ట్రాఫిక్​ నివారణకు స్లిప్​ రోడ్లు.. కేటీఆర్​ దిశానిర్దేశం

జంటనగరాల్లో ట్రాఫిక్​ రద్దీ తగ్గించేందుకు ప్రభుత్వం ప్రత్యేక దృష్టి సారించింది. రద్దీ అధికంగా ఉన్న ప్రాంతాల్లో సాధ్యమైనన్ని స్లిప్​ రోడ్లు ఏర్పాటు చేయాలని నిర్ణయించింది. హైదరాబాద్​ ప్రగతి భవన్​లో నూతన కొత్త రోడ్లు నిర్మాణం, ట్రాఫిక్​ రద్దీ నివారణపై పురపాలక శాఖ మంత్రి కేటీఆర్​ సమీక్ష నిర్వహించారు. ఉన్నతాధికారులకు దిశానిర్ధేశం చేశారు. ​

హైదరాబాద్​లో ట్రాఫిక్ రద్దీ తగ్గించేందుకు పురపాలక శాఖ కసరత్తు ప్రారంభించింది. నగరంలో నూతనంగా ఏర్పాటు చేసేందుకు అవకాశం ఉన్న స్లిప్ రోడ్లపై (ప్రధాన రోడ్లకు అనుసంధానించే రోడ్లు) ప్రగతి భవన్‌లో పురపాలక శాఖ మంత్రి కేటీఆర్ సమీక్షించారు. నగరంలో అత్యధికంగా ట్రాఫిక్​ జాం ఉండే ప్రాంతాల్లో సాధ్యమైననన్ని ఎక్కువ రోడ్లు ఏర్పాటు చేసి దీర్ఘకాలంలో రద్దీ తగ్గించడమే లక్ష్యంగా జీహెచ్‌ఎంసీ, హెచ్‌ఎండీఏ, హైదరాబాద్ రోడ్ల అభివృద్ధి సంస్థలు సంయుక్తంగా రూపొందిచిన సమగ్ర నివేదికపైన మంత్రి చర్చించారు. ఇందుకోసం క్షేత్రస్థాయిలో ఉన్న పరిస్థితులకు అనుగుణంగా ప్రణాళిక ఉండాలన్నారు. ప్రస్తుతం ఉన్న జన సాంద్రత, భవిష్యత్తు విస్తరణ, ట్రాఫిక్ అధ్యయనం వంటి అంశాలను పరిగణలోకి తీసుకోవాలని సూచించారు.

కొత్త రోడ్ల నిర్మాణం:

నగర రోడ్డు నెట్ వర్క్​ను బలోపేతం చేసేందుకు అవసరమైన రైల్వే వంతెనలు గుర్తించి రైల్వే శాఖ నుంచి అనుమతులు పొందే ప్రక్రియ వేగవంతం చేయాలని మంత్రి కేటీఆర్‌ ఆదేశించారు. స్లిప్ రోడ్లతోపాటు, మిస్సింగ్ లింక్‌లను కలిపే చిన్న రోడ్ల పనులు వెంటనే ప్రారంభించాలని ఆదేశాలు జారీ చేశారు. దీనితోపాటు ఎస్సార్డీపీ పనులకు అదనంగా అవసరమైన చోట్ల జంక్షన్ల అభివృద్దిపైన కూడా దృష్టి సారించాలని స్పష్టం చేశారు. ఇప్పటికే పలు నూతన రోడ్లను ఎప్పటికప్పుడు జీహెచ్​ఎంసీ నిర్మిస్తుందని, సాధ్యమైనన్ని ఎక్కువ స్లిప్​ రోడ్లకు ప్రణాళిక సిద్ధం చేస్తుందని మంత్రి తెలిపారు. బోరబండ నుంచి మియాపూర్ వరకు ఉన్న మెయిన్ రోడ్డు నుంచి హైటెక్ సిటీ, మాదాపూర్ దిశగా స్లిప్ రోడ్లు ఏర్పాటుచేసేందుకు గల అవకాశాలు పరిశీలిస్తున్నామని కేటీఆర్​ పేర్కొన్నారు.

తక్కువ ఖర్చుతో:

అలాగే జూబ్లీహిల్స్ నుంచి నాలెడ్జ్ సిటీ వైపు, ఒల్డ్ ముంబై హైవే వరకు స్లిప్ రోడ్లు నూతన రోడ్లను ప్రభుత్వం ఏర్పాటు చేయబోతుంది. ఫైనాన్షియల్ డిస్ట్రిక్ట్​ నుంచి కోకాపేట, కొల్లూర్, తెల్లాపూర్ వరకు బాహ్య వలయ రహదారిని కలుపుతూ హైదరాబాద్ గ్రోత్ కారిడార్ లిమిటెడ్ ప్రణాళికలో ఉన్న అర్టిలరీ రోడ్లకు అదనంగా నూతన రోడ్ల ఏర్పాటుకు రూపకల్పన చేస్తుంది. తక్కువ ఖర్చుతో బహుళ ప్రయోజనాలు కలిగే రీతిలో మిస్సింగ్ రోడ్ల వివరాలు పురపాలక శాఖకు తెలపాలని ఆ శాఖ ముఖ్య కార్యదర్శి అరవింద్‌కుమార్‌ కోరారు. నగరం చుట్టుపక్కల స్థానిక స్థిరాస్తి వ్యాపార సంస్థల యాజమాన్యాల నుంచి కూడా సలహాలు స్వీకరిస్తామని స్పష్టం చేశారు.

ఇవీ చూడండి : సీఎల్పీ నేత భట్టి సహా కాంగ్రెస్ నేతల అరెస్ట్