Narendra Modi Letter to Gaddar Wife Vimala : ప్రజా ఉద్యమాల్లో గద్దర్‌ కృషిని ప్రజలు ఎప్పటికీ మరువలేరు: ప్రధాని మోదీ

Narendra Modi Letter to Gaddar Wife Vimala : గద్దర్‌ సతీమణి విమలకు ప్రధాని మోదీ లేఖ రాశారు. గద్దర్ మృతి గురించి తెలిసి ఆవేదన చెందానని చెప్పారు. ఆయన రచనలు ప్రజలకు ఎంతో ప్రోత్సాహాన్ని అందించాయని మోదీ పేర్కొన్నారు.

Narendra Modi Letter to Gaddar Wife Vimala : ప్రజా యుద్ధనౌక గద్దర్ సతీమణి విమలకు ప్రధానమంత్రి నరేంద్ర మోదీ (Narendra Modi letter to Gaddar Wife Vimala ) లేఖ రాశారు. గద్దర్ మృతి గురించి తెలుసుకుని చాలా బాధపడ్డానని పేర్కొన్నారు. తీవ్ర దుఃఖంలో ఉన్న ఈ సమయంలో కుటుంబ సభ్యులకు సానుభూతి తెలియజేస్తున్నట్లు చెప్పారు. ఆయన పాటలు, ఇతివృత్తాలు.. సమాజంలోని బడుగు బలహీన వర్గాలు ఎదుర్కొంటున్న సవాళ్లను ప్రతిబింబిస్తాయని కొనియాడారు.

Narendra Modi Letter to Gaddar Wife Vimala గద్దర్‌ సతీమణి విమలకు ప్రధాని లేఖ

గద్దర్ రచనలు ప్రజలకు ప్రోత్సాహాన్ని కూడా అందించాయని మోదీ వివరించారు. తెలంగాణ సాంప్రదాయక కళారూపాన్ని పునరుజ్జీవింపజేయడంలో గద్దర్ చేసిన కృషి.. ప్రజలకు ఎప్పటికీ గుర్తుండిపోతుందని నరేంద్ర మోదీ తెలిపారు. మీ దుఃఖాన్ని మాటల్లో వ్యక్తపరచలేనని.. కుటుంబసభ్యులకు, శ్రేయోభిలాషులకు దీనిని తట్టుకునే శక్తిని ప్రసాదించాలని కోరుకుంటున్నానని మోదీ లేఖలో పేర్కొన్నారు.

Folk Singer Gaddar Biography : గద్దర్ ఆగస్టు 6న కన్నుమూశారు. ఆయన అసలు పేరు గుమ్మడి విఠల్‌రావు. మెదక్‌ జిల్లాలోని తూప్రాన్‌ గ్రామంలో లచ్చమ్మ, శేషయ్య దంపతులకు 1949లో జన్మించారు. నిజామాబాద్‌, మహబూబ్‌నగర్‌ జిల్లాలో విద్యాభ్యాసం చేశారు. అనంతరం హైదరాబాద్‌లో ఇంజినీరింగ్‌ చదివారు. 1969 తెలంగాణ ఉద్యమంలో చురుగ్గా పాల్గొన్నారు. ప్రత్యేక తెలంగాణ ఎందుకు కావాలో చెబుతూ.. ఊరురా తిరిగి ప్రచారం నిర్వహించారు. సామాన్యులకు కూడా అర్థమయ్యే రీతిలో బుర్రకథ వేదికగా ఎంచుకుని గద్దర్ పాటలు పాడారు.

దర్శకుడు బి.నరసింగరావు ప్రోత్సాహంతో 1971లో సినిమాల్లో తొలి పాట పాడారు. "ఆపార రిక్షా" రాశాడు. ఆయన తొలి ఆల్బం పేరు గద్దర్. ఇదే ఆయన పేరుగా స్థిరపడింది. తన పాటలతో తాడిత పీడిత, బడుగు బలహీన వర్గాలను మేల్కొలిపారు. మాభూమి సినిమాలో సాయుధ పోరాట యోధుడు యాదగిరి పాత్రలో గద్దర్ నటించారు. బండెనక బండి కట్టి అంటూ ఆడిపాడారు. తెలుగు ప్రేక్షకుల్ని ఉర్రూతలూగించారు.

1984లో బ్యాంకు ఉద్యోగానికి రాజీనామా చేసిన గద్దర్.. పూర్తిస్తాయిలో.. ప్రజగాయకుడిగా ప్రస్థానం ప్రారంభించారు. కారంచేడులో దళితుల హత్యలకు వ్యతిరేకంగా పోరాటం చేశారు. జన నాట్య మండలిలో చేరి.. ఒగ్గు కథ, బుర్ర కథ, ఎల్లమ్మ కథల ద్వారా గ్రామీణ ప్రజల్లోకి వెళ్లారు. తెలుగు రాష్ట్రాల్లోనే కాకుండా మధ్యప్రదేశ్‌, ఒడిశా, మహారాష్ట్ర, బిహార్‌లోనూ ప్రదర్శనలు ఇచ్చారు. గద్దర్‌ గోచి, గొంగడి మాత్రమే ధరించే వారు.

దళితులు, పేదలు అనుభవిస్తున్న కష్టాలను పాటలు, నాటకాల రూపంలో తెలియజేసేవారు. ఆయన పాటలు క్యాసెట్లు, సీడీలు భారీగా అమ్ముడుపోయాయి. 1997 ఏప్రిల్ 6న గద్దర్‌పై హత్యాయత్నం జరిగింది. ఆయన శరీరంలోకి అనేక బుల్లెట్లు దూసుకెళ్లాయి. అన్ని బుల్లెట్‌లను తొలగించినా.. ఒక తూటాను మాత్రం తొలగించలేదు. ఆ బుల్లెట్‌ను తొలగిస్తే ప్రాణాలకే ప్రమాదమని వదిలేశారు. చనిపోయే వరకు ఒంట్లో బుల్లెట్‌తోనే గద్దర్ జీవించారు.