ktr on link roads: 'ట్రాఫిక్​ సమస్యలు, ప్రయాణ దూరం తగ్గించడమే లక్ష్యంగా లింకురోడ్లు'

హైదరాబాద్ మహానగరం అన్ని రంగాల్లో అభివృద్ధి చెందుతోందని పురపాలకశాఖ మంత్రి కేటీఆర్ అన్నారు. నగర అభివృద్ధికి రహదారులు చిహ్నమని కేటీఆర్ పేర్కొన్నారు. ప్రధాన రహదారులపై రద్దీని తగ్గించేందుకు లింక్​రోడ్లను ఏర్పాటు చేస్తున్నామని.. ఇప్పటి వరకు జంట నగరాల్లో 16 లింక్‌ రోడ్లను పూర్తి చేశామన్నారు. ఇవాళ మరో ఐదు లింకు రోడ్లను మంత్రి కేటీఆర్ ప్రారంభించారు (ktr inaugurated link roads). దశల వారిగా జంట నగరాల్లో మొత్తం 133 లింక్‌ రోడ్లను నిర్మించనున్నట్లు వెల్లడించారు.

గ్రేటర్ హైదరాబాద్ పరిధిలో ట్రాఫిక్ సమస్యలు వర్ణణాతీతం. ప్రధాన రహదారులపై పీక్ సమయంలో వాహన చోదకులు తీవ్ర ఇబ్బంది పడుతుంటారు. ట్రాఫిక్ రద్దీని తగ్గించేందుకు హైదరాబాద్​లో లింక్ రోడ్లను నిర్మిస్తున్నారు. నగరంలోని నిర్మించిన 5 నూతన లింక్ రోడ్లను మంత్రి కేటీఆర్ ప్రారంభించారు (ktr inaugurated link roads). నోవాటెల్ వెనక భాగంలోని వసంత్ సిటీ వద్ద నిర్మించిన మూడు లింక్ రోడ్ల జంక్షన్ వద్ద ప్రారంభించారు.

వసంత్ సిటీ నుంచి న్యాక్ వరకు 0.75 కిలోమీటర్లు, ఐడీపీఎ ఎంప్లాయిస్ కాలనీ నుంచి శ్రీల పార్కు ప్రైడ్ రోడ్ వరకు 0.46 కిలోమీటర్లు, నోవాటల్ నుంచి ఆర్టీఏ ఆఫీస్ వరకు 0.6 కిలో మీటర్లు, జేవీ హిల్స్ పార్క్ నుంచి మజీద్ బండ వరకు నిర్మించిన 1.01 కీమీ లింక్ రోడ్, ఇండియన్ స్కూల్ ఆఫ్ బిజినెస్ నుంచి ఓఆర్​ఆర్ వరకు నిర్మించిన 1.94 కీమీ లింక్ రోడ్లను మంత్రి సబితా ఇంద్రారెడ్డితో కలిసి కేటీఆర్ ప్రారంభించారు (ktr inaugurated link roads).

త్వరలో మరో ఆరు రోడ్లు..

భాగ్యనగరం అన్ని విధాల అభివృద్ధి చెందుతోందని మంత్రి కేటీఆర్ అన్నారు. న‌గ‌ర అభివృద్ధికి ర‌హ‌దారులు చాలా ముఖ్యమ‌ని తెలిపారు. హైద‌రాబాద్‌లో ఇప్పటికే 16 లింకు రోడ్లను పూర్తి చేశామ‌ని, వీటితో హైద‌రాబాద్‌లో ట్రాఫిక్ స‌మ‌స్య త‌గ్గిందని... త్వర‌లోనే మ‌రో 6 రోడ్లను పూర్తి చేస్తామ‌న్నారు. హైద‌రాబాద్​లో పెరుగుతున్న జన సాంద్రత‌ను దృష్టిలో ఉంచుకుని ర‌హ‌దారుల‌ను అభివృద్ధి చేస్తున్నామ‌ని తెలిపారు. ఎస్సార్​డీపీలో భాగంగా ఫ్లై ఓవ‌ర్లు, అండ‌ర్​పాస్‌లు నిర్మిస్తున్నామ‌ని చెప్పారు.

రూ.6 వేల కోట్లతో ఎస్ఆర్​డీపీ ప‌నులు కొన‌సాగుతున్నాయని.. అంతేగాక‌, హైద‌రాబాద్ రోడ్డు డెవ‌ల‌ప్‌మెంట్ కార్పొరేష‌న్ లిమిటెడ్ కింద అద‌నంగా మొద‌టి ద‌శ‌లో రూ.313.65 కోట్ల‌తో 22 లింకు రోడ్ల నిర్మాణం చేపడుతున్నామ‌ని చెప్పారు. ద‌శ‌ల వారీగా మొత్తం 133 లింకు రోడ్లు నిర్మిస్తున్నామ‌ని వివ‌రించారు.

ఎస్‌ఆర్‌డీపీలో భాగంగా వంతనెలు, అండర్‌పాస్‌లు నిర్మిస్తున్నాం. సీఆర్ఎంపీ కింద రూ.1,800 కోట్లతో కార్యక్రమాలు చేపడుతున్నాం. మొదటి దశలో రూ. 313.65 కోట్లతో లింకు రోడ్లు నిర్మిస్తున్నాం. ఇప్పటికే 16 రోడ్లను పూర్తి చేశాం. త్వరలోనే మరో 6 రోడ్లను పూర్తి చేస్తాం. రెండో దశలో అదనంగా మరో 13 రోడ్లను ఏర్పాటు చేస్తాం. మరింత పారదర్శకంగా రోడ్ల నిర్మాణం చేపడతాం. జీహెచ్‌ఎంసీ వెబ్‌సైట్‌లో రోడ్ల నిర్మాణ వివరాలు అందుబాటులో ఉంచుతాం. ప్రణాళికబద్ధంగా దశలవారీగా లింకు రోడ్లను నిర్మిస్తున్నాం. ప్రజలకు మెరుగైన మౌలిక వసతులు ఉంటే నగర జీవనం బాగుంటుంది.

- కేటీఆర్, పురపాలక శాఖ మంత్రి

సైదమ్మతో సెల్ఫీ...

వసంత్ సిటీ వద్ద నిర్మించిన లింక్​రోడ్​ను ప్రారంభించి వెళ్తున్న సమయంలో అక్కడే విధులు నిర్వహిస్తున్న చందానగర్ సర్కిల్ పారిశుద్ధ్య కార్మికురాలు సైదమ్మను మంత్రి కేటిఆర్ పలకరించారు. ఆమె తలపై ధరించిన టోపి బాగుందని క్యాప్​ను సరి చేసి యోగ క్షేమాలు ఆడిగి తెలుసుకున్నారు. సైదమ్మతో మంత్రి సెల్ఫీ దిగారు.

ఇదీ చూడండి: Remembering PV: ఘనంగా పీవీ శత జయంతి ముగింపు ఉత్సవాలు