Metro opposes hike in electricity tariffs : విద్యుత్ ఛార్జీల పెంపును ఎల్అండ్టీ మెట్రో వ్యతిరేకిస్తోంది. తమ అభ్యంతరాలను తెలంగాణ విద్యుత్ నియంత్రణ మండలి(ఈఆర్సీ)కి విన్నవించింది. ఏప్రిల్‌ 1 నుంచి విద్యుత్ ఛార్జీలను పెంచాలని డిస్కం ప్రతిపాదించిన సంగతి తెలిసిందే. హెచ్‌టీ వినియోగదారులకు ప్రతి యూనిట్‌పై రూపాయి పెంపును ప్రతిపాదించింది. దీనిపై ఇటీవల ఈఆర్సీ హైదరాబాద్‌లో బహిరంగ విచారణ నిర్వహించింది.
మెట్రో వాదన ఇదే..
మెట్రోరైలు పూర్తిగా విద్యుత్తో నడుస్తుంది. ప్రభుత్వ, ప్రైవేటు భాగస్వామ్యంతో చేపట్టిన ప్రాజెక్టు కావడంతో ప్రభుత్వంతో ఉన్న ఒప్పందం కారణంగా యూనిట్‌ ఛార్జీని రూ.3.95 వసూలు చేస్తున్నారు. డిమాండ్‌ ఛార్జీలు ప్రతి కేవీఏకి రూ.390 వసూలు చేస్తున్నారు. ఫలితంగా ప్రతి యూనిట్‌ ఛార్జీ రూ.5.28 పడుతోందని ఎల్అండ్టీ మెట్రో అంటోంది. వచ్చే ఆర్థిక సంవత్సరం నుంచి రూపాయి పెంపుతో యూనిట్‌ ఛార్జీ రూ.4.95 అవుతుంది. డిమాండ్‌ ఛార్జీలు ప్రతి కేవీఏకి రూ.85 పెంపుతో రూ.475 అవుతుంది. ఈ ప్రకారం ప్రతి యూనిట్‌ ఛార్జీ రూ.6.57 అవుతుంది. యూనిట్‌కు రూ.1.29 పెరుగుతోంది. ఇది తమకు భారమని ఎల్అండ్టీ వాదిస్తోంది.
25 శాతం భారం..
భారీగా కరెంట్ ఛార్జీల పెంపుతో మెట్రో నిర్వహణ వ్యయం 25 శాతం పెరుగుతుందని ఎల్అండ్టీ అంటోంది. కొవిడ్‌ కారణంగా ఇప్పటికీ 25 శాతం ఆక్యుపెన్సీతో మెట్రోరైలు నడుపుతున్నామని వెల్లడించింది. కరెంట్ ఛార్జీల పెంపు ప్రతిపాదనను ఆమోదిస్తే.. ఆ భారం మెట్రోరైలు ప్రయాణికులపై వేయాల్సి వస్తోందని పేర్కొంది. కాబట్టి పెంపు తిరస్కరించాలని కోరింది. మెట్రోకి కాస్ట్ టూ సర్వీసు(సీవోఎస్‌) ఇవ్వాలన్న ఒప్పందం ఉందని గుర్తు చేస్తోంది. ఆ ప్రకారం మెట్రోకి హెచ్‌టీ 5(బి) కేటగిరి ఇచ్చారు. సీవోఎస్‌ ప్రకారం రూ.5.09 అవుతుందని డిస్కం ఇచ్చిన లెక్కలు చెబుతున్నాయని ఈఆర్సీ దృష్టికి తీసుకెళ్లింది. ఆ ప్రకారం యూనిట్‌ ఛార్జీ రూ.3.75కి, కేవీఏ డిమాండ్‌ ఛార్జీలు రూ.390 ఉండేలా ఆదేశించాలని కోరింది.
ఇదీ చదవండి: 'ఏప్రిల్‌ 1 నుంచి కొత్త విద్యుత్ ఛార్జీలు..!'
