ఆఖరి ఘట్టానికి చేరుకున్న ఎన్నికల ప్రచారం-ఐదు రోజుల పాటు జాతీయ నేతల కోలాహలం

National Political Leaders Election Tours in Telangana : తెలంగాణ శాసనసభ ఎన్నికలో అభ్యర్థుల ప్రచారం నువ్వానేనా అన్నట్లు సాగుతోంది. అందరూ ఓటర్లను ఆకర్షించే పనిలో పడ్డారు. అయితే ఎన్నికల ప్రచారానికి మరో ఐదు రోజులు సమయం ఉండడంతో జాతీయ నేతలు తెలంగాణలో విస్తృత ప్రచారానికి సిద్ధమయ్యారు. బహిరంగసభలు, రోడ్​షోలు, కార్నర్​ మీటింగ్​లు అంటూ దుమ్ములేపడానికి రెడీ అంటున్నారు. అయితే ఆ జాతీయ నేతలు ఎవరూ.. ఎక్కడెక్కడ పర్యటిస్తారు అనే విషయాలను ఇప్పుడు తెలుసుకుందాం.

National Political Leaders Election Tours in Telangana : తెలంగాణ శాసనసభ ఎన్నికల దంగల్​ ఆఖరి ఘట్టానికి చేరుకుంది. ఇంకో ఐదు రోజుల సమయమే ఉండడంతో అన్ని పార్టీలు తమ ప్రచారాలలో జోరు(Telangana Election 2023) పెంచాయి. మిగిలిన నాలుగు రాష్ట్రాల్లో ఎన్నికల పోలింగ్​ పూర్తి కావడంతో.. వరుసపెట్టి జాతీయస్థాయి ఫేమస్​ నేతలు తెలంగాణ యుద్ధానికి సిద్ధమవుతున్నారు. ఈ క్రమంలో బీజేపీ, కాంగ్రెస్​, సీపీఐ(ఎం) నేతలు రాష్ట్రానికి రానున్నారు. ముఖ్యంగా ప్రధాని మోదీ, కేంద్ర హోం మంత్రి అమిత్​షా, రాజ్​నాథ్​ సింగ్​.. కాంగ్రెస్​ అగ్రనేతలు రాహుల్​ గాంధీ, ప్రియాంక గాంధీ, డీకే శివకుమార్​.. సీపీఐ(ఎం) అగ్రనేతలు మాణిక్​ సర్కార్​, సుభాషినీ ఆలీ వంటి ప్రముఖులు పాల్గొననున్నారు.

ప్రధాని మోదీ : ప్రధానమంత్రి నరేంద్ర మోదీ 25 నుంచి 27 వరకు రాష్ట్రంలో ఎన్నికల ప్రచారం నిర్వహించనున్నారు. మొత్తం ఆరు సభలు, హైదరాబాద్​లో రోడ్​ షోలలో పాల్గొననున్నారు. మొదటగా 25వ తేదీన కామారెడ్డి సభలో ప్రసంగించి.. అనంతరం రంగారెడ్డి జిల్లాలోని మహేశ్వరం సభల్లో పాల్గొని ప్రసంగించనున్నారు. 26వ తేదీన కన్హ శాంతి వనంలో కార్యక్రమం, తూఫ్రాన్​, నిర్మల్​లో జరిగే బహిరంగ సభల్లో పాల్గొంటారు. 27వ తేదీన మహబూబాబాద్​, కరీంనగర్​లలో జరిగే బహిరంగ సభల్లో పాల్గొంటారు. అనంతరం సాయంత్రం హైదరాబాద్​లో జరిగే రోడ్​షోలో పాల్గొననున్నారు.

అమిత్​ షా : కేంద్రమంత్రి అమిత్​ షా ఎన్నికల ప్రచారంలో పాల్గొనేందుకు 24వ తేదీన రాష్ట్రానికి రానున్నారు. ఆరోజు ఆర్మూర్​, రాజేంద్రనగర్​, శేరిలింగంపల్లి, అంబర్​పేట అసెంబ్లీ నియోజకవర్గాల్లో రోడ్​షోలు నిర్వహిస్తారు. అనంతరం మళ్లీ దిల్లీ వెళ్లి 26, 27, 28 ఈ మూడు రోజుల పాటు ఎన్నికల ప్రచార సభల్లో పాల్గొననున్నారు.

రాజ్​నాథ్​ సింగ్​ : కేంద్ర రక్షణ శాఖ మంత్రి రాజ్​నాథ్​ సింగ్​ 24న రాష్ట్రానికి రానున్నారు. ఆ రోజు ఉదయం 11 గంటలకు మేడ్చల్​, సాయంత్రం 4 గంటలకు కార్వాన్​, సాయంత్రం 5 గంటలకు కటోన్మెంట్​ నియోజకవర్గాల్లో జరిగే బహిరంగ సభల్లో పాల్గొననున్నారు.

ప్రియాంక గాంధీ : కాంగ్రెస్​ అగ్రనేత ప్రియాంక గాంధీ నవంబరు 24, 25న తెలంగాణలో ఎన్నికల ప్రచారంలో పాల్గొననున్నట్లు పీసీసీ వర్గాలు తెలిపాయి. నవంబరు 24న పాలకుర్తి, హుస్నాబాద్​, కొత్తగూడెం కాంగ్రెస్​ ప్రచార సభల్లో ప్రియాంక గాంధీ పాల్గొనున్నారు. కొత్తగూడెంలో సీపీఐ అభ్యర్థి కూనంనేని సాంబశివరావుకు మద్దతుగా ఆమె ప్రచారం చేయనున్నారు. నవంబరు 25వ తేదీన పాలేరు, సత్తుపల్లి, మధిర నియోజకవర్గాల్లో ప్రచార సభలలో ప్రియాంక పాల్గొని ప్రసంగించనున్నారు.

డీకే శివకుమార్​ : కర్ణాటక ఉప ముఖ్యమంత్రి, ఆ రాష్ట్ర పీసీసీ అధ్యక్షుడు డీకే శివకుమార్​ రెండు రోజుల పాటు తెలంగాణలో పర్యటించనున్నారు. నవంబరు 24, 25 తేదీల్లో ప్రచార సభల్లో పాల్గొననున్నారు. నవంబరు 24న స్టేషన్​ ఘన్​పూర్​ నియోజకవర్గంలో కార్నర్​ మీటింగ్​.. అక్కడి నుంచి వర్ధన్నపేట, వరంగల్​ వెస్ట్​ నియోజకవర్గాల్లో ప్రచార సభల్లో పాల్గొంటారు. అదే రోజు రాత్రి అంబర్​ పేట నియోజకవర్గంలో కార్నర్​ మీటింగ్​లో డీకే శివకుమార్​ పాల్గొననున్నారు. మరుసటి రోజు నవంబరు 25న హైదరాబాద్​లోని పలు నియోజకవర్గాల్లో రోడ్​షోలు, కార్నర్​ సమావేశాల్లో పాల్గొని ప్రసంగించనున్నారు.

మాణిక్​ సర్కార్ : సీపీఐ(ఎం) పార్టీ పోలిట్​బ్యూరో సభ్యులు, త్రిపుర మాజీ ముఖ్యమంత్రి మాణిక్​ సర్కార్​ మూడు రోజుల పాటు రాష్ట్రంలో పర్యటించనున్నారు. నవంబరు 24న ఖమ్మం రోడ్​ షో, మధిర నియోజకవర్గం ముదిగొండలో సభ నిర్వహించనున్నారు. అలాగే నవంబరు 25న భద్రాచలం నియోజకవర్గంలోని వాజేడులో ఎన్నికల సభ.. సాయంత్రం భద్రాచలంలో రోడ్​షోలో పాల్గొననున్నారు. నవంబరు 26న పాలేరు నియోజకవర్గంలోని కూసుమంచిలో జరిగే ఎన్నికల ప్రచార సభ పాల్గొని ప్రసంగించనున్నారు.

సుభాషినీ ఆలీ : సీపీఐ(ఎం) పార్టీ పాలిట్​ బ్యూరో సభ్యురాలు సుభాషినీ ఆలీ నవంబరు 24వ తేదీన ఉదయం జనగాం నియోజకవర్గంలో పర్యటించి.. సాయంత్రం హైదరాబాద్​లోని ముషిరాబాద్​ నియోజకవర్గంలో ఎన్నికల పర్యటన చేయనున్నారు.