ ఆఫీసర్లు, ఇద్దరు ఏఎన్‌ఎంలు, ఇద్దరు డేటా ఎంట్రీ ఆపరేటర్లు, ముగ్గురు ఆశాలుంటారు. శిబిరానికి వచ్చిన ప్రతి వ్యక్తి వివరాలను నమోదు చేస్తారు. ఏదో ఒక గుర్తింపు కార్డుతో అనుసంధానం చేస్తారు. ముఖ్యంగా ఆధార్‌ కార్డును ప్రాధాన్యతగా స్వీకరిస్తారు. దూరదృష్టి, హ్రస్వదృష్టికి సంబంధించిన పరీక్షలు చేస్తారు.
కంట్లో శుక్లాలున్నాయా? ఇన్‌ఫెక్షన్లున్నాయా? పరిశీలిస్తారు. శుక్లాలుంటే ఆప్టోమెట్రిస్ట్‌ ఆధ్వర్యంలో కంప్యూటరైజ్‌డ్‌ కంటి పరీక్షలు నిర్వహిస్తారు. సాధారణ దృష్టి లోపాలను గుర్తిస్తే అక్కడికక్కడే రీడింగ్‌ గ్లాసెస్‌ అందజేస్తారు. ఒకవేళ ప్రత్యేకంగా అద్దాలు ఇవ్వాల్సి వస్తే.. 3-4 వారాల గడువు తీసుకొని.. వ్యక్తి ఇంటికెళ్లి ఆరోగ్య కార్యకర్తలే అద్దాలు అందజేస్తారు.
మానవ వనరులు: 33 మంది జిల్లా వైద్య ఆరోగ్య అధికారులు, 75 మంది ఉప డీఎంహెచ్‌ఓలు, 1200 మంది వైద్యాధికారులు, 1000 మంది ఆప్టోమెట్రిస్ట్‌లు, 6వేల మంది ఏఎన్‌ఎంలు, 1800 మంది డేటా ఎంట్రీ ఆపరేటర్లు, 2వేల మంది హెల్త్‌ సూపర్ వైజర్లు, 27వేల మంది ఆశా ఆరోగ్య కార్యకర్తలు, 1,300 బృందాలు పనిచేస్తాయి.
కంటివెలుగుకు అవసరమైనవి..
- 40 లక్షల కళ్లద్దాలు
- 1,300 ఆటో రిఫ్రాక్టర్‌ మీటర్లు
- 1,300 ట్రయల్‌ లెన్స్‌ బాక్సులు
- 3,600 విజన్‌ చార్టులు
- 5 వేల టార్చ్‌లైట్లు
- 2,600 టాబ్స్‌
- యాంటీ బయాటిక్స్‌ కళ్ల చుక్కల మందు, ఆయింట్‌మెంటు, విటమిన్‌-ఎ మాత్రలు, లూబ్రికేటింగ్‌ చుక్కల మందు, పారాసెటమాల్‌ మాత్రలు
- వీటి కొనుగోలుకు రూ.63.56 కోట్ల వ్యయమవుతుందని ఆరోగ్య శాఖ అంచనా వేసింది.
ఇవీ చదవండి:
