రోడ్ల విషయంలో భాజపా నేతలు స్పందించాలి : కేటీఆర్​

రాష్ట్రం ఏర్పడిన తర్వాత హైదరాబాద్​లో రోడ్ల విస్తరణకు నాలుగు రకాల ప్రణాళికలు రూపొందించామని మంత్రి కేటీఆర్​ అన్నారు. నూతన, లింక్​ రోడ్లను దశల వారీగా పూర్తి చేస్తున్నామని చెప్పారు. హైదరాబాద్​లో పలు చోట్ల రోడ్లను ఇవ్వాలని కేంద్రంను కోరినా ఇవ్వడం లేదని పేర్కొన్నారు. భాజపా నేతలు స్పందించాలని తెలిపారు. రాష్ట్ర శాసన మండలిలో పలువురు అడిగిన ప్రశ్నలకు మంత్రి సమాధానం చెప్పారు.

"రాష్ట్రంలో గత ఆరేళ్లలో హైదరాబాద్​లో రోడ్ల విస్తరణకు నాలుగు రకాల ప్రణాళికలు తీసుకున్నాం. సీఎం కేసీఆర్​ సూచన మేరకు మొదటగా ఎస్​ఆర్​డీపీని అమలు చేశాం. రూ.29,600 కోట్లతో లీ అసోసెయోట్ ఆధ్వర్యంలో పనులను అప్పగించాం. దాంట్లో ఆరు వేల కోట్ల పనులు ప్రారంభించాం. మిగతావి వివిధ దశల్లో ఉన్నాయి.

రెండోది హైదరాబాద్​లో 709 కి.మీ.ల రోడ్ల మెయింటనెన్స్​కు రూ.1800 కోట్ల రూపాయలతో ప్రైవేటు సంస్థలకు అప్పగించడం జరిగింది. 1,037 మిస్సింగ్​ రోడ్లను కూడా దశల వారీగా పూర్తి చేయడానికి ప్రణాళికలు సిద్ధం చేశాం.

మేము కొత్త రోడ్లు వేయడానికి ప్రణాళికలు వేస్తుంటే కేంద్రం రోడ్లను మూసేస్తుంది. హైదరాబాద్​లో పలు చోట్ల రోడ్లను ఇవ్వాలని కేంద్రంను కోరినా స్పందన లేదు. రాష్ట్రంలో కంటోన్​మెంట్​ రోడ్ల విషయంలో ఇప్పటికే రక్షణ మంత్రి రాజ్​నాథ్​ సింగ్​కు​ అనేక లేఖలు రాశాం. కేంద్ర నుంచి ఉలుకు పలుకు లేదు. భాజపా ఎమ్మెల్సీ రామచంద్రరావు, పలువురు నేతలు కూడా రాష్ట్రానికి రావాల్సిన రహదారుల విషయంలో స్పందించి కేంద్రానికి చెప్పాలి."

- పురపాలక శాఖ మంత్రి కేటీఆర్​

ఇదీ చూడండి : కొండపోచమ్మ జలాశయం కట్టకు బుంగ