పెళ్లి పేరుతో మోసం…. కిలాడీ అరెస్ట్!

పెళ్లి పేరుతో ఇటీవ‌ల మోసాలు పెరిగాయి. ఇందుకు ఆన్‌లైన్ సైట్లు వేదిక అవుతున్నాయి. మాట్రిమోనీ వెబ్‌సైట్‌లో ఫేక్ ప్రొపైల్స్ పెట్ట‌డం. ఆక‌ర్షించే బ‌యోడేటాను ఉంచ‌డం.. ఆత‌ర్వాత ఎవ‌రైనా ఆన్​లైన్​లోకి వ‌స్తే వారిని పెళ్లి పేరుతో మోసం చేయ‌డం సాధారణమైంది. అయితే తాజాగా పెళ్లి పేరుతో మోసం చేస్తున్న ఓ కిలాడీని ఇప్పుడు సైబ‌రాబాద్ పోలీసులు ప‌ట్టుకున్నారు.

మాట్రిమోనీ సైట్‌ని వాడుకుని ఒక యువతిని మోసం చేసాడు ఫిజియో థెర‌పి విద్యార్థి బాణోత్ సాయినాథ్. ఖ‌మ్మంకి చెందిన సాయినాథ్‌ని రాచ‌కొండ సైబ‌ర్ క్రైమ్ పోలీసులు అరెస్ట్ చేసారు. మాట్రిమోనీలో అమ్మాయి పెట్టిన ప్రొఫైల్ నుంచి బాధితురాలి ఫోటోలు, ఫోన్ నెంబ‌ర్ తీసుకుని వాట్సాప్ ద్వారా త‌న పేరు అవినాష్ రెడ్డి అని చెప్పి చాట్ చేశాడు.

కొన్నాళ్ల స్నేహం త‌ర్వాత‌ పెళ్లి చేసుకుంటాన‌ని ఆమెను న‌మ్మించాడు. ఇలా.. మాయ‌మాట‌లు చెప్పి బాధితురాలు నుంచి రూ. 2.8 ల‌క్ష‌లు తీసుకున్నాడు. బాధితురాలు మ‌లేషియాలో ఐటీ జాబ్ చేస్తుంది. ఈమెతో పాటు మ‌రి కొంతమంది ఇత‌ర రాష్ట్రాల అమ్మాయిల‌ని కూడా డాక్ట‌ర్ సాయినాథ్ పేరుతో మోసం చేసిన‌ట్లు విచార‌ణ‌లో వెల్ల‌డ‌య్యింది. వచ్చిన డబ్బులతో నిందితుడు ఖరీదైన బైక్​లు కొని జల్సాలు చేసేవాడని పోలీసులు తెలిపారు.

ఇదీ చూడండి: ప్రియుడితో పెళ్లి జరగదనే భయంతో బాలిక ఆత్మహత్య