'త్వరలోనే సినీ రంగం అభివృద్ధికి ఉత్తమ విధానం ప్రకటిస్తాం'

తెలుగు సినీ పరిశ్రమ పునరుద్ధరణపై రాష్ట్ర ప్రభుత్వం సమయానుకూలంగా నిర్ణయం తీసుకుంటుందని మంత్రి తలసాని శ్రీనివాస్ యాదవ్ స్పష్టం చేశారు. ఇప్పటికే దశల వారీగా పనులు మొదలుపెట్టుకోవచ్చని ప్రాథమికంగా సూచించిన ప్రభుత్వం... ఆ మేరకు విధివిధానాలను రూపొందించాలని ఆదేశించింది. ఈ విషయంపై సినీ ప్రముఖులతో మంత్రి సమీక్ష నిర్వహించారు. ఆయా విభాగాల వారీగా అభిప్రాయాలను తెలుసుకున్నారు.

లాక్​డౌన్​ కారణంగా ఆర్థిక సంక్షోభంలో పడిన తెలుగు టెలివిజన్, సినీ పరిశ్రమను ఆదుకుని... వెంటనే చిత్రీకరణలకు అనుమతి ఇవ్వాలన్న వినోద పరిశ్రమవర్గాల అభ్యర్థనపై రాష్ట్ర ప్రభుత్వం ప్రత్యేక దృష్టి సారించింది. ముఖ్యమంత్రి ఆదేశాల మేరకు పరిశ్రమలోని 24 విభాగాల వారీగా... సినిమాటోగ్రఫి మంత్రి తలసాని శ్రీనివాస్ యాదవ్ సమీక్ష నిర్వహించారు. మాసబ్ ట్యాంక్​లోని ఆయన కార్యాలయంలో సమావేశాన్ని ఏర్పాటు చేశారు. తెలంగాణ ఫిల్మ్ ఛాంబర్ అధ్యక్షుడు మురళీమోహన్, తెలుగు నిర్మాతల మండలి అధ్యక్షుడు సి.కళ్యాణ్, కార్యదర్శి దామోదరప్రసాద్, నిర్మాతలు దిల్ రాజు, అభిషేక్ అగర్వాల్, ఏషియన్ సునీల్, మా అసోసియేషన్ అధ్యక్ష కార్యదర్శులు నరేష్, జీవిత రాజశేఖర్​తో పాటు పలువురు థియేటర్ల యాజమానులు ఈ భేటీకి హాజరయ్యారు.

థియేటర్లు ప్రారంభించాలి..

థియేటర్లను పునఃప్రారంభించాలని మురళీమోహన్ మంత్రిని కోరారు. ప్రభుత్వం రాయితీలు కల్పిస్తేనే థియేటర్లు తెరుచుకునే పరిస్థితి నెలకొంటుందని విన్నవించారు. అలాగే పార్కింగ్ ఛార్జీలను నిర్ణీత మొత్తంలో తీసుకునేలా ఆదేశాలు ఇవ్వాలని కోరారు. అటు నిర్మాతలు కూడా సినిమా చిత్రీకరణ అనుమతులపై మరోసారి వివరించారు. ఇండోర్, ఔట్​డోర్ సెట్లలో తీసుకోబోయే జాగ్రత్త చర్యలను మంత్రికి వివరించారు. నటీనటుల సంఘం నుంచి హాజరైన నరేష్, జీవిత రాజశేఖర్​లు... సినిమా చిత్రీకరణ అనుమతులిచ్చాక... నటీనటుల ఆరోగ్య భద్రతపై భరోసా కల్పించాలని కోరారు.

''మా వరకు మేము కొన్ని జాగ్రత్తలు తీసుకుంటాం. స్టాఫ్​ను తగ్గించుకుని తగిన చర్యలు తీసుకుంటాం. ఏది ఏమైనా ఇదంతా రిస్క్​తో కూడినదే. కరోనాతో మనం బ్రతకాలి. ప్రభుత్వం ప్రతి షూటింగ్ స్పాట్ వద్ద క్రిమిసంహారక యూనిట్​ను ఏర్పాటు చేయాలని కోరాం. ప్రభుత్వం మాకు ఆ సేఫ్టీని ఇవ్వగలిగినప్పుడు మేము పనిచేయడానికి సిద్ధంగా ఉన్నాం.''

-నరేష్, నటీనటుల సంఘం అధ్యక్షుడు

''ఆర్టిస్టులుగా మేము ఆలోచించేది ఒక్కటే. షూటింగ్ ఎప్పుడు ప్రారంభమవుతోంది? లాక్​డౌన్ ఎత్తివేశాక పరిస్థితులు మరింత దారుణంగా ఉండొచ్చు. ఆ సమయంలో షూటింగ్ ఎలా చేస్తాం? ఇప్పుడు ప్రభుత్వం ఎలాంటి చర్యలు తీసుకుంటుంది అనేవి ఆలోచిస్తున్నాం. మనం ఎంత వరకు వాటిని పాటించగలం.. ఎన్ని రోజులు పాటించగలం అనే అంశాలపై చర్చిస్తున్నాం. ఇలాంటి సమయంలో ప్రభుత్వం మాతో కలిసి ప్రయాణిస్తున్నందుకు చాలా ఆనందంగా ఉంది.''

-జీవిత రాజశేఖర్, నటీనటుల సంఘం కార్యదర్శి

త్వరలోనే ప్రణాళికలు ఇస్తాం..

ఒక్కో అంశంపై సుమారు గంటన్నరపాటు చర్చించిన మంత్రి తలసాని... సినీరంగం పునరుద్ధరణపై ప్రభుత్వం సానుకూలంగా స్పందిస్తుందని తెలిపారు. ఇప్పటికే పోస్టు ప్రొడక్షన్ పనులకు అనుమతినిస్తూ ఆదేశాలు జారీ చేశామన్న తలసాని... సినిమా చిత్రీకరణలు, థియేటర్ల పునఃప్రారంభంపై సమయానుకూలంగా నిర్ణయం తీసుకుంటామని స్పష్టం చేశారు. త్వరలోనే సినీ రంగం అభివృద్ధికి కావల్సిన ఉత్తమ విధానాన్ని ప్రకటించేందుకు... ప్రభుత్వం ప్రణాళికలు సిద్ధం చేసినట్లు వెల్లడించారు.

సినీ పరిశ్రమలో నెలకొన్న సమస్యలు, అనుమతులపై రూపొందించిన విధివిధానాలపై గురువారం మధ్యాహ్నం ప్రభుత్వ ప్రధాన కార్యదర్శి సోమేశ్ కుమార్ ప్రత్యేకంగా సమావేశం కానున్నారు. ఈ సమావేశానికి పలు విభాగాలకు చెందిన ప్రముఖులు హాజరై సీఎస్​తో చర్చించనున్నారు.

ఇవీ చూడండి: 'మైలురాయిని మంచి కోసం ఉపయోగించిన సామ్'