రాష్ట్రంలో కొవిడ్ రెండోదశ వ్యాప్తి వేగంగా జరుగుతున్నందున వైద్యులు, వైద్య సిబ్బంది అప్రమత్తంగా ఉండాలని మంత్రి ఈటల రాజేందర్ ఆదేశించారు. కరోనా మొదటి వేవ్కు, రెండో వేవ్కు చాలా తేడా ఉందని స్పష్టం చేశారు. ఈ మేరకు జిల్లా వైద్యారోగ్యశాఖ అధికారులతో టెలీ-కాన్ఫరెన్స్ నిర్వహించారు. వివిధ జిల్లాల అధికారులతో పాటు డీఎంఈ రమేశ్ రెడ్డి, డీహెచ్ శ్రీనివాస రావు ఈ సమావేశంలో పాల్గొన్నారు.
ప్రధానంగా గ్రామ స్థాయిలో ఆశా వర్కర్లు, ప్రాథమిక ఆరోగ్య కేంద్ర స్థాయిలో వైద్యులు వైరస్ లక్షణాలున్న వారిని గుర్తించాలని మంత్రి సూచించారు. కరోనా టెస్టుల్లో వేగం పెంచాలని కోరారు. ఎక్కువ మంది రోగులు హోం ఐసోలేషన్లో ఉండేలా కౌన్సెలింగ్ ఇవ్వాలన్న ఈటల.. ఆసుపత్రుల్లో కొవిడ్ రోగులకు అవసరమైన మందులు, ఆక్సిజన్ అందుబాటులో ఉంచాలన్నారు. ఈ సందర్భంగా వైరస్తో చనిపోయిన వారి మృతదేహాలను ఎలాంటి ఇబ్బందిలేకుండా కుటుంబసభ్యులకు అందించేందుకు గ్రామ పంచాయతీ, స్థానిక మున్సిపల్ అధికారులతో సమన్వయం చేసుకోవాలని సూచించారు.
టిమ్స్ సందర్శన..
అనంతరం గచ్చిబౌలిలోని టిమ్స్ ఆసుపత్రిని మంత్రి సందర్శించారు. మౌలిక సదుపాయాలపై ఆరా తీశారు. కరోనా కేసులు పెరుగుతుండటంతో ఆసుపత్రిలో మందులు, బెడ్లు, సిబ్బంది కొరత లేకుండా తీసుకోవాల్సిన చర్యలపై అధికారులతో సమీక్షా సమావేశం నిర్వహించారు.
ఇదీ చూడండి: 'మాస్క్‌ లేకపోతే సీసీ కెమెరాలతో గుర్తించి జరిమానా వేస్తాం'
