అధికారులు ప్రత్యేక దృష్టి సారించాలి: మంత్రి కేటీఆర్

ఎడతెరిపి లేకుండా కురిసిన వానలకు ముంపునకు గురైన ప్రాంతాల్లో మంత్రి కేటీఆర్ పర్యటించారు. స్థానికులు తమ అవస్థలను మంత్రికి వివరించారు. అధికారుల నిర్లక్ష్యం వల్లే తాము సమస్యలు ఎదుర్కొవాల్సి వస్తుందని ఆరోపించారు. నాలా పరీవాహక ప్రాంతాల పట్ల జీహెచ్‌ఎంసీ అధికారులు దృష్టి సారించాలని కేటీఆర్ ఆదేశించారు. ప్రజలను సురక్షిత ప్రాంతాలకు తరలించాలని సూచించారు.

రెండు రోజులుగా కురిసిన వర్షానికి అతలాకుతలమైన ముషీరాబాద్ నియోజకవర్గంలోని సూర్య నగర్ ముంపు ప్రాంతాల్లో రాష్ట్ర మున్సిపల్ శాఖ మంత్రి కేటీఆర్ సందర్శించారు. ఏకధాటిగా కురుస్తున్న వర్షం వల్ల వరద నీరు వచ్చి అనేక అవస్థలకు గురయ్యామని కేటీఆర్‌కు ప్రజలు విన్నవించుకున్నారు. 2000 సంవత్సరంలో ఇదే ముంపు నెలకొందని... నాటి నుంచి నేటి వరకు తాము ఈ సమస్యతో కొట్టుమిట్టాడుతున్నమని మహిళలు మొరపెట్టుకున్నారు. ప్రభుత్వ అధికారులు ఎలాంటి చర్యలు తీసుకోకపోవడం వల్లే ఇబ్బందులకు గురువుతున్నామని ఆరోపించారు.

ఆదేశాలు

నాలా పరీవాహక ప్రాంతాల ప్రజల పట్ల జీహెచ్ఎంసీ అధికారులు ప్రత్యేక దృష్టి సారించాలని మంత్రి కేటీఆర్‌ ఆదేశించారు. ముంపునకు గురైన ప్రజలను సురక్షిత ప్రాంతాలకు తరలించాలని చెప్పారు. హుస్సేన్ సాగర్ నాలా ప్రహారి విషయంలో తగు చర్యలు చేపట్టాలని ఆదేశించారు.

పలువురు అరెస్ట్

మంత్రి కేటీఆర్ పర్యటనను అడ్డుకోవడానికి వచ్చిన భాజపా నాయకులు పూస రాజు, అరుణ్ కుమార్ తదితరులను పోలీసులు అరెస్ట్ చేశారు. తన అనుచరులతో వచ్చిన యువజన కాంగ్రెస్ జాతీయ ప్రధాన కార్యదర్శి అనిల్ కుమార్ యాదవ్‌ను పోలీసులు అడ్డుకున్నారు.

ఇదీ చదవండి: భారీ వర్షాలతో కుదేలైన అన్నదాతలు