Niranjan reddy about rythu bandhu : పెట్టుబడిసాయం కింద ప్రభుత్వం ప్రతిష్ఠాత్మకంగా అమలుచేస్తున్న పథకం రైతుబంధు... నగదు జమలో కాస్త జాప్యం జరుగుతోంది. ఇప్పటికే కొందరు రైతుల ఖాతాల్లో డబ్బులు జమకాగా... ఇంకాకొందరికి అందలేదు. దీనిపై వ్యవసాయశాఖ మంత్రి నిరంజన్ రెడ్డి స్పందించారు.
రాష్ట్రంలో ఈ ఏడాది యాసంగి సీజన్‌లో అర్హులందరికీ రైతుబంధు సాయం అందుతుందని వ్యవసాయ శాఖ మంత్రి నిరంజన్ రెడ్డి అన్నారు. ఎవరికీ ఎలాంటి అపోహలు అవసరం లేదని స్పష్టం చేశారు. డిసెంబరు నుంచి ఇవాళ్టి వరకు మధ్యలో 4 రోజులు బ్యాంకులకు సెలవులు వచ్చాయని తెలిపారు. అందుకే రైతుబంధు నిధులు రైతుల ఖాతాల్లో జమ చేయడంలో కొంత జాప్యం జరిగిందని చెప్పారు. ఈ మేరకు మంత్రి ఓ ప్రకటన విడుదల చేశారు.
ఇప్పటి వరకు మొత్తం 60,16,697 మంది రైతుల ఖాతాల్లో రూ.6008.27 కోట్లు జమ చేసినట్లు ప్రకటించారు. 7 ఎకరాలు ఉన్న రైతులందరి ఖాతాలకు రైతుబంధు నిధులు జమయ్యాయని వెల్లడించారు. అర్హుల జాబితాలో ఉండి మిగిలిపోయిన రైతులందరికీ ఒకటి, రెండు రోజుల్లో రైతుబంధు నిధులు జమ అవుతాయని మంత్రి నిరంజన్ రెడ్డి ఈ సందర్భంగా తెలియజేశారు.
ఇదీ చదవండి: Telangana Teachers Protest: 'మల్టీ జోన్లలో ఖాళీలున్నా.. మమ్మల్ని గోస పెడుతున్నారు'
