తెలంగాణ విమోచన దినోత్సవాన్ని అధికారికంగా జరపాలని కేంద్ర హోంశాఖ సహాయ మంత్రి కిషన్రెడ్డి అన్నారు. ఈ సందర్భంగా దిల్లీలో జాతీయ జెండాను ఆవిష్కరించి రాష్ట్ర ప్రజలకు శుభాకాంక్షలు తెలిపారు. తెలంగాణ సాయుధ పోరాటంలో అమరుల త్యాగాలను గుర్తు చేసుకున్నారు. ఈ సందర్భంగా తెలంగాణ సాయుధ పోరాట యోధులకు నివాళులు అర్పించారు.
"నిజాం రాజ్యంలో తెలంగాణ ప్రజలకు విముక్తి కలిగిన రోజు. తెలంగాణకు స్వాతంత్య్రం వచ్చిన రోజు. దేశానికి 1947 ఆగస్టు 15న స్వాతంత్య్రం వస్తే తెలంగాణ రాష్ట్రానికి మాత్రం 1948 సెప్టెంబర్ 17న వచ్చింది. స్వామి రామానాంద, చాకలి ఐలమ్మ, పీవీ వంటి ఎందరో నాయకులు నిజాంకు వ్యతిరేకంగా పోరాటం చేసి తెలంగాణకు స్వాతంత్య్రం సాధించుకున్నారు. ఆ రోజుల్లో రక్తపాతం జరిగింది. అనేక మందిని చంపి బావుల్లో పడేశారు. అలాంటి ఈ రోజును కర్ణాటక, మహారాష్ట్రలోని పలు జిల్లాల్లో ఉత్సవాలు అధికారికంగా నిర్వహిస్తున్నారు. కానీ రాష్ట్రంలో అధికారికంగా నిర్వహించడం లేదు. తెలంగాణ రాకముందు అధికారికంగా నిర్వహిస్తామన్న కేసీఆర్.. అధికారంలోకి వచ్చిన తర్వాత మాట తప్పారు. ఇప్పుడు ఎందుకు నిర్వహించడం లేదో చెప్పాలి. నిజాం రాజ్యంలో తెలంగాణ ప్రజలకు విముక్తి కలిగిన రోజు ఈరోజు. 70 ఏళ్ల పోరాట చరిత్రకు అమరవీరుల స్ఫూర్తి కేంద్రంను నిర్మించి భావితరాలకు భద్రపరచాలి. ఆ స్ఫూర్తి కేంద్రం నిర్మాణంకు కేంద్ర ప్రభుత్వం సిద్దంగా ఉంది. కనీసం తెలంగాణ ప్రభుత్వం భూమి కేటాయింపు చేస్తే.. అమరవీరుల స్ఫూర్తి కేంద్రం నిర్మిస్తాం.
- కేంద్ర హోంశాఖ సహాయ మంత్రి కిషన్రెడ్డి
ఇదీ చూడండి : రాష్ట్రంలో వెయ్యి దాటిన కరోనా మరణాలు
