బాస్కెట్ బాల్, స్కేటింగ్ క్రీడాకారుల మైదానం వినియోగంపై తలెత్తిన వివాదంపై రవీంద్రభారతిలో మంత్రి శ్రీనివాస్గౌడ్ అధికారులతో ఉన్నతస్థాయి సమీక్ష నిర్వహించారు. తక్షణమే వివాదాన్ని పరిష్కరించాలని అధికారులను ఆదేశించారు. రెండు క్రీడలకు చెందిన ప్లేయర్ల మధ్య కొంతకాలంగా గ్రౌండ్ వాడకంపై వివాదం నడుస్తోంది.
ఈ రోజు నిర్వహించిన సమీక్షలో రెండు క్రీడలకు చెందిన ప్లేయర్లు మంత్రిని కలిసి సమస్యను వివరించారు. ఈ వివాదానికి సరైన పరిష్కారం చూపాలని మంత్రిని కోరారు. వారి విజ్ఞప్తిపై స్పందించిన మంత్రి వెంటనే సమస్యను పరిష్కరించాలని క్రీడాశాఖ కార్యదర్శి శ్రీనివాస్రాజును ఆదేశించారు.
