National Conference on Oil Palm Cultivation : దేశంలో ఆయిల్ పామ్ సాగు విస్తీర్ణాన్ని గణనీయంగా పెంచేందుకు చర్యలు తీసుకుంటున్నామని కేంద్ర మంత్రి నరేంద్రసింగ్ తోమర్ తెలిపారు. దేశీయ వంట నూనెల ఉత్పత్తి పెంచి... దిగుమతులను తగ్గించటంతోపాటు రైతుల ఆదాయం పెంచాలన్న లక్యంతో నూనె గింజల నేషనల్ మిషన్ చేపట్టామని వెల్లడించారు. హైదరాబాద్లో హెచ్ఐసీసీ నొవాటెల్లో ఏర్పాటు చేసిన బిజినెస్ సమ్మిట్ను కేంద్రమంత్రి ప్రారంభించారు. ఈ సందర్భంగా ఏర్పాటు చేసిన ఆయిల్ పామ్ ఉత్పత్తులు, సాగు పద్ధతుల ప్రదర్శనను ప్రారంభించారు.
తెలంగాణ అగ్రస్థానంలో..
Telangana Oil Palm Cultivation : కొవిడ్‌తో ప్రపంచ ఆర్థిక వ్యవస్థ కుదేలైందని కేంద్రమంత్రి అన్నారు. భారత్‌లో మాత్రమే వ్యవసాయ వృద్ధి ఆగలేదని... రైతుల ఆదాయం రెట్టింపు కోసం కలిసి పనిచేయాలని కోరారు. సేంద్రియ సేద్యంపై దృష్టి సారించాలన్న కేంద్రమంత్రి... దేశంలో ఆయిల్పామ్ సాగు విస్తీర్ణం పెంచేందుకు చర్యలు తీసుకుంటున్నామని వెల్లడించారు. దేశంలో ప్రస్తుతం 3 లక్షల హెక్టార్లలో ఆయిల్పామ్ సాగువుతోందని... ఆయిల్పామ్ సాగులో తెలంగాణ అగ్రస్థానంలో నిలవబోతుందని చెప్పారు.
'విత్తన లభ్యత, సాంకేతిక మద్దతు, కొనుగోలు కేంద్రాల ఏర్పాటు, మిల్లుల ఏర్పాటు వంటి అంశాలపై ప్రధాన పెట్టుబడులను పెట్టనున్నాం. ఆయిల్ పామ్ సాగుకు సంబంధించి రాష్ట్రాలకు కేంద్రం సంపూర్ణ మద్దతు ఇస్తుంది. రసాయన ఎరువుల వాడకం తగ్గించాలి. సేంద్రియ ఎరువుల వినియోగం పెంచే విధంగా చర్యలు వేగంగా తీసుకోవాలి. సహజ, ప్రకృతి, సేంద్రియ సాగుకు సంబంధించి తెలుగు రాష్ట్రాలు ముందుకు వెళ్తున్నాయి.'
-నరేంద్రసింగ్ తోమర్, కేంద్రమంత్రి
వంట నూనెల కోసం నేషనల్ మిషన్
వంట నూనెల విషయంలో ఆత్మనిర్భర్ చేయడం కోసం దాదాపు రూ.11 వేల కోట్లతో నేషనల్ మిషన్ చేపట్టామని వ్యవసాయ శాఖ సహాయ మంత్రి కైలాష్ చౌదరి అన్నారు. ఇందులో దాదాపు రూ.2,200 కోట్ల వరకు రాష్ట్రాలు భరిస్తాయని తెలిపారు. ప్రభుత్వం, పరిశోధన రంగాలు, రైతులు కలసి ఈ ప్రణాళికని విజయవంతం చేయాలని సూచించారు. రైతుల ఆదాయం రెట్టింపు చేయటంలో ఈ కార్యక్రమం దోహదం చేస్తుందని ఆయన స్పష్టం చేశారు.
మద్దతు ధర అవసరం
Niranjan reddy about oil palm : ఆయిల్ పామ్ సాగు విస్తీర్ణం పెంచడానికి... రూ.15 వేల కనీస ధర అందించాలని, బిందు సేద్యం రాయితీ పెంచాలని కేంద్రానికి రాష్ట్ర వ్యవసాయశాఖ మంత్రి నిరంజన్‌రెడ్డి విజ్ఞప్తి చేశారు. రాష్ట్రంలో 30 లక్షల ఎకరాల్లో ఆయిల్పామ్ సాగు చేయడమే లక్ష్యంగా సాగుతున్నట్లు తెలిపారు. రాష్ట్రంలో ప్రత్యామ్నాయ పంటల సాగుపై రైతులకు అవగాహన కల్పిస్తున్నట్లు వెల్లడించారు. ఆయిల్ పామ్కు సంబంధించి సింగిల్ విండో ద్వారా అనుమతులు ఇవ్వాలని విజ్ఞప్తి చేశారు.
'డ్రిప్ ఇరిగేషన్ రాయితీలు పెంచాలి. ఏడేళ్ల పరిమితి ఎత్తివేయాలి. పంట మార్పిడి కోసం సూక్ష్మ ప్రణాళికలు సిద్ధం చేసింది. కనీస మద్దతు ధరను ఆయిల్ పామ్కు పెంచాలి.'
-మంత్రి నిరంజన్ రెడ్డి
ఈ కార్యక్రమంలో కేరళ మంత్రి పి.ప్రసాద్, వ్యవసాయ శాఖ కార్యదర్శి సంజయ్ అగర్వాల్, రాష్ట్ర ప్రభుత్వ ప్రధాన కార్యదర్శి సోమేష్ కుమార్, ఐసీఏఆర్ డైరెక్టర్ జనరల్ డాక్టర్ త్రిలోచన్ మహాపాత్ర, వ్యవసాయ శాఖ కార్యదర్శి రఘునందన్ రావు, ఉద్యాన శాఖ డైరెక్టర్ లోక వెంకటరామిరెడ్డి, ఆయిల్ పామ్ రైతులు, శాస్త్రవేత్తలు, పరిశ్రమల ప్రతినిధులు, అంకుర సంస్థల ప్రతినిధులు తదితరులు ఈ సదస్సులో పాల్గొన్నారు.
ఇదీ చదవండి: Rythu Bandhu Funds : రైతులకు శుభవార్త... నేటి నుంచి ఖాతాల్లోకి పెట్టుబడి సాయం
