వివిధ పెండింగ్ ప్రాజెక్టులకు సంబంధించి తెలంగాణ రాష్ట్రానికి రావాల్సిన సుమారు రూ.3 వేల కోట్ల పెండింగ్ నిధులను సత్వరమే విడుదల చేయాలని తెరాస లోక్సభా పక్షనేత, ఎంపీ నామ నాగేశ్వరరావు కేంద్ర ప్రభుత్వాన్ని కోరారు. లోక్సభలో సప్లిమెంటరీ డిమాండ్స్ ఫర్ గ్రాంట్స్పై జరిగిన చర్చలో ఆయన మాట్లాడారు.
ఈ పెండింగ్ నిధుల విడుదల, పెండింగ్ ప్రాజెక్టుల పూర్తికి సంబంధించి తెలంగాణ ముఖ్యమంత్రి కేసీఆర్, మంత్రి కేటీఆర్, ఇతర మంత్రులు, తాను ఎన్నోసార్లు రాతపూర్వకంగా కేంద్ర ప్రభుత్వాన్ని కోరామని ఎంపీ పేర్కొన్నారు. ఇప్పటికైనా ఆ నిధులను విడుదల చేయాలన్నారు. అభివృద్ధి చెందుతున్న తెలంగాణ రాష్ట్రానికి రావాల్సిన నిధులను విడుదల చేసి, మద్దతుగా నిలవాలని కోరారు.
ఈ సందర్భంగా కొవిడ్ కారణంగా ఒక సంవత్సరం నుంచి కష్టాలు ఎదుర్కొంటూ ఇప్పుడిప్పుడే బయట పడుతున్నామని నామ అన్నారు. రాష్ట్రాల్లో రోడ్లు, నేషనల్ హైవేలు వంటి మౌళిక వసతులు అభివృద్ధి జరగాలన్నారు. అప్పుడే మరింత అభివృద్ధి జరుగుతుందని వ్యాఖ్యానించారు. కొన్ని రాష్ట్రాలు కేంద్రం కేటాయించిన నిధులను ఖర్చు చేయడం లేదని.. అలాంటి నిధులను తెలంగాణకు కేటాయించాలని ఈ సందర్భంగా కేంద్రాన్ని కోరారు.
ఇదీ చూడండి: 'అంకెలు బారెడు... అప్పులు బోలెడు'.. బడ్జెట్పై విపక్షాల విమర్శలు
