ప్రతీ నెల ఇంటింటికి తిరిగి మీటర్ బిల్లులు ఇచ్చేందుకు విద్యుత్ శాఖ ప్రైవేట్ మీటర్ కార్మికులను నియమించింది. రాష్ట్ర వ్యాప్తంగా ఎస్పీడీసీఎల్, ఎన్పీడీసీఎల్ పరిధిలో కలిపి మొత్తం 1,800ల మంది మీటర్ కార్మికులు పనిచేస్తున్నారు. కరోనా నేపథ్యంలో విద్యుత్ శాఖ రెండు నెలలపాటు విద్యుత్ బిల్లులను నిలిపివేసింది. కార్మికులకు ఏప్రిల్, మే నెలలో నెలకు రూ.3 వేల చొప్పున ఇవ్వాలని విద్యుత్ శాఖ అధికారులు సంబంధిత గుత్తేదారులను ఆదేశించారు. అధికారులు ఆదేశించినా గుత్తేదారులు జీతాలు ఇవ్వకపోవడం వల్ల మీటర్ రీడింగ్ కార్మికులు అవస్థలు పడుతున్నారు. ఇంటి అద్దె కట్టలేక, నిత్యావసర సరకులు కొనుగోలు చేయలేకపోతున్నారు. అప్పులతో పస్తులుంటున్నారు. పెండింగ్లో ఉన్న జీతాలు ఇస్తామనడం వల్ల మీటర్ రీడింగ్ ప్రారంభించామని కార్మికులు చెబుతున్నారు.
ప్రాణాలు పణంగా పెట్టి విధులు
అసలే హైదరాబాద్లో కరోనా కేసులు పెరిగిపోతున్నాయని.. ఇలాంటి సమయంలో ఎవరికి కరోనా ఉందో ఎవరికి లేదో తెలియడం లేదంటున్నారు. ప్రాణాలు పణంగా పెట్టి విధులు నిర్వహిస్తున్నామని చెబుతున్నారు. ఒకవేళ కరోనా సోకితే ప్రభుత్వమే ఆదుకోవాలని వేడుకుంటున్నారు. ఒక్క మీటర్ రీడింగ్ తీస్తే కేవలం రూ.2 మాత్రమే చెల్లిస్తారని.. నెలలో 10 నుంచి 15 రోజులు మాత్రమే పని ఉంటుందని వాపోతున్నారు. తమకు బీమా కల్పించాలని, తమను ఆర్టిజన్లుగా గుర్తించాలని విద్యుత్ శాఖ అధికారులకు విజ్ఞప్తి చేస్తున్నారు. పెండింగ్లో ఉన్న ఏప్రిల్, మే నెలల జీతాలు చెల్లించాలని కోరుతున్నారు.
ఇవీ చూడండి: పాఠశాలల ప్రారంభంపై ఇంకా నిర్ణయం తీసుకోలేదు: విద్యాశాఖ
